საგარეო უწყება: უვიზო მიმოსვლის რეჟიმი ის მონაპოვარია, რომელსაც უნდა გავუფრთხილდეთ

საქართველოს საგარეო უწყების სპიკერის განცხადებით, საქართველოდან თავშესაფრის მაძიებელთა რიცხვის ზრდამ გარკვეული პრობლემები გამოიწვია, რის გამოც საერთაშორისო პარტნიორებთან ერთად პრობლემის მოგვარებაზე მუშაობენ.

"დასამალი არ არის, რომ ბოლო პერიოდში იყო გარკვეული პრობლემები. თავშესაფრის მოთხოვნით ჩვენი მოქალაქეების მიმართვიანობამ იმატა ევროკავშირისა და შენგენის ზონაში. უვიზო მიმოსვლის რეჟიმი ის მონაპოვარია, რომელსაც უნდა გაუფრთხილდნენ. ეს არ არის დასრულებული პროცესი. უვიზო რეჟიმი წარმოადგენს კიდევ ერთ ნაბიჯს ევროკავშირში სრული ინტეგრაციისკენ, ამიტომ ამ შედეგს უნდა შევხედოთ მეორე მხრიდან, როგორც პროცესს, რომელსაც ჩვენი ევროპულ ოჯახში გაწევრიანება ჰქვია. მუშაობა მიმდინარეობს. ევროპელ პარტნიორებს გავაცანით ჩვენ მიერ უკვე გადადგმული ნაბიჯები. ასევე წინადადებების გაცვლა, სამუშაო შეხვედრები დღესაც გრძელდება და იქ უკვე კონკრეტიკაზე წავა საუბარი, თუ რა ნაბიჯები უნდა გადაიდგას, რათა ეს პროცესი არ დაზარალდეს და საფრთხის ქვეშ არ დადგეს“, - აღნიშნა ვლადიმერ კონსტანტინიდმა.

მისი თქმით, უვიზო მიმოსვლის პრივილეგიით ბოლო ორ წელიწადში საქართველოს 600 ათასმა მოქალაქემ კეთილსინდისიერად ისარგებლა. 

დარწმუნებული ვარ, გართულებები არ გვექნება და იმ მიღწევის შენარჩუნებას შევძლებთ, რომელიც ძალიან მნიშვნელოვანი ნაბიჯია ევროკავშირთან ინტეგრაციის გზაზე, - ამის შესახებ საქართველოს პარლამენტის თავმჯდომარემ, ირაკლი კობახიძემ განაცხადა.

"ევროკავშირში ინტეგრაციის გზაზე ჩვენი ერთ-ერთი უმთავრესი მიღწევა ვიზალიბერალიზაციაა, რასაც განსაკუთრებულად ვუფრთხილდებით. ჩვენ კონკრეტული ვალდებულებები გვაქვს, რომელიც ამ მიღწევიდან გამომდინარეობს და შესაბამისად, ამ ვალდებულებების შესრულებას მაქსიმალურად ვცდილობთ. პარლამენტი ამ ყველაფერში აქტიურად არის ჩართული. ჩვენ შესაბამისი კანონპროექტების პაკეტიც იმისთვის მივიღეთ, რომ პრობლემები თავიდან მაქსიმალურად აგვერიდებინა. ასევე, ჩვენს კოლეგებთან მუდმივი კომუნიკაცია გვაქვს, მათ შორის მეც, როცა შეხვედრები გვაქვს ევროკავშირის წევრი ქვეყნების წარმომადგენლებთან და ამ მიმართულებით არსებულ გამოწვევებზე ვსაუბრობთ. ნებისმიერ საკითხზე მსჯელობისთვის აბსოლუტურად ღია ვართ, რომელიც დაკავშირებულია ვიზალიბერალიზაციასთან. ყოველთვის მზადყოფნას ვაფიქსირებთ, რომ ამ თვალსაზრისით არსებული პრობლემების აღმოსაფხვრელად ყველა ზომა მივიღოთ. შესაბამისად, დარწმუნებული ვარ, რომ გართულებები არ გვექნება და იმ მიღწევის შენარჩუნებას შევძლებთ, რომელიც ძალიან მნიშვნელოვანი ნაბიჯია ევროკავშირთან ინტეგრაციის გზაზე“, - განაცხადა ირაკლი კობახიძემ.

გუშინ საქართველოს იუსტიციის მინისტრი ევროკომისიის გაფართოებისა და სამეზობლო პოლიტიკის გენერალური დირექტორატის ხელმძღვანელის მოადგილეს შეხვდა. თეა წულუკიანმა სიმონ მორდუსთან ვიზალიბერალიზაციის პროცესის შენარჩუნების შესახებ ისაუბრა და ამომწურავი ინფორმაცია მიაწოდა, თუ რას აკეთებს საქართველოს მთავრობა უკანონო მიგრაციის შესამცირებლად.

ევროკავშირსა და საქართველოს შორის უვიზო რეჟიმის ამოქმედებიდან 2 წელი გავიდა. უვიზო მიმოსვლა მხოლოდ მოკლევადიან ვიზიტებს გულისხმობს, კერძოდ, 90 დღეს ნებისმიერი 180 დღის განმავლობაში.

ევროკავშირის/შენგენის ქვეყნებში გადაბმულად 90 დღის პერიოდით ყოფნის შემდეგ საქართველოს მოქალაქემ უნდა დატოვოს ამ ქვეყნის ტერიტორია. ევროკავშირის/შენგენის სივრცეში შემდეგი შესვლა შესაძლებელია მომდევნო 90 დღის (ჯამში 180 დღე) პერიოდის გასვლის შემდეგ.

საქართველოს მოქალაქეებს უვიზოდ მოგზაურობა შეუძლიათ შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას (გამონაკლისს წარმოადგენს დიდი ბრიტანეთი და ირლანდია) და ევროკავშირის 4 არაწევრ ქვეყანას.