ვოლსკი: ზელენსკისთან ურთიერთობა უფრო პრიორიტეტულია, ვიდრე მისი გადაწყვეტილების შეფასება

უკრაინის პრეზიდენტის, ვოლოდიმირ ზელენსკის მიერ მიხეილ სააკაშვილისთვის უკრაინის მოქალაქეობის აღდგენას საქართველოში გამოეხმაურნენ.

როგორც სააკაშვილის თანაგუნდელმა, დეპუტატმა ნიკა მელიამ განაცხადა, სააკაშვილისთვის მოქალაქეობის დაბრუნებით სამართლიანობა აღდგა. მელიას განცხადებით იგივე მოხდება საქართველოშიც:

"ყველგან, ყოველთვის, ყველა სახელმწიფოში, ყველა პერიოდში აღმდგარა სამართლიანობა. გახსოვთ, როგორ ჩამოერთვა სააკაშვილს მოქალაქეობა - ფიზიკური ძალადობით გააძევეს უკრაინიდან და დღეს დავინახეთ ის, რომ უკრაინის ახალმა პრეზიდენტმა მას დაუბრუნა მოქალაქეობა.

არავის ჰქონდეს იმედი, ვგულისხმობ ივანიშვილს, რომ იგი გაიზიარებს განსხვავებულ ბედს, ვიდრე გაიზიარა პოროშენკომ", - თქვა მელიამ.

სააკაშვილისთვის მოქალაქეობის აღდგენის შესახებ კომენტარი გააკეთა უმრავლესობის წევრმა გია ვოლსკიმ. მისი განცხადებით, საქართველოსთვის უკრაინის პრეზიდენტთან ურთიერთობა გაცილებით უფრო პრიორიტეტულია, ვიდრე მისი გადაწყვეტილების შეფასება:

"მგონია, რომ საქართველოს მოქალაქეობასთან ამ ნაბიჯს კავშირი არ აქვს, ვინაიდან საქართველოს მოქალაქეობა მისთვის არავის ჩამოურთმევია. მან თვითონ თქვა უარი უკრაინის მოქალაქეობის სანაცვლოდ, იმ თანამდებობის სანაცვლოდ, რაც შესთავაზეს", - თქვა ვოლსკიმ და დასძინა, რომ უკრაინა საქართველოს მოკავშირე ქვეყანაა.

საქართველოს ყოფილ პრეზიდენტსა და ოდესის ოლქის ყოფილ გუბერნატორს უკრაინის პრეზიდენტმა ვოლოდიმირ ზელენსკიმ ქვეყნის მოქალაქეობა დღეს აღუდგინა. სააკაშვილი კიევში ჩასვლას ხვალისთვის გეგმავს.

2017 წლის ივლისში უკრაინის პრეზიდენტმა პეტრო პოროშენკომ სააკაშვილს უკრაინის მოქალაქეობა ჩამოართვა, იმ მიზეზით, რომ მოქალაქეობის მიღებაზე განაცხადის შეტანის დროს სააკაშვილმა სახელმწიფო ორგანოებს წარსულში ნასამართლეობის შესახებ არასწორი ინფორმაცია მიაწოდა. 2018 წლის თებერვალში უკრაინის ხელისუფლებამ სააკაშვილი პოლონეთში გააძევა, საიდანაც მან 2017 წლის შემოდგომაზე უკრაინაში უკანონოდ შეაღწია. უკრაინის სასაზღვრო სამსახურმა სააკაშვილს 2021 წლამდე ქვეყანაში შესვლა აუკრძალა. მიხეილ სააკაშვილი აპატრიდი ანუ მოქალაქეობის არმქონე პირი გახდა.

საქართველოს ყოფილ პრეზიდენტს, რომელმაც საქართველოს მოქალაქეობაზე უარი თქვა, ხოლო უკრაინის მოქალაქეობა გაუუქმეს, მეუღლის სამშობლომ, ნიდერლანდებმა ცხოვრების და მუშაობის უფლების დამადასტურებელი ცნობა მისცა.

ყოფილ პრეზიდენტ მიხეილ სააკაშვილს რამდენიმე სისხლის სამართლის საქმეზე საქართველოს პროკურატურა ედავება და მის ექსტრადიციას ითხოვს.