ირაკლი კობახიძე: მტკიცედ ვუჭერთ მხარს სერბეთის სუვერენიტეტსა და ტერიტორიულ მთლიანობას

"საქართველოს და სერბეთს განსაკუთრებული და პოზიტიურად დინამიური ურთიერთობები აკავშირებს", - ამის შესახებ საქართველოს პარლამენტის თავმჯდომარემ ირაკლი კობახიძემ სერბეთის ეროვნული ასამბლეის პრეზიდენტთან, მაია გოვიკოვიჩთან შეხვედრის შემდეგ გამართულ ბრიფინგზე განაცხადა.

ირაკლი კობახიძემ მადლობა გადაუხადა მაია გოვიკოვიჩს და დასძინა, რომ მან ორ ქვეყანას შორის ურთიერთობებს ახალი ენერგია შესძინა. 

"ორ ქვეყანას აკავშირებს ძალიან კარგი პოლიტიკური ურთიერთობა. მოხარულები ვართ სერბეთის დამოკიდებულებით საქართველოს სუვერენიტეტისა და ტერიტორიული მთლიანობის მიმართ და მინდა კიდევ ერთხელ აღვნიშნო, რომ საქართველო სერბეთის სუვერენიტეტისა და ტერიტორიული მთლიანობის მტკიცე მხარდამჭერია", - განაცხადა ირაკლი კობახიძემ.

პარლამენტის თავმჯდომარის თქმით, მხარეებს სურთ, რომ გააძლიერონ ორმხრივი ურთიერთობები სხვადასხვა მიმართულებით, მათ შორის ეკონომიკური კავშირები. 

"ასევე, გვსურს, გავაძლიეროთ ორ ქვეყანას შორის კულტურული კავშირები, ასევე, გავაღრმავოთ თანამშრომლობა განათლების, მეცნიერების, სპორტის მიმართულებით და ვფიქრობ, რომ ამ მიმართულებითაც ძალიან კარგი პერსპექტივები არსებობს. 

ჩვენ მსგავსი გამოწვევები გაქვს, თუმცა, გვაქვს მსგავსი მიზნებიც. ჩვენი საერთო საგარეო პოლიტიკური მიზანი არის ევროპული ინტეგრაცია და მნიშვნელოვანია, რომ ამ საერთო მიზნის მისაღწევად, ერთად ვიდგეთ. ასევე, ჩვენთვის ძალიან მნიშვნელოვანია ამ მიმართულებით, სერბეთის გამოცდილების გაზიარება. კიდევ ერთხელ მინდა აღვნიშნო, რომ არსებობს მრავალი მიმართულებით თანამშრომლობის გაღრმავების უზარმაზარი პერსპექტივები და დინამიკა ძალიან პოზიტიურია. საქართველოს პარლამენტი მზად არის, გააგრძელოს ორ ქვეყანას შორის კავშირების განმტკიცებაში საკუთარი წვლილის შეტანა", - განაცხადა ირაკლი კობახიძემ.

სერბეთის ეროვნული ასამბელის პრეზიდენტმა მაია გოვიკოვიჩმა ბრიფინგზე კი განაცხადა, რომ საქართველო არასდროს გამოსულა სერბეთის ინტერესების წინააღმდეგ საერთაშორისო ასპარეზზე, როდესაც საუბარი შეეხება ე.წ. კოსოვოს რესპუბლიკის აღიარებას. "ჩვენც შესაბამისად არასდროს გამოვალთ საქართველოს ინტერესების წინააღმდეგ", - თქვა მაია გოვიკოვიჩმა. 

საქართველოს პარლამენტის თავმჯდომარე სერბეთში დელეგაციასთან ერთად იმყოფება, რომლის შემადგენლობაში დეპუტატები: გოგა გულორდავა, გიორგი თოთლაძე, ზაქარია ქუცნაშვილი და დავით ბაქრაძე, ასევე, პარლამენტის თავმჯდომარის კაბინეტის უფროსი, ნიკოლოზ სამხარაძე შედიან.