ზუგდიდში აგროსაინვესტიციო ბიზნესფორუმი იმართება

ზუგდიდში, დადიანების სასახლის ტერიტორიაზე სამეგრელო-ზემო სვანეთის რეგიონის აგროსაინვესტიციო ბიზნესფორუმი იმართება.

ფორუმი საქართველოს პრემიერმინისტრმა მამუკა ბახტაძემ გახსნა. ღონისძიების  მონაწილეები სახელმწიფოს მიერ განხორციელებულ და მიმდინარე პროექტებს განიხილავენ და რეგიონში აგროსექტორის სხვადასხვა მიმართულების განვითარების საკითხებზე მსჯელობენ.

მამუკა ბახტაძის განმარტებით, სოფლის მეურნეობის ექსპორტმა გასულ წელს 1 მილიარდი შეადგინა. პრემიერმინისტრმა აზიურ ფაროსანასთან ბრძოლის წინააღმდეგ არსებულ გამოწვევებზეც ილაპარაკა.

„ძალიან ბევრი ფერმერი აღმოჩნდა ძალიან დიდი გამოწვევების წინაშე. სამწუხაროდ, არც საქართველოში და არც საერთაშორიო მასშტაბით არ არსებობდა აზიური ფაროსანას წინააღმდეგ ეფექტიანი ბრძოლის წარმატებული გამოცდილება, მაგრამ ჩვენ, ამ პერიოდის განმავლობაში, თქვენთან ერთად ჩამოვყალიბდით ბრძოლის ყველაზე ეფექტიან მექანიზმზე. იცით, რომ წელს ჩვენ 10-ჯერ გავზარდეთ აზიურ ფაროსანასთან ბრძოლის შესაძლებლობები. დარწმუნებული ვარ სწორედ წელს იქნება გარდამტეხი წელი, სადაც თითოეული ჩვენგანი დარწმუნდება, რომ ჩვენ ამ პრობლემას ერთხელ და სამუდამოდ მოვაგვარებთ,“ - განაცხადა მამუკა ბახტაძემ.

პრემიერის თქმით, ეკოლოგიურად სუფთა, ორგანული სოფლის მეურნეობის პროდუქციის მწარმოებლებს უახლოეს მომავალში ეტაპობრივად გადასახადებს გაუუქმებს სახელმწიფო. 

ბახტაძემ განმარტა, რომ პროექტის „დანერგე მომავალი“ ფარგლებში ზედა ზღვარი 2-ჯერ, 100-დან 250 ათას ლარამდე გაიზარდა. რეგიონში დაგეგმილია მევენახეობის სუფსიდირებაც. მიზეზი ფერმერების ხელშეწყობაა.

„ამ პროგრამებით ჩვენ შევძლებთ შევქმნათ ახალი შესაძლებლობები თქვენთვის“, - განაცხადა მამუკა ბახტაძემ. 

საქართველოს პრემიერმინისტრმა სიტყვით გამოსვლისას განაცხადა, რომ სხვადასხვა პროგრამების ფარგლებში რეგიონში გაიხსნა 25 ახალი, გადაიარაღდა 48 მოქმედი საწარმო, რამაც 2,100 სამუშაო ადგილი შექმნა. ბახტაძის თქმით, ინვესტირებული თანხის მოცულობამ 57 მილიონ ლარზე მეტი შეადგინა. აგროკრედიტის პროგრამის ფარგლებში გაიცა 140 მილიონი ლარის ოდენობის სესხი. 506 ჰექტარზე გაშენდა ინტენსიური ბაღები. პრემიერმა ყურადღება გაამახვილა დაზღვევის სისტემის განვითარების აუცილებლობაზეც. 

მამუკა ბახტაძემ სოფლის მეურნეობის განვითარების ფარგლებში ამ სფეროს სპეციალისტების მომზადების საჭიროებაზე ილაპარაკა. ხაზი გაუსვა რეგიონალური განვითარებისაც. 

ორდღიან ბიზნესფორუმში სამეგრელო-ზემოსვანეთის რეგიონის ბიზნესსექტორის 250-მდე წარმომადგენელი მონაწილეობს.