წულუკიანი მაჩალიკაშვილის საქმეზე: სუს-მა პრაქტიკულად დანაშაული აღკვეთა

საქართველოს იუსტიციის მინისტრმა თეა წულუკიანმა დღეს გადაცემა „ქრონიკის“ პირდაპირ ეთერში განაცხადა, რომ მალხაზ მაჩალიკაშვილის საქმის მასალებს არ იცნობს, თუმცა მიიჩნევს, რომ სუს-მა პრაქტიკულად დანაშაული აღკვეთა. 

„მე საქმის მასალებს არ ვიცნობ. მე ვიცნობ მხოლოდ ჩანაწერს როგორც ყველანი. არც იმ ენას არ ვფლობ, რომელიც სხვათაშორის ძალიან ლამაზია. პირველ მოვუსმინე ასე ვრცლად, თარგმანი ვნახე მხოლოდ. ვიცნობ მხოლოდ ზეპირ განცხადებებს, ორი მხარე რასაც ამბობს. ერთადერთი რაც შემიძლია ვთქვა, კიდე ერთხელ მადლობა ვუთხრა სუს-ის თანამშრომლებს, ვინც პრაქტიკულად ეს დანაშაული აღკვეთეს“ - განაცხადა თეა წულუკიანმა. 

იუსტიციის მინისტრმა დანაშაულის კვალიფიკაციაზეც ისაუბრა: „კვალიფიკაციას რაც შეეხება, იყო ეს შურისძიების მოტივით ჩადენილი ან მომზადება დანაშაულის შურისძიების მიზნით, ჯდება ეს ტერორიზმის შესაბამის მუხლებში, ეს მე არ ვიცი და არ უნდა ვიცოდე. იმიტომ რომ ეს საქმის მასალებიდან არის გამომდინარე. რომც იყოს საწყისი კვალიფიკაცია მხოლოდ იმ მტკიცებულებებიდან გამომდინარე რაც სუს-ს დღეს ხელთ აქვს, თუ ახალი მტკიცებულებები გაჩნდება, შეიძლება ან კვალიფიკაცია შეიცვალოს ან დარჩეს იგივე“ განაცხადა წულუკიანმა. 

იუსტიციის მინისტრის შეფასებით, ნაადრევი შეფასებების გაკეთება მაჩალიკაშვილის საქმეზე დღეს არის წმინდა წყლის სპეკულაცია: „მთავარია ის რომ დანაშაულის პრევენცია მოხდა. მინდა წარმატება ვუსურვო სუს-ს, რადგან სტაბილურობა და დაცულობის განცდა ჩვენს საზოგადოებაში არის ფუნდამენტი განვითარების“.

2019 წლის 10 მაისს სუს-ში მალხაზ მაჩალიკაშვილის დაკითხვა დასრულდა.  

როგორც მაჩალიკაშვილის ადვოკატმა, მარიამ კუბლაშვილმა ჟურნალისტებთან საუბრისას განაცხადა, დაკითხვა მშვიდ ვითარებაში მიმდინარეობდა. მისივე განმარტებით, ექსპერტიზისთვის მალხაზ მაჩალიკაშვილის ხმის ნიმუში აიღეს.

7 მაისს სახელმწიფო უსაფრთხოების სამსახურმა ფარული აუდიოჩანაწერი გაასაჯაროვა, რომელშიც გამოძიების მტკიცებით, მალახაზ მაჩალიკაშვილი თავის ძმისშვილს ტერორისტული აქტის მომზადებას ავალებს. ამ საქმეზე მალხაზ მაჩალიკაშვილის ძმისშვილი დაკითხეს, თავად მაჩალიკაშვილი კი ჩანაწერს ფაბრიკაციას უწოდებს.

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. 

თემირლან მაჩალიკაშვილი საავადმყოფოში 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა,რომელშიც  ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ. მათ არაერთხელ გამართეს საპროტესტო აქცია.