იენს სტოლტენბერგი: საქართველო ნატოსთვის უნიკალური პარტნიორია

საქართველოს ნატოში გაწევრიანების პროცესის მიმდინარეობა და ევროატლანტიკური ინტეგრაციის გზაზე ქვეყნის მიერ მიღწეული პროგრესი განიხილეს საქართველოს პრემიერმინისტრმა მამუკა ბახტაძემ და ნატოს გენერალურმა მდივანმა იენს სტოლტენბერგმა შეხვედრაზე, რომელიც დღეს მთავრობის ადმინისტრაციაში გაიმართა. შეხვედრის შემდეგ პრემიერმა და ნატოს გენერალურმა მდივანმა პრესკონფერენცია გამართეს.

პრემიერმინისტრის განცხადებით, საქართველოსა და ნატოს შორის ურთიერთობები ასეთ მაღალ დონეზე არასდროს ყოფილა და სტოლტენბერგის ვიზიტი იმის დასტურია, რომ ნატო საქართველოს გაწევრიანებას მხარს უჭერს და გვერდში უდგას.

"ჩვენ ვაფასებთ, რომ ის ასევე დაესწრება ნატო-საქართველოს სწავლებას, რომლის მიზანია ჩვენი თავდაცვითი შესაძლებლობების გაძლიერება და ნატოსთან თავსებადობის გაძლიერება. ქართველი ხალხის არჩევანი არის შეუქცევადი და მტკიცე", - განაცხადა პრემიერმინისტრმა მამუკა ბახტაძემ.

მისივე თქმით, შეხვედრაზე აღინიშნა საქართველოს მიერ ნაკისრი ვალდებულებების წარმატებით შესრულება და ინტეგრაციული მექანიზმების ეფექტიანი გამოყენება. პრემიერმინისტრმა მამუკა ბახტაძემ კიდევ ერთხელ გადაუხადა  მადლობა იენს სტოლტენბერგს მხარდაჭერისთვის.

"ჩვენ ამავე დროს განვიხილეთ ის საკითხები და გამოწვევები, რომლებიც უკავშირდება რუსეთის მხრიდან ჩვენი ორი რეგიონის ოკუპაციას, იმ მტკივნეულ გამოწვევებს, რომლებიც ამ ტერიტორიებზე გვაქვს ყველა მიმართულებით, მათ შორის ადამიანის ფუნდამენტური უფლებების დარღვევის გამო. განვიხილეთ სამშვიდობო ინიციატივები, რომლებიც საქართველოს მთავრობამ მოამზადა. შეხვედრაზე აღინიშნა ევროატლანტიკური უსაფრთხოების განმტკიცების საქმეში საქართველოს მიერ შეტანილი წვლილი.

შეხვედრაზე აქცენტი გაკეთდა აგრეთვე, შავი ზღვის უსაფრთხოებაზე. ეს გახლდათ ის გზავნილი, რომელსაც ჩვენ ძალიან დიდი ხნის განმავლობაში ვცდილობდით და ვსაუბრობდით ჩვენს მეგობრებთან, რომ შავი ზღვის რეგიონის უსაფრთხოების გარეშე წარმოუდგენელია ნატოს სივრცის მდგრად უსაფრთხოებაზე საუბარი და ჩვენთვის სასიხარულოა, რომ შავი ზღვა უფრო და უფრო პრიორიტეტული ხდება ნატოსთვის. ჩვენ ასევე განვიხილეთ ბრიუსელის სამიტზე მიღებული გადაწყვეტილებები შავ ზღვაზე საქართველოსთან თანამშრომლობის გაღრმავების საკითხში და ამავე დროს დავსახეთ თანამშრომლობის პერსპექტივები.

სტოლტენბერგი საქართველოს ერთგული მეგობარია და მსურს მას პერსონალური მადლობა გადავუხადო ჩვენი ქვეყნის მეგობრობისთვის", - განაცხადა პრემიერმინისტრმა მამუკა ბახტაძემ. 

ნატოს გენერალურმა მდივანმა კიდევ ერთხელ დაადასტურა ალიანსის ერთგულება ბუქარესტის სამიტის გადაწყვეტილებისადმი, რომ საქართველო ნატოს წევრი გახდება.

"საქართველო ნატოსთვის უნიკალური პარტნიორია. საქართველო ნატოს წევრი გახდება. თქვენ ნატოს ყველაზე დიდი კონტრიბუტორი ხართ ავღანეთში... საქართველომ ბევრ წარმატებას მიაღწია მნიშვნელოვან რეფორმებში, მათ შორის პარლამენტის როლის გაძლიერების კუთხით და იმედი მაქვს, რომ რეფორმები გაგრძელდება. ასევე, მივესალმები მშპ-ის ზრდას, მივესალმები თქვენს რეფორმებს ყველა მიმართლებით", - განაცხადა იენს სტოლტენბერგმა.

მისივე თქმით, ნატო მხარს უჭერს საქართველოს ტერიტორიულ მთლიანობას და სუვერინეტეტს საყოველთაოდ აღიარებულ საზღვრებში. "ჩვენ გავაგრძელებთ საქართველოს მომზადებას ნატოში გაწევრიანებისთვის", - განაცხადა სტოლტენბერგმა და პრემიერმინისტრს მასპინძლობისთვის მადლობა გადაუხადა. 

შეხვედრაზე ყურადღება გამახვილდა შავი ზღვის რეგიონის უსაფრთხოების მნიშვნელობაზე საერთო ევროატლანტიკური უსაფრთხოების უზრუნველყოფაში. ასევე, ხაზი გაესვა საქართველოს მნიშვნელოვან როლს საერთაშორისო სამშვიდობო მისიებში.

მხარეებმა ისაუბრეს წვრთნისა და შეფასების ერთობლივ ცენტრში(JTEC) ნატოს ეგიდით მიმდინარე სწავლებაზე, რომელიც ქვეყნის თავდაცვითი შესაძლებლობების გაძლიერებისა და ნატოსთან თავსებადობის ამაღლების ხელშეწყობას ისახავს მიზნად.

შეხვედრის ერთ-ერთი თემა იყო რეგიონში არსებული ვითარება. ქართულმა მხარემ ნატოს გენერალურ მდივანს საქართველოს ტერიტორიული მთლიანობისა და სუვერენიტეტისადმი ალიანსის მტკიცე მხარდაჭერისთვის მადლობა გადაუხადა.

გაფართოებული ფორმატის მოლაპარაკებებში ჩრდილოატლანტიკური ალიანსის დელეგაციისა და საქართველოს მთავრობის წევრები მონაწილეობდნენ.