ადვოკატი: ბაგრატიონი ცრემლებამდე აღელვებული იყო და მოითხოვდა, ანას კარგად ეპატრონა შვილისთვის

“დავით ბაგრატიონ-მუხრანელი გაიქცა საქართველოდან, ამ ფორმით ის გაექცა პასუხისმგებლობას, ვინაიდან რამდენიმე დღეში შეიძლებოდა საზღვარი ვერ გადაეკვეთა, ახლა კი მან გამოძიებას გაასწრო“, - ამის შესახებ ჟურნალისტებს ანა ბაგრატიონ-გრუზინსკის ადვოკატმა ლევან გორელაშვილმა განუცხადა. მისი თქმით, დავით ბაგრატიონმა ანას ესპანეთში წასვლამდე დაურეკა.

"მართლები არსად გარბიან, ისინი რჩებიან და თავიანთ სიმართლეს ამტკიცებენ. ამან კიდევ ერთხელ დაგვარწმუნა, რომ დედის ჯანმრთელობის მდგომარეობის გაუარესების მიზეზით წასვლა გამოგონილი საბაბია. გაფრენამდე, შუადღეს დავითი ანას დაუკავშირდა. ზარი უცნაური იყო, რადგან ისინი ზარებით არ კონტაქტობენ. დავითი ცრემლებამდე აღელვებული იყო და მოითხოვდა, ანას კარგად ეპატრონა მათი შვილისთვის. ანას საუბრის ბოლოს ისე გამოემშვიდობა, თითქოს მეორედ ამ ადამიანს ცხოვრებაში ვეღარ ნახავდა. ამან გვაფიქრებინა, რომ მას ჯერ კიდევ შუადღით ჰქონდა განზრახული საქართველოს დატოვება. გარდა ამისა, დავითის მიერ ავიაბილეთების შეძენა მნიშვნელოვნად უსწრებს მისი დედის ცუდად გახდომის პერიოდს, რაც კიდევ ერთხელ გვაფიქრებინებს, რომ დედის ცუდად გახდომა საქართველოს დატოვების საბაბია", - განაცხადა გორელაშვილმა.

ცნობილი გახდა ისიც, რომ დავით ბაგრატიონ-მუხრანელის მიერ ანა ბაგრატიონ-გრუზინსკის მიმართ განხორციელებულ შესაძლო ძალადობის ფაქტზე ტელეწამყვან შორენა ბეგაშვილსაც გამოკითხავენ.

სამართალდამცველ ორგანოში იძიებენ საქმეს, რომელიც დავით ბაგრატიონ-მუხრანელის მიერ ანა ბაგრატიონ-გრუზინსკიზე შესაძლო ფიზიკური ძალადობის ფაქტს ეხება. შემთხვევა 2014 წლის 9 მაისს საგურამოში მოხდა.