„ქართული ოცნების“ გადაწყვეტილებით ნანა კოსტავამ თანამდებობა დატოვა

ქუთაისის მუნიციპალიტეტის საკრებულოს ფრაქცია „ ქართული ოცნება-კონსერვატორების“ წევრებისა და პოლიტიკური გუნდის გადაწყვეტილებით, ნანა კოსტავამ დაკავებული თანამდებობა დატოვა. 

ფრაქცია „ქართული ოცნება-კონსერვატორების“ თავმჯდომარის გადადგომის გადაწყვეტილება ფრაქციის წევრებმა დღეს გამართულ სხდომაზე მიიღეს. ფრაქციას დღეიდან ძელქვიანის მაჟორიტარი დეპუტატი ნიკოლოზ ჩეჩელაშვილი უხელმძღვანელებს.

მანამდე მოქალაქეებმა და არასამთავრობო ორგანიზაციებმა დეპუტატის მიერ სიძულვილის ენით დაწერილი განცხადება გააპროტესტეს და მისი თანამდებობიდან გადადგომა მოითხოვეს. 

საქმე ეხება ნანა კოსტავას მიერ სოციალურ ქსელში გამოქვეყნებულ პოსტს. „კაი დღეში ხარ ახლა, იცინე“, -  ასეთი აღწერით გააზიარა 28 მაისს ნანა კოსტავამ Facebook-ზე სოციალური მედიის მენეჯერის, სალომე ბარკერის 2018 წლის ერთ-ერთი ვიდეო. მოგვიანებით მან პოსტი წაშალა. ამის შემდეგ მან კიდევ ერთი პოსტი გამოაქვეყნა, რომელშიც მანამდე დაწერილი სტატუსის გამო ბოდიში  მოიხადა და აღნიშნა, რომ არ იცოდა, თუ სალომე ბარკერის და არის 16 წლის გოგო, რომელიც ლაგოდეხის ნაკრძალში, მდინარეში დაიღუპა.

მომხდარის გამო საკრებულოს წევრს ქუთაისში მედიასაშუალებებმა ბოიკოტი გამოუცხადეს.