კობახიძე ოკუპაციაზე: კონფლიქტს ტრაგიკული ადამიანების სახეები აქვს

რუსეთის მიერ საქართველოს ოკუპაციაზე საქართველოს პარლამენტის თავმჯდომარე ირაკლი კობახიძემ ილაპარაკა, რომელიც ოფიციალური ვიზიტით სერბეთშია.

ამ კონფლიქტს ტრაგიკული ადამიანების სახეები აქვს - ეს ირაკლი კობახიძის სიტყვებია, პარლამენტის თავმჯდომარემ განცხადება სერბეთის ეროვნული ასამბლეის უმაღლესი ტრიბუნიდან გააკეთა.

"ორი კვირის წინ, კიდევ ერთი ახალგაზრდა ქართველი ირაკლი კვარაცხელია გაუჩინარდა ოკუპირებულ აფხაზეთში. მანამდე, საქართველომ იგლოვა ქართველი ვაჟკაცები – გიგა ოთხოზორია და არჩილ ტატუნაშვილი. მიმდინარე სამხედრო მობილიზაცია, მავთულხლართები და სხვა ხელოვნური ბარიერები საოკუპაციო ხაზის გასწვრივ, შეზღუდული მიმოსვლა, უკანონო დაკავებები და გატაცებები, განათლების მშობლიურ ენაზე მიღების აკრძალვა, სხვა ეთნიკურ ნიადაგზე ჩადენილი მძიმე ადამიანის უფლებების დარღვევები და ფართოდ ფეხგადგმული დაუსჯელობა ამ ტერიტორიებზე, კვლავ ანგრევს ჩვენი მოქალაქეების ცხოვრებას.

ყველა ამ სირთულის მიუხედავად, საქართველო შერიგებისა და დაახლოების პოლიტიკის ერთგულია, კონფლიქტით და საოკუპაციო ხაზებით გაყოფილ მოსახლეობას შორის დიალოგის, ნდობის დამყარებისა და ადამიანური კონტაქტების გზით.

ოკუპირებულ რეგიონებში მცხოვრებ ჩვენს მოქალაქეებს ვაძლევთ შესაძლებლობას, ისარგებლონ ყველა პრივილეგიითა და სარგებლით, რაც საქართველოს განვითარებასა და ევროინტეგრაციას მოჰყვება. ჩვენი ახალი სამშვიდობო ინიციატივა „ნაბიჯი უკეთესი მომავლისკენ“ კიდევ ერთი ძლიერი ძალისხმევაა ამ მიმართულებით. ვიმედოვნებ, დადგება დღე, როდესაც აფხაზ და ოს დებთან და ძმებთან ურთიერთგაგებას მივაღწევთ”,- განაცხადა პარლამენტის თავმჯდომარემ.

ირაკლი კობახიძემ ისაუბრა საქართველოს ევროპულ არჩევანზეც, რა დროსაც განაცხადა, რომ სერბეთისა და საქართველოს მომავალი ევროპულ ოჯახშია. დღესვე საქართველოსა და სერბეთის პარლამენტებს შორის თანამშრომლობის მემორანდუმი გაფორმდა. 

საქართველოს პარლამენტის თავმჯდომარე სერბეთში დელეგაციასთან ერთად იმყოფება, რომლის შემადგენლობაში დეპუტატები: გოგა გულორდავა, გიორგი თოთლაძე, ზაქარია ქუცნაშვილი და დავით ბაქრაძე, ასევე, პარლამენტის თავმჯდომარის კაბინეტის უფროსი, ნიკოლოზ სამხარაძე შედიან.