კობახიძემ არჩევნების პირველადი მონაცემები წარადგინა

„ქართული ოცნების“ აღმასრულებელმა მდივანმა ირაკლი კობახიძემ მედიას არჩევნების პირველადი შედეგები გააცნო. 

პარლამენტის თავმჯდომარის განცხადებით, ზუგდიდის, მარნეულის, ჭიათურის ხულოს ოლქებში პირველივე ტურში იმარჯვებენ მმართველი პარტიის კანდიდატები. 

რაც შეეხება მთაწმინდას, აქაც დიდი უპირატესობით იგებს ლადო კახაძე, თუმცა მეორე ტურის ალბათობა არსებობს. 

კობახიძემ მმართველი გუნდის შედეგს შთამბეჭდავს უწოდებს და აცხადებს, რომ საბოლოო ჯამში „ქართული ოცნება“ სავარაუდოდ, 60%-ით მოიგებს.

„გვინდა გაგაცნოთ პირველადი მონაცემები, შემოსულია ოქმის მონაცემები ანუ საუბარია უკვე ოფიციალურ მონაცემებზე, იმ დათვლაზე, რომელიც წარმოებს საარჩევნო უბნებზე.

 წინასწარი მონაცემების განზოგადება არის უკვე შესაძლებელი ოლქების უმეტესობაში და ამ ეტაპზე შეიძლება ითქვას, რომ დიდი უპირატესობით პირველივე ტურში იგებენ ჩვენი კანდიდატები არჩევნებს ზუგდიდის, მარნეულის, ჭიათურის ოლქებში.

 რაც შეეხება მთაწმინდის საარჩევნო ოლქს, აქაც დიდი უპირატესობით იგებს „ქართული ოცნების“ კანდიდატი ლადო კახაძე, თუმცა არის ალბათობა მეორე ტურის შალვა შავგულიძესთან, ეს არის არსებული მონაცემები.

 რაც შეეხება ზესტაფონს ჯერჯერობით არ გვაქვს იმ რაოდენობის ოლქები,რომ გვქონდეს განზოგადების საშუალება, ასეთია შედეგები. რაც შეეხება მცირე ოლქებს,  ს ადაც საკრებულოს წევრთა არჩევნები ტარდება ,ეს არის შეგახსენებთ ოზურგეთი, ტყიბული, ჭიათურა, წყალტუბო, ადიგენი, საგარეჯო, ზესტაფონი, ახმეტა, პანკისის ხეობაშიც ტარდება არჩევნები, ყველა ამ უბანში დამაჯერებლად იმარჯვებენ „ქართლი ოცნების“ კანდიდატები.

 პირველ რიგში, მინდა მადლობა გადავუხადო ამომრჩეველს აქტიურობისათვის. იყო ძალიან აქტიური არჩევნები, ძალიან მაღალი პასუხისმგებლობა გამოავლინეს ჩვენმა მოქალაქეებმა კიდევ ერთხელ და რა თქმა უნდა განსაკუთრებული მადლობა მინდა გადავუხადო ქართული ამომრჩეველს, რომლებმაც მხარი დაუჭირეს ჩვენს კანდიდატებს საქართველოში.

 საქართველოში გრძელდება დემოკრატიული არჩევნების ტრადიცია. მიუხედავად იმისა, რომ იყო გარკვეული ექსცესები, გარკვეული პროვოკაციები, მცდელობა, ხელოვნურად შეტანილიყო არეულობა საარჩევნო პროცესში, ჩვენ შევძელით ეს არჩევნები ჩაგვეტარებინა სათანადო გარემოში, რაც მთავარია სამართლიანი არჩევნები ჩაგვეტარებინა და ამის შედეგია „ ქართული ოცნების“  შთამბეჭდავი გამარჯვება ამ არჩევნებში“, - თქვა ირაკლი კობახიძემ. 

საარჩევნო უბნებზე კენჭისყრის პროცედურა დასრულდა.