გოგი წულაია: ფაროსანას წინააღმდეგ ბრძოლაში ფუტკრები განადგურდა

პარტია „თავისუფალი საქართველოს“ ზესტაფონის მერობის კანდიდატმა სურსათის ეროვნული სააგენტოს ოფისში ფაროსანები მიიყვანა.

გოგი წულაიას თქმით, ამ ფორმით მან სოფლის მეურნეობის სამინისტროს უმოქმედობა გააპროტესტა. მისი განმარტებით, მიუხედავად იმისა, რომ ფაროსანას წინააღმდეგ ბრძოლაში მილიონები იხარჯება, შედეგი არ არის და ფაროსანას ნაცვალად ფუტკრები განადგურდა. 

„შარშან 60 მილიონი დაიხარჯა ფაროსანას წინააღმდეგ ბრძოლაში, მიუხედავად ამისა, ფაროსანა თავს კარგად გრძნობს, ფუტკრები და ფრინველები კი განადგურდა. ახლა უნდა იყვნენ სოფლებში ჩასული და წამლავდნენ, მაგრამ ყველა მანქანა აქ დგას და არც ახსოვთ მოსახლეობა. ეს არის დანაშაული და ბოროტია ყველა, ვინც მოსახლეობის ხარჯზე ცოლ-შვილს დასასვენებლად უშვებს. ამიტომ რადგან ესენი არაფერს აკეთებენ და არ მიდიან ფაროსანასთან, ჩვენ დავიჭირეთ და მივიყვანეთ ფაროსანები, რომ აქ მოყვანილი მაინც მოკლან“, - განაცხადა გოგი წულაიამ.

ცნობისთვის, 2019 წელს სახელმწიფო აზიური ფაროსანას გასანადგურებლად და სხვა სოკოვან დაავადებებთან საბრძოლველად 45 მილიონ ლარს დახარჯავს.