27-28 მარტს სტრასბურგში საქართველოს შესახებ მორიგ დოკუმენტს მიიღებენ

27 და 28 მარტს სტრასბურგში, ევროპარლამენტში, ევროკავშირი-საქართველოს ასოცირების საპარლამენტო კომიტეტის მერვე სხდომა გაიმართება, რომლის მუშაობაშიც მონაწილეობას მიიღებენ საქართველოს პარლამენტისა და ევროპარლამენტის მუდმივმოქმედი დელეგაციები.

შეხვედრა დოკუმენტის მიღებით დასრულდება, სადაც საუბარი იქნება ევროკავშირსა და საქართველოს თანამშრომლობაზე, უსაფრთხოების გამოწვევებზე, ასევე, ოკუპირებულ აფხაზეთში ირაკლი კვარაცხელიას გარდაცვალებაზე.

"მე ბევრჯერ მითქვამს და ახლაც გავიმეორებ, რომ "სამხრეთ ოსეთი" და აფხაზეთი განუყოფელი ნაწილია საქართველოსი, მისი კონსტიტუციური სივრცის", - ამის შესახებ ევროპარლამენტარმა ანდრეს მამიკინსმა განაცხადა.

"სამწუხაროდ, არ არსებობს ამ საკითხის ერთ დღეში გადაწყვეტის გზა და საქართველოს მთელი მთავრობის დამსახურებაა, რომ თქვენ არ ხედავთ ამ ტერიტორიების დაბრუნების საკითხის სამხედრო გზით გადაწყვეტას", - თქვა მამიკინსმა. 

მისი განცხადებით საქართველოს მოქალაქეებს უვიზო რეჟიმი აქვთ და ბიომეტრიული პასპორტით უპრობლემოდ შეუძლიათ იმოგზაურონ ლისაბონიდან რიგაში, ჰელსინკიდან რომში.

"სხვათაშორის, მე რიგაში ჩემს მშობლიურ ქალაქში, ყოველდღე ვხედავ საქართველოს მოქალაქეებს, ისინი ტურისტები არიან. ისინი არ არიან არალეგალები, სხედან მოედანზე და სვამენ ლატვიურ ლუდს, მე ძალიან ბედნიერი ვარ ამით.

შემდგომი 5 წლის განვალობაში თქვენ გაქვთ ასოცირების საკმაოდ დატვირთული დღის წესრიგი, მე ვისურვებდი, რომ მომავალმა ევროპარლამენტმაც გააგრძელოს იგივე ვექტორი და პოლიტიკა საქართველოსთან დაკავშირებით, რომ უფრო შორს წავიდეს ეს თანამშრომლობა", - განაცხადა ანდრეს მამიკინსმა.

ევროპარლამენტარ ტუნე კელამის განცხადებით, ის რაც რუსეთმა საქართველოში გააკეთა, ევროპისთვის განგაშის ზარი იყო. 

"ნატოს და ევროკავშირის რეაქცია იყო ძალიან სუსტი და დაბალანსების პოლიტიკას მიმართა ბევრმა. ახლა ჩვენ უკეთ ვიცით რასთან გვაქვს საქმე და როგორი აგრესიული შეიძლება იყოს რუსეთი. პუტინის პოლიტიკის მიმართ ახლა ევროპა ერთიანია და ევროპარლამენტი მუდმივად აკეთებს აქცენტს რუსეთის მიერ დარღვეულ პრინციპებზე და საერთაშორისო სამართლის ნორმებზე. მნიშვნელოვანია სტრასბურგის სასამართლოს სიტყვაც. არათუ სხვა სახელმწიფოების, არამედ რუსეთის მოქალაქეების მხრიდანაც ბევრი სარჩელია შესული სტრასბურგში. რუსეთი კი იმუქრება, რომ საერთოდ დატოვებს ევროსაბჭოს", - განაცხადა ევროპარლამენტარმა. 

ევროკავშირი-საქართველოს ასოცირების საპარლამენტო ასოცირების კომიტეტის თანათავმჯდომარის საჯად კარიმის განცხადებით, ამბიციური დღის წესრიგია შეხვედრისთვის. მისი თქმით, ის მოუთმენლად ელოდება ქართველ კოლეგებს და მათ მოსაზრებებს, თუ როგორ ვითარდება მოვლენები და როგორ შეიძლება საქართველოსა და ევროპას შორის ურთიერთობების გაღრმავება. 

"გვაქვს ამბიციური დღის წესრიგი და ვემზადებით რეკომენდაციების მისაღებად. გვინდა ეს დრო დავუთმოთ მომავალზე მსჯელობასაც , რაც საქართველოს გარშემო არსებული გეოპოლიტიკური სიტუაციის ანალიზსს მოითხოვს. მოუთმენლად ველოდები ქართველ კოლეგებს და მათ მოსაზრებებს, თუ როგორ ვითარდება მოვლენები და კონკრეტული წინადადებით როგორ გავაღრმავოთ ურთიერთობები. ეს პარლამენტი იყო ყოველთვის მოწინავე საქართველოს ინტერესების დაცვის კუთხით. ჩვენ მხარს ვუჭერთ საქართველოს ტერიტორიულ მთლიანობას და სუვერენიტეტს. ჩვენ ვხედავთ უცვლელ სიტუაციას ოკუპირებულ ტერიტორიებზე, რომლებიც რუსეთის ხელშია.ჩვენ ყოველთვის ყურადღებით ვართ და ძლიერი გზავნილი გვექნება რუსეთის მიმართ. ოკუპაცია - ეს არის ტერმინი, რომელიც ევროპარლამენტმა პირველმა დაამკვიდრა ევროსტრუქტურებიდან და ჩვენ ვმუშაობთ, რომ ევროკომისიამ, ევროპულმა საბჭომ გამოიყენოს იგივე ტერმინი, რაც ევროპარლამენტმა. ჩვენს დოკუმენტში აუცილებლად იქნება საუბარი უსაფრთხოების თემაზე და ოკუპაციაზე", - განაცხადა საჯად კარიმიმ.