თალაკვაძე: ნაციონალურ მოძრაობას ზუგდიდში ზონდერები ჰყავს მობილიზებული

ჩვენ ხელთ არსებული ყველა მონაცემებით, ჩვენს კანდიდატს გეგა შენგელიას მაღალი აქტივობის შემთხვევაში აქვს პირველივე ტურში გამარჯვების შესაძლებლობა, - ამის შესახებ ზუგდიდში შუალედური არჩევნების წინ შექმნილ ვითარებასთან დაკავშირებით გამართულ სპეციალურ ბრიფინგზე „ქართული ოცნების“ წევრმა, დეპუტატმა არჩილ თალაკვაძემ განაცხადა.

„არჩევნებამდე დარჩა ორი დღე და ოპოზიციის მთავარ სამიზნედ ამ შუალედურ არჩევნებში არის შერჩეული ზუგდიდი. ჩვენ ხელთ არსებული ყველა მონაცემებით, ჩვენს კანდიდატს გეგა შენგელიას მაღალი აქტივობის შემთხვევაში აქვს პირველივე ტურში გამარჯვების შესაძლებლობა. 

ჩვენი ინფორმაციით, ზუსტად ანალოგიური მონაცემები აქვს „ნაციონალურ მოძრაობასაც“ და სწორედ ამიტომ მათ ოფისში ბოლო დღეებში იმატა დაძაბულობამ. ისინი გეგმავენ გაყალბებული მონაცემებით, პროპაგანდის გზით, რეალობის შეცვლით და გადაკეთებით წინასწარ შეამზადონ ფონი და საზოგადოება დაარწმუნონ იმაში, თითქოს მათ კანდიდატს რეალურად მაღალი მხარდაჭერა აქვს“, - განაცხადა თალაკვაძემ.

მისივე თქმით, „ნაციონალურ მოძრაობას“ ზუგდიდში მობილიზებული ჰყავს ბევრი აქტივისტი და ისინი კიდევ უფრო მეტი ადამიანის ჩაყვანას გეგმავენ, ამ ადამიანების რეალური ფუნქცია კი არჩევნებზე ზონდერობა იქნება.

„ზოგიერთი მათგანი იქნება დამკვირვებლის სტატუსით, ზოგიერთი კი ახლად შექმნილი მედიასაშუალების სტატუსით. ისინი ეცდებიან, შექმნან დაძაბულობა და ჩრდილი მიაყენონ ამ შუალედურ არჩევნებს. ამას ადასტურებს ისიც, რომ მათი არაერთი ლიდერი პირდაპირ აცხადებს, რომ არჩევნების გზით შეუძლებელია ცვლილებების მიღწევა და ისინი, ფაქტობრივად, პირდაპირ მოუწოდებენ მხარდამჭერებს არეულობისა და დესტაბილიზაციისკენ, ამას ემსახურებოდა საარჩევნო ადმინისტრაციაზე მიტანილი იერიშიც. რეალურად მათი მიზანია პროცესის ჩაშლა, ვინაიდან მათაც აქვთ ხელთ მონაცემები, რომელთა მიხედვითაც გეგა შენგელია მაღალი აქტივობის შემთხვევაში პირველივე ტურში გაიმარჯვებს. 

შექმნილი ვითარებიდან გამომდინარე, გვსურს კიდევ ერთხელ მივმართოთ საერთაშორისო ორგანიზაციებს და დიპლომატიურ კორპუსს, განსაკუთრებული ყურადღება მიაქციონ ზუგდიდში წინასაარჩევნო კამპანიის პროცესს და გააკეთონ შეფასებები, რომელიც გამორიცხავს სპეკულაციებს არჩევნების შედეგებთან დაკავშირებით და შეამცირებს იმ დაძაბულობას, რომელსაც „ნაციონალური მოძრაობა“ ქმნის“, - განაცხადა თალაკვაძემ.

16 მაისს ზუგდიდის საოლქო საარჩევნო კომისიაში ხმაური იყო. სხდომამდე კომისიის წევრებსა და ოპოზიციას შორის დაპირისპირება მოხდა. კომისიამ არ დააკმაყოფილა მოთხოვნა, დღის წესრიგში შეეტანათ და განეხილათ მათი მოთხოვნა, სამაგიდო სიების და რეგისტრატორის ბეჭდების, მათივე მტკიცებით დაუცველ უბნებზე გადატანაზე პასუხისმგებელი პირების საკითხზე მსჯელობის, და ბრალეულობის გამოკვეთის შემთხვევაში, მათ პასუხისგებაში მიცემის შესახებ. სხდომაზე  სპეციალური სიები მიიღეს.

კომისიაში განვითარებულ მოვლენებზე განცხადება გააკეთა ცესკომ და "ქართულმა ოცნებამ". 

ზუგდიდში დაძაბულობა 15 მაისსაც იყო, როდესაც ნაციონალების ლიდერებმა ზუგდიდის საკრებულოს შენობაში შეჭრა სცადეს.

საქართველოში შუალედური არჩევნები 19 მაისს გაიმართება.