ბრიუსელში მინისტერიალამდე საქართველოს მხარდამჭერი განცხადებები გაკეთდა

ბრიუსელში მინისტერიალი იწყება. ევროკავშირი ექვს პარტნიორ ქვეყანასთან ერთად განვლილ ათწლეულს შეაჯამებს და სამომავლო გეგმებზე იმსჯელებს.

ბრიუსელში შეკრებილმა ევროპელმა პოლიტიკოსებმა საქართველოს შესახებ განცხადებები გააკეთეს. ლიეტუვის საგარეო საქმეთა მინისტრის, ლინას ლინკევიჩიუსის განცხადებით, ეჭვი არ ეპარება, რომ "აღმოსავლეთ პარტნიორობის" მონაწილე ქვეყნებს ევროპული პერსპექტივები აქვთ. მისი თქმით, გაწევრიანება რთული პროცესი იქნება, თუმცა "აღმოსავლეთ პარტნიორობის" ფარგლებში განხორციელებულ პროექტებსა და წინადადებებს "ერთი მიზნისკენ მივყავართ და ის ევროკავშირს უკავშირდება".

ლინკევიჩიუსის განცხადებით, ბევრი პარტნიორი მათი ევროპული არჩევანის გამო ზეწოლას, მათ შორის სამხედრო ზეწოლას განიცდის. აქედან გამომდინარე კი იგი მიიჩნევს, რომ მნიშვნელოვანია დაიცვან პარტნიორების არჩევანი და გადაწყვეტილებები. 

"აღმოსავლეთ პარტნიორობის" მონაწილე ექვსივე ქვეყანამ თავი კომფორტულად უნდა იგრძნოს. იმ ქვეყნებს, რომლებსაც თანამშრომლობის გაღრმავება სურთ, ამის შესაძლებლობა უნდა მიეცეთ", - განაცხადა ლიეტუვის საგარეო საქმეთა მინისტრმა.

რუმინეთის საგარეო საქმეთა მინისტრის, თეოდორ მალენსანუს განცხადებით, საქართველო ერთ-ერთია იმ ქვეყნებს შორის, რომელმაც მოკლე დროში შეძლო ძალიან მნიშვნელოვანი რეფორმების გატარება:

"საქართველო პრაქტიკულად აკმაყოფილებს ევროკავშირის წევრობის კრიტერიუმების უმრავლესობას. ჩვენ ველით ამ პროცესის დაწყების წახალისებას. დარწმუნებული ვარ, რომ საქართველო იქნება ერთ-ერთი პირველი ქვეყანა, რომელიც ევროკავშირს შეუერთდება. გვსურს გავაგზავნოთ ძალიან სერიოზული სიგნალი, რომ ვაგრძელებთ მუშაობას 2020 წლისთვის 20 მიზნის მისაღწევად. აუცილებლად უნდა ვიფიქროთ, აღმოსავლეთ პარტნიორობის მომავალზე. ძალიან ბედნიერი ვარ, რომ 9 მაისს ევროკავშირის ლიდერების მიერ მიღებულ განცხადებაში, ძალიან მკვეთრი ჩანაწერი იყო აღმოსავლეთ პარტნიორობაზე და ამ პარტნიორობის პრიორიტეტულობაზე ორგანიზაციისთვის", - განაცხადა თეოდორ მალენსანუმ. 

ესტონეთის საგარეო საქმეთა მინისტრი ურმას რეინსალუ კი აცხადებს, რომ ევროპამ მტკიცედ უნდა გააგრძელოს "აღმოსავლეთ პარტნიორობის" პროექტი. მისი თქმით, ევროკავშირმა რეაგირება უნდა მოახდინოს რუსეთის მხრიდან უკრაინის ოკუპირებულ ტერიტორიებზე პასპორტების გაცემასთან დაკავშირებით და კონკრეტულ პირებს სანქციები უნდა დაუწესდეთ.

„აღმოსავლეთ პარტნიორობის“ იუბილესთან დაკავშირებული მინისტერიალის გახსნამდე, ევროკომისარმა იოჰანეს ჰანმა ჟურნალისტებთან განაცხადა, რომ საქართველოს უვიზო რეჟიმთან დაკავშირებით ყველაფერი კარგად მიდის.

ბრიუსელში უკვე გაემგზავრა საქართველოს პრემიერმინისტრი მამუკა ბახტაძე. 

ბრიუსელში აღმოსავლეთ პარტნიორობის ინიციატივის 10 წლის იუბილეს აღნიშნავენ.სპეციალურად ამ თარიღთან დაკავშირებით მინისტერიალი გაიმართება.

ექვს პარტნიორ ქვეყანასთან ერთად ევროკავშირი განვლილ ათწლეულს შეაჯამებს და სამომავლო გეგმებზე იმსჯელებს. ბრიუსელს საქართველოს პრემიერმინისტრიც ეწვევა. მამუკა ბახტაძე ევროპული საბჭოს პრეზიდენტს შეხვდება. მინისტერიალში საგარეო საქმეთა მინისტრი დავით ზალკალიანი მიიღებს მონაწილეობას.