ქაღალდის პირადობის მოწმობის შეცვლა აპრილში უფასო იქნება

საქართველოს ის მოქალაქე, ვინც ქაღალდის უვადო პირადობის მოწმობას ფლობს, საქართველოს მოქალაქის პასპორტსა და პირადობის ელექტრონულ მოწმობას მიმდინარე წლის 1-ელი აპრილიდან 1-ელ მაისამდე სრულიად უფასოდ მიიღებს. საქართველოში ასეთი სულ 401 000 მოქალაქეა. ამის შესახებ იუსტიციის მინისტრმა თეა წულუკიანმა პარლამენტის პლენარულ სხდომაზე განაცხადა.

მინისტრის თქმით, 2020 წლისთვის, საარჩევნო სიასთან დაკავშირებით "ოდირის" (ODIHR) დადებითი დასკვნის მისაღებად, სასიცოცხლოდ მნიშვნელოვანია, რომ "ჩვენ ერთხელ და სამუდამოდ დავემშვიდობოთ ქაღალდის პირადობის მოწმობას. დღეისათვის ასეთი მდგომარეობაა - 401 000 ადამიანი ფლობს ქაღალდის პირადობის მოწმობას, რომელსაც ზედ აწერია „უვადო“. ეს არის ჩვენი მოქალაქეების ის კატეგორია, რომლებიც ფლობენ ძველი დროის გადმონაშთ დოკუმენტს, რომელსაც აქვს უვადო მოქმედება და მას არ ცვლიან. შესაბამისად, 1-ელი აპრილიდან 1-ელ მაისამდე, ჩვენ მხოლოდ ამ მოქალაქეებისთვის გვექნება როგორც პირადობის მოწმობა, ასევე, პასპორტი სრულიად უფასოდ.

ამის იქით, მე არ ვიცი, რა შეიძლება გააკეთოს იუსტიციის სამინისტრომ, რომ დაარწმუნოს ეს ადამიანები, რომლებიც ქაღალდის პირადობის მოწმობას ფლობენ, რომ თქვენი პიროვნება, ვინაობა არის ადვილად გასაყალბებელი... შეიძლება ისე გადაფორმდეს-გადმოფორმდეს თქვენი ქონება, ვერც კი გაიგოთ. ასევე, არსებობს რისკი, რომ თუკი არაკეთილსინდისიერი ხელისუფლება იქნება სათავეში, ვინმემ საარჩევნო უფლება წაგართვათ.

ამიტომ მოგიწოდებთ ყველას - იმ 401 000 ადამიანს, ვისაც ამჟამად ჯიბეში, ჩანთაში, უჯრაში გაქვთ ქაღალდის პირადობის მოწმობა, რომელიც ადვილად გასაყალბებელია და მასზე აწერია „უვადო“, ისარგებლოთ ამ აქციით და როგორც პირადობის მოწმობა, ასევე, პასპორტი, ორივე საკმაოდ ძვირადღირებული პროდუქტია, 1-ელი აპრილიდან 1-ელ მაისამდე მიიღოთ სრულიად უფასოდ“, - განაცხადა იუსტიციის მინისტრმა თეა წულუკიანმა პარლამენტის პლენარულ სხდომაზე.

მინისტრმა ასევე თქვა, რომ საზღვარგარეთ მყოფი საქართველოს მოქალაქეები მაისში საქართველოს პასპორტს უფასოდ მიიღებენ.