იენს სტოლტენბერგი: 2008 წელს, ნატოს სამიტზე მივიღეთ გადაწყვეტილება უკრაინასა და საქართველოს ალიანსში მომავალ გაწევრიანებაზე, ბუქარესტში მიღებული გადაწყვეტილება ძალაშია და ნატოს კარი ღიაა

2008 წელს ნატოს სამიტზე მივიღეთ გადაწყვეტილება უკრაინის და საქართველოს მომავალ გაწევრიანებაზე. მე ვიყავი აქ ნორვეგიის პრემიერ-მინისტრის რანგში, ამიტომ ძალიან კარგად მახსოვს ეს შეხვედრა. უპირველეს ყოვლისა, მივესალმები იმას, რომ მას შემდეგ ჩვენ მნიშვნელოვნად გავამყარეთ პარტნიორობა საქართველოსთან და უკრაინასთან, - ამის შესახებ ნატოს გენერალუმა მდივანმა იენს სტოლტენბერგმა განაცხადა. მისი თქმით, ბუქარესტში მიღებული გადაწყვეტილება ძალაშია.

„ნატოს მოკავშირეებმა უკრაინას დიდი მხარდაჭერა გაუწიეს და შესაბამისად, უკრაინის შეიარაღებული ძალები ბევრად უფრო ძლიერი, ბევრად უკეთ აღჭურვილნი არიან დღეს, ვიდრე 2014 წელს. თებერვლიდან მოკავშირეებმა კიდევ უფრო მეტად გააძლიერეს უკრაინის მხარდაჭერა და სახეზეა ნატოდან უპრეცედენტო მხარდაჭერა უკრაინის მიმართ. მე დარწმუნებული ვარ, რომ საგარეო საქმეთა მინისტრები დღეს და ხვალ ბუქარესტში გამართულ შეხვედრაზე კიდევ ერთხელ გაიმეორებენ, რომ ნატოს კარი ღიაა. ჩვენ ვაჩვენეთ ეს არაერთხელ ბოლო წლების განმავლობაში. ჩრდილოეთ მაკედონია, მონტენეგრო და ახლა ფინეთი და შვედეთი. ასე რომ, ჩვენ მოვახდინეთ დემონსტრირება, რომ ბუქარესტში მიღებული გადაწყვეტილება ძალაშია და ნატოს კარი ღიაა. ჩვენ არამარტო ვამბობთ ამას, არამედ საქმითაც ვამტკიცებთ. უკრაინის წევრობაზე ჩვენ განვაცხადეთ, რომ უკრაინა გახდება ალიანსის წევრი. მე ველოდები, რომ მოკავშირეებიც გაიმეორებენ ამ პოზიციას ბუქარესტში. თუმცა, ახლა მთავარი აქცენტი უკრაინის მხარდაჭერაზეა. ჩვენ ომის შუაგულში ვართ და ამიტომ არ უნდა გავაკეთოთ არაფერი, რაც ხელს შეუშლის მოკავშირეთა ერთობას აღმოუჩინონ უკრაინას სამხედრო, ჰუმანიტარული, ფინანსური მხარდაჭერა, რადგან ჩვენ უნდა თავიდან ავიცილოთ პუტინის გამარჯვება. ჩვენ უნდა უზრუნველვყოთ, რომ უკრაინა იყოს დამოუკიდებელი და სუვერენული სახელმწიფო“, - განაცხადა სტოლტენბერგმა.