ირაკლი ჩიქოვანი: ნაციონალური მოძრაობა დესტრუქციაზეა გადასული

"ნაციონალური მოძრაობა" გადასულია პირდაპირ დესტრუქციაზე, იმ პირობებში, როდესაც მათ იციან, რომ პირწმინდად აქვთ წაგებული არჩევნები", - ამის შესახებ "ქართული ოცნების" ზუგდიდის მერობის კანდიდატის, გიორგი შენგელიას შტაბის ხელმძღვანელმა, ირაკლი ჩიქოვანვა ბრიფინგზე განაცხადა.

ირაკლი ჩიქოვანის თქმით, "ნაციონალური მოძრაობა" ცდილობს სრული დისკრედიტაცია მოახდინოს საარჩევნო პროცესის.

"კიდევ ერთხელ მივმართავ საზოგადოებას და აბსოლუტურად ყველა უწყებას, მაქსიმალური მოთმინებით მოეკიდონ ყველა ამ პროვოკაციას, დარჩა მხოლოდ რამდენიმე დღე ჩვენს გამარჯვებამდე, რომ გავაფორმოთ დამაჯერებელი გამარჯვება გიორგი შენგელიასი და "ქართული ოცნების". აქვე მინდა ხაზი გავუსვა, რომ ჩვენ აქტიურად ვმუშაობთ საერთაშორისო თანამეგობრობასთან, გვაქვს უშუალო პირდაპირი კავშირი, როგორც აქედან, ასევე ცენტრალური შტაბიდან და მათ ვაწვდით აბსოლუტურად ყველა ინფორმაციას, რომ თავიდან ავიცილოთ ასეთი ექსცესები. ყველა ნათლად ხედავს, რომ ყველა მოქმედება არის დესტრუქციული და "ნაციონალური მოძრაობა" არ მალავს, რომ ისინი გათვლას კი არ აკეთებენ ზუგდიდელებზე, არამედ იმ ადამიანებზე, რომლის ჩამოყვანასაც ისინი გეგმავენ. თვითონაც არ მალავენ, რომ რამდენიმე ათასი ადამიანის ჩამოყვანა სურთ ზუგდიდში", - განაცხადა ირაკლი ჩიქოვანმა.

ჩიქოვანმა ზუგდიდელებსაც მიმართა და მოუწოდა სიმშვიდის შენარჩუნებისკენ, ასევე მოუწოდა ყველა სამართალდარღვევასთან დაკავშირებით მიმართონ სამართალდამცველებს.

"სამართალდამცველები მზად არიან იმისთვის, რომ მოახდინონ მყისიერი რეაგირება ყველა დარღვევაზე და არა აქვს მნიშვნელობა ვინ ჩაიდენს და ვისი მომხრე იქნება ის. ჩვენი ინტერესია ზუგდიდში არჩევნები მშვიდად ჩატარდეს და ზუგდიდი არ იყოს საცდელი პოლიგონი და პოლიტიკური ბატალიების ეპიცენტრი, როგორსაც "ნაციონალური მოძრაობა" ცდილობს წარმოაჩინოს", - განაცხადა ირაკლი ჩიქოვანმა.

ბრიფინგზე ჩიქოვანმა ყურადღება გაამახვილა საარჩევნო მზადებასთან დაკავშირებითაც და თქვა რომ ყველა წინასწარი მონაცემით, გიორგი შენგელია დამაჯერებლად იმარჯვებს. 

"19 მაისს ჩვენი აქტივისტები, ჩვენი მომხრეები იქნებიან მობილიზებული იმისთვის, რომ ყველა ჩვენი ამომრჩეველი, მათგან გვაქვს უკვე თანხმობა რომ მობრძანდებიან არჩევნებზე და მხარს დაგვიჭერენ, ისინი მოვლენ არჩევნებზე, მათ ექნებათ სპეციალური სიები, ეს სიები უზრუნველყოფს იმას, რომ ჩვენ ზუსტად შევძლოთ აღრიცხვა ყველა ჩვენი ამომრჩევლის, რომელიც მოვა ადგილზე. ეს არის ძალიან მნიშვნელოვანი პროცესი, ასევე ჩვენ გვექნება ვიდეოჩაწერის საშუალებები, რათა თავიდან ავიცილოთ ყველა პროვოკაცია, რომელიც შესაძლოა უბნებზე მოხდეს. ასევე მივმართავ კომისიებში ჩვენს წევრებს, მიუხედავად დაძაბული ვითარებისა შიგნით კომისიის ფარგლებში, მათაც გამოიჩინონ მაქსიმალური სიმშვიდე გამოიყენონ ყველა პროცედურა და პროცედურის მიხედვით ჩაატარონ საარჩევნო დღე. ჩვენ მზად ვართ არჩევნებისთვის და დარწმუნებული ვართ რომ 19 მაისს ვიზეიმებთ გამარჯვებას", - განაცხადა ირაკლი ჩიქოვანმა.

დღეს ზუგდიდის საოლქო საარჩევნო კომისიაში ხმაური იყო. სხდომამდე კომისიის წევრებსა და ოპოზიციას შორის დაპირისპირება მოხდა. კომისიამ არ დააკმაყოფილა მოთხოვნა, დღის წესრიგში შეეტანათ და განეხილათ მათი მოთხოვნა, სამაგიდო სიების და რეგისტრატორის ბეჭდების, მათივე მტკიცებით დაუცველ უბნებზე გადატანაზე პასუხისმგებელი პირების საკითხზე მსჯელობის, და ბრალეულობის გამოკვეთის შემთხვევაში, მათ პასუხისგებაში მიცემის შესახებ. სხდომაზე  სპეციალური სიები მიიღეს.

კომისიაში განვითარებულ მოვლენებზე განცხადება გააკეთა ცესკომ და "ქართულმა ოცნებამ". 

ზუგდიდში დაძაბულობა გუშინაც იყო, როდესაც ნაციონალების ლიდერებმა ზუგდიდის საკრებულოს შენობაში შეჭრა სცადეს.

საქართველოში შუალედური არჩევნები 19 მაისს გაიმართება.