კობახიძე: არასამთავრობო ორგანიზაციების ნაწილი „ნაციონალური მოძრაობის“ გონგოებია

პრობლემა, რაც უარყოფითად აისახება საარჩევნო გარემოზე, არის სუსტი სამოქალაქო საზოგადოება, - ამის შესახებ პარლამენტის თავმჯდომარე ირაკლი კობახიძემ სასტუმრო „ბილტმორში“ მიმდინარე შეხვედრაზე თქვა, სადაც უცხოელ დიპლომატებთან 2018 წლის საპრეზიდენტო არჩევნების შესახებ მსჯელობენ.

"ხაზგასმით ვამბობ, ეს არის სამოქალაქო საზოგადოება და არა არასამთავრობო ორგანიზაციები, რაც სამწუხაროდ ხელს უშლის საარჩევნო გარემოს შემდგომ გაუმჯობესებას. ამ კუთხით იყო განსაკუთრებული პრობლემები საპრეზიდენტო არჩევნების დროს, როდესაც რამდენიმე არასამთავრობო ორგანიზაცია პირდაპირი  ფორმით იყო ჩართული წინასაარჩევნო კამპანიაში, რაც არის სერიოზული პრობლემა და ეს ახდენს ზოგადად იმ ცნების დისკრედიტაციას, რასაც ჰქვია არასამთავრობო ორგანიზაციები“, - განაცხადა კობახიძემ.

მისივე თქმით, ერთ-ერთი ყველაზე აქტიური არასამთავრობო ორგანიზაციის ხელმძღვანელი თვითონ იყო ინიციატორი 30 თეთრის კამპანიის, რომელმაც მიღალატედ გამოაცხადა დღევანდელი პრეზიდენტი სალომე ზურაბიშვილი. "ბუნებრივია, ასეთი ფაქტები პირდაპირ ახდენს არასამთავრობო ორგანიზაციები დისკრედიტაციას და ამ ფენომენის დისკრედიტაციას. კიდევ ერთი ორგანიზაცია „საერთაშორისო გამჭვირვალობა“ - მათ ამ კამპანიის ხელშემწყობი ბანერი ჰქონდათ განთავსებული საკუთარ ოფიციალურ გვერდზე. ეს ბუნებრივია არის ძალიან მძიმე ფაქტები, რაც ყურადღებას და სათანადო რეაგირებას საჭიროებს“, - აღნიშნა კობახიძემ.

ირაკლი კობახიძე საქართველოში მოქმედი არასამთავრობო ორგანიზაციების ნაწილს „ნაციონალური მოძრაობის“ გონგოებს უწოდებს.მისი შეფასებით, რაც „ნაციონალურმა მოძრაობამ“ არჩევნები წააგო, ეს ორგანიზაციები ოპოგონგოებად იქცნენ.

„ეს არის ყოფილი გონგოები, „ნაციონალური მოძრაობის“ გონგოები. მას შემდეგ, რაც არჩევნები წააგეს, ოპოზიციაში გადავიდნენ და დღეს გადაიქცნენ ოპოგონგოებად. შესაბამისად, ისინი არიან ჩვენი პოლიტიკური ოპონენტები დღევანდელ დღეს. ეს არ არის სწორი. ეს მეტყველებს, რომ სამოქალაქო საზოგადოება არის სუსტი. არასამთავრობო ორგანიზაციები უნდა იყვნენ პოლიტიკურად ნეიტრალური და მათ ნეიტრალურად უნდა გააშუქონ მოვლენები, რომელიც  პოლიტიკურ სივრცეში წარიმართება. რატომ მოხდა მათი ლუსტრაცია მაინც და მაინც საპრეზიდენტო არჩევნების დროს, ეს არ ვიცი. როგორც ჩანს, ნაცმოძრაობამ“ ჩათვალა, რომ საპრეზიდენტო არჩევნები ის არჩევნები იყო, სადაც მათ შეეძლოთ მოგება. ამიტომ ყველა რესურსის ლუსტრირება მოხდა, თუმცა „ნაცმოძრაობას“ გამარჯვება ამანაც არ მოუტანა“, - განაცხადა ირაკლი კობახიძემ.

პარლამენტის თავმჯდომარე ერთ-ერთი ყველაზე მძიმე ფაქტად მიიჩნევს "რუსთავი 2"-ის გენერალური დირექტორის, ნიკა გვარამიას განცხადების მხარდაჭერას არასამთავრობო ორგანიზაციების მხრიდან. "საუბარი იყო იმაზე, ვინც მხარს დაუჭერს სალომე ზურაბიშვილს, ყოფილიყო განკვეთილი სხვადასხა სფეროდან. ეს იყო ფაშისტური განცხადება! პირდაპირი გაგებით ფაშისტური განცხადება! ბოლშევიკური - გინდათ ეს ტერმინი გამოვიყენოთ“, - განაცხადა ირაკლი კობახიძემ.

პარლამენტის თავმჯდომარის ამ განცხადებას არასამთავრობოების ნაწილი გამოეხმაურა. ისინი ირაკლი კობახიძის მიერ მათი მისამართით გაჟღერებულ კრიტიკას უკავშირებენ მათ სადამკვირვებლო საქმიანობას და საარჩევნო კამპანიის, ასევე, ხელისუფლების საქმიანობის შესახებ კრიტიკულ შეფასებებს.