პოლიტიკოსები და მოქალაქეები 9 აპრილს დაღუპულებს პატივს მიაგებენ

9 აპრილის მემორიალთან მთელი ღამის განმავლობაში  იკრიბებოდნენ მოქალაქეები, მათ შორის პოლიტიკოსები, რომლებსაც ახლაც მიაქვთ ყვავილები, რათა პატივი მიაგონ დაღუპულებს.

„ქედს ვიხრი ჩვენი გმირების წინაშე, მათი ხსოვნის წინაშე და დარწმუნებული ვარ, რომ ქართველი ერი ყოველთვის ერთგული დარჩება იმ იდეალების, რისთვისაც 30 წლის წინ გაერთიანდა, გაერთიანდა ძალიან ძლიერად და ამან მოგვიტანა ჩვენი სახელმწიფოებრიობის აღდგენა. სიმბოლურია ისიც, რომ ორი წლის შემდეგ ამ ტრაგედიიდან ჩვენ გამოვაცხადეთ ჩვენი ქვეყნის დამოუკიდებლობა“, - განაცხადა  საქართველოს პრემიერმინისტრმა მამუკა ბახტაძემ.

„მეც მაქვს პირადი ემოციები ამ დღესთან დაკავშირებით, რადგან მაშინ 21 წლის სტუდენტი სწორედ აქ გახლდით ჩემს მეგობრებთან ერთად და განსაკუთრებული ემოცია მაკავშირებს ამ დღესთან. მაშინ დაიწყო ზუსტად ბრძოლა დამოუკიდებლობისთვის, ბრძოლა თავისუფლებისთვის და ვფიქრობ, ეს ბრძოლა თავისუფლებისთვის დასრულებული ჯერ არ არის, რადგან საქართველოს აქვს კიდევ დაუსრულებელი ამოცანა, იყოს ევროატლანტიკური სტრუქტურის სრულფასოვანი წევრი“, - განაცხადა საგარეო საქმთა მინისტრმა დავით ზალკალიანმა.

„მადლობა ამ დღისთვის, მადლობა თავისუფლებისთვის. ჩვენს შვილებს, მომავალ თაობებს კარგად უნდა ავუხსნათ, თუ რამდენად მნიშვნელოვანია ჩვენი ქვეყნის ისტორიაში დღევანდელი დღე. მათ უნდა იცოდნენ, რა გააკეთეს 9 აპრილს გარდაცვლილმა ადამიანებმა, როგორ შესწირეს თავი სამშობლოს სიყვარულს და თავისუფლებას“, - განაცხადა თბილისის მერმა კახა კალაძემ.

დღეს 1989 წლის 9 აპრილის ტრაგედიიდან 30 წელი შესრულდა. ამ დღეს, გამთენიისას, საბჭოთა კავშირის შეიარაღებული ძალების ნაწილებმა თბილისში, რუსთაველის გამზირზე, მშვიდობიანი საპროტესტო აქცია დაარბიეს, რასაც 21 ადამიანის სიცოცხლე შეეწირა.