რა დარღვევებზეა საუბარი პერსონალურ მონაცემთა დაცვის ინსპექტორის ანგარიშში

პერსონალურ მონაცემთა დაცვის ინსპექტორმა ადამიანის უფლებათა დაცვის კომიტეტს გასული წლის ანგარიში წარუდგინა. დოკუმენტი 2018 წელს ქვეყანაში პერსონალური მონაცემების დაცვის მდგომარეობას და გაწეულ საქმიანობას აჯამებს. 

გასულ წელს 382 მიმართვისა და ჩატარებული 148 ინსპექტირების შედეგად, ადმინისტრაციული სამართალდარღვევის 266 ფაქტი გამოვლინდა. 72 ფაქტზე ჯარიმა და 61 ფაქტზე გაფრთხილება გაიცა. ხოლო 67 სამართალდარღვევაზე კანონმდებლობით გათვალისწინებული ორთვიანი ხანდაზმულობის ვადის გამო პასუხისმგებლობის დაკისრება ვერ მოხერხდა. 

პერსონალურ მონაცემთა დაცვის ინსპექტორის აპარატი ანგარიშში სამართალდარღვევების კონკრეტულ შემთხვევებზეც წერს. 

კერძოდ, 2018 წელს ორი უნივერსიტეტის შემოწმებისას დადგინდა, რომ უნივერსიტეტებს საინფორმაციო დაფაზე საჯაროდ ჰქონდათ განთავსებული სტუდენტების ფინანსური დავალიანებისა და სტატუსის შეჩერების შესახებ ინფორმაცია (სია მოიცავდა სტუდენტების სახელს, გვარს, პირად ნომერს, ჯგუფის ნომერს).

უნივერსიტეტები მონაცემთა გასაჯაროების მიზნად სტუდენტთა ინფორმირებას ასახელებდნენ. შემოწმების ფარგლებში დადგინდა, რომ სტუდენტებისთვის ინფორმაციის მიწოდება შესაძლებელი იყო სხვა ფორმითაც – ინდივიდუალურად, ელექტრონული ბაზისა და ელექტრონული ფოსტის მეშვეობით. მიუხედავად ამისა, უნივერსიტეტებმა საჯაროდ ხელმისაწვდომი გახადეს სტუდენტების შესახებ ინფორმაცია.

ორივე უნივერსიტეტი ინსპექტორმა „პერსონალურ მონაცემთა დაცვის შესახებ“ საქართველოს კანონის 43-ე მუხლით გათვალისწინებული ადმინისტრაციული სამართალდარღვევის ჩადენაში ცნო. მათ ასევე დაევალათ სტუდენტებისთვის მათი ფინანსური დავალიანების არსებობისა და სტუდენტის სტატუსის ცვლილების შესახებ ინფორმაციის ინდივიდუალურად მიწოდების სტანდარტული წესის შემუშავება. 

კიდევ ერთი საქმე ეხებოდა დასაქმებული ორგანიზაციის მიერ თანამშრომლებისთვის დისციპლინური პასუხისმგებლობის დაკისრების, წახალისების (მათ შორის, პრემიის გაცემის), მათი დანიშვნა/გათავისუფლების შესახებ გადაწყვეტილებების საჯაროდ სტენდზე განთავსებას. 

დამსაქმებელი ადმინისტრაციული სამართალდარღვევის ჩამდენ პირად ცნეს და არასწორი პრაქტიკის შეცვლის მიზნით „პერსონალურ მონაცემთა დაცვის შესახებ“ საქართველოს კანონის მოთხოვნების გათვალისწინება მოსთხოვეს. პერსონალურ მონაცემთა დაცვის აპარატის ცნობით,  დამსაქმებელი ვალდებულია არ დაუშვას დასაქმებულის სამსახურებრივი საქმიანობის, მათ შორის, მისი კარიერული წინსვლის თუ ჩადენილი გადაცდომების შესახებ ინფორმაციის კონკრეტული საჭიროების გარეშე ნებისმიერი დაინტერესებული პირისთვის ხელმისაწვდომობა.

კიდევ ერთ შემთხვევაში ჯანდაცვის სამინისტრომ  მოქალაქის წერილობითი მიმართვა, რომელიც აივ/შიდსით შესაძლო ინფიცირების საფრთხეებს შეეხებოდა, ხელმისაწვდომი გახადა ამავე მიმართვაში დასახელებული პირებისთვის.

როგორც გაირკვა,  სამინისტრომ მოქალაქის წერილი რეაგირების მიზნით სსიპ დაავადებათა კონტროლისა და საზოგადოებრივი ჯანმრთელობის ეროვნულ ცენტრს გადაუგზავნა. თავის მხრივ, სსიპ-მა მიმართვა მასში მითითებული გარემოებების დადგენის მიზნით გადასცა კონტრაქტორ ორგანიზაციებს.

"განხილულ შემთხვევაში, კონტრაქტორებისგან დამატებითი ინფორმაციის მოძიება შესაძლებელი იყო წერილის ავტორის იდენტიფიცირების გარეშეც, მით უფრო, რომ წერილის შინაარსი ქმნიდა ავტორისთვის გარკვეული ზიანის მიყენების საფრთხეს. აღსანიშნავია, რომ ინსპექტორის დავალების საფუძველზე, სამინისტრომ მონაცემების დამუშავების კანონიერების უზრუნველსაყოფად განსაზღვრა
რიგი ორგანიზაციულ-ტექნიკური ღონისძიებების გატარების საჭიროება", - აღნიშნულია პერსონალურ მონაცემთა დაცვის ინსპექტორის ანგარიშში. 

პერსონალურ მონაცემთა დაცვის ინსპექტორმა გასულ წელს გარდა სამართალდარღვევების გამოვლენისა, დამატებით შესასრულებლად 316 დავალება და რეკომენდაციაც გასცა.