ბახტაძე თურნავას დანიშვნაზე: ჩვენ ახლა გვჭირდება სწრაფი გადაწყვეტილებები

საქართველოს პრემიერმინისტრმა ეკონომიკის მინისტრად ნათია თურნავა ოფიციალურად წარადგინა. ამის შესახებ პრემიერმა ბრიფინგზე ილაპარაკა.

მამუკა ბახტაძემ ყოფილ მინისტრს გიორგი ქობულიას მადლობა გადაუხადა და თქვა, რომ ქობულია არის ძლიერი ეკონომისტი და პროფესიონალი. ბახტაძის თქმით, მან შეძლო შეექმნა განვითარების სტრატეგიები, რომლებიც მთავრობას მომავალში გამოადგება. რაც შეეხება ნათია თურნავას, პრემიერის თქმით, მას თურნავასთან აკავშირებს 10-წლიანი თანამშრომლობა როგორც კერძო, ისე საჯარო სექტორში. 

"დარწმუნებული ვარ, რომ ნათია აუცილებლად წარმატებით გაართმევს თავს დაკისრებულ მოვალეობას. მას აქვს ძალიან სწორი აღქმა იმ სოციალური რეალობის, რომელიც არის ჩვენს ქვეყანაში. ის დავალებები და ვადები, რომლებიც ნათიას აქვს შესასრულებელი ეკონომიკის სამინისტროში, არის ძალიან მკაცრი და მას აუცილებლად ექნება ჩვენი მხარდაჭერა", - განაცხადა მამუკა ბახტაძემ.

როგორც მამუკა ბახტაძემ მთავრობის სხდომის დაწყებამდე გამართულ პრესკონფერენციაზე განაცხადა, ქობულია როგორც დღეს, ასევე მომავალშიც გამოადგება ქვეყანას.

„პირველ რიგში, მინდა გითხრათ, რომ მე გოგასთან გუშინაც მქონდა შეხვედრა და დღესაც, მთავრობის სხდომის შემდეგ კიდევ ერთი შეხვედრა მექნება. გარწმუნებთ, ამ მხრივ პრობლემა არ არის. ბუნებრივია, გოგა ქობულიამ გითხრათ ის, რაც უნდა ეთქვა, გადაწყვეტილება უნდა მიმეღო მე და მე ეს გადაწყვეტილება მივიღე მასთან საუბრის შედეგად. ისევე, როგორც გადაწყვეტილება მივიღე ნათია თურნავასთან საუბრის შედეგად. გარწმუნებთ, რომ არაფერი გასაკვირი აქ არ არის. აქვე მინდა განვმარტო, რომ თვითონ გოგა ქობულიას განვლილი გზა, მისი კარიერული გზა არის ნათელი პასუხი იმისა, თუ რა კომპეტენციის მატარებელია ეს ადამიანი. მინდა შეგახსენოთ, ის გახლდათ „მაკინზის“ უფროსი პარტნიორი. ეს მეტყველებს იმაზე, რომ მას ჰქონდა მნიშვნელოვანი ცოდნა, რომ მან ეს მნიშვნელოვანი ცოდნა გამოიყენა იმ განვითარების გეგმების მოსამზადებლად, სხვადასხვა ეკონომიკური სექტორის მიმართულებით, რომელიც ერთად თავს იყრის ეკონომიკის სამინისტროში. უფრო მეტიც, ის როგორც დღეს, ასევე მომავალშიც ძალიან გამოადგება ქვეყანას“, - განაცხადა ბახტაძემ.

ოფიციალურად წარდგენის შემდეგ განცხადება ეკონომიკის ახლად დანიშნულმა მინისტრმაც გააკეთა. ნათია თურნავამ მადლობა გადაუხადა მამუკა ბახტაძეს ნდობის გამოცხადებისთვის და ასევე მადლობა გადაუხადა ყოფილ მინისტრ ქობულიას თანამშრომლობისთვის.

"ჩემთვის დიდი პატივია სათავეში ჩავუდგე ეკონომიკის სამინისტროს. გვაქვს კონკრეტული ხედვა, კონკრეტული დავალებები და ყველაფერს გავაკეთებ, რომ ნდობა გავამართლო", - განაცხადა ნათია თურნავამ.

ეკონომიკის მინისტრმა გიორგი ქობულიამ თანამდებობა პრემიერმინისტრის ბრძანებით დატოვა.

გიორგი ქობულია ეკონომიკის მინისტრად 2018 წლის 12 ივლისს დაინიშნა.

ნათია თურნავა ეკონომიკის მინისტრის პირველ მოადგილედ 2000 წლის შემდეგ სხვადასხვა დროს მუშაობდა. 2013-2018 წლებში „საპარტნიორო ფონდის“ აღმასრულებელი დირექტორის მოადგილე იყო.