მერია გადამზადების პროგრამებზე რეგისტრაციას იწყებს

„ისწავლე და დასაქმდი“ - მერია გადამზადების პროგრამებზე რეგისტრაციას იწყებს. ამის შესახებ თბილისის მერმა მუნიციპალიტეტის მთავრობის დღევანდელ სხდომაზე განაცხადა. 

კახა კალაძის თქმით, ქვეყანაში და თბილისშიც ყველაზე დიდი პრობლემა დღეს არის დასაქმება და სამუშაო ადგილები.

„ჩვენ შარშან დავიწყეთ პროექტის განხორციელება და ძალიან დიდი წარმატება მოჰყვა. ეს არის ახალგაზრდების მიმართ ხელშეწყობა პროფესიული გადამზადების თვალსაზრისით, რადგან ჩვენ გვაქვს ინფორმაცია თუ რაზეა მოთხოვნა ბიზნესის მხრიდან, რა პროფესიებს ითხოვს ბიზნესი და სად სჭირდება გადამზადებული კვალიფიციური ადამიანები. შესაბამისად, პროექტი რომელსაც ქვია „ისწავლე და დასაქმდი“ ჩვენ შარშან განვახორციელეთ პირველად და წელსაც ვიწყებთ, რათა ახალგაზრდებს ხელი შევუწყოთ ახლიდან გადამზადებაში და შემდეგ მივცეთ შესაძლებლობა, რომ სხვადასხვა ბიზნესში, კერძო სექტორში, ან შეიძლება საჯარო სექტორში, რომ ეს ადამიანები იქცნენ დასაქმებული", - განაცხადა კახა კალაძემ.

თბილისის მერიის თქმით, რეგისტრაცია დღეს დაიწყება და 7 მაისის ჩათვლით გაგრძელდება, სასწავლო კურსის ხანგრძლივობა კი 3 თვეა.

დედაქალაქის მერის მოადგილის, სოფიო ხუნწარიას ინფორმაციით, პროფესიული გადამზადების პროგრამის ფარგლებში, ერთი წლის განმავლობაში, 1 000-მდე ადამიანი გადამზადდა, მათგან 80% კი დასაქმდა.