კარასინი: საქართველო გეოპოლიტიკური წინააღმდეგობის პლაცდარმად არ უნდა გადაიქცეს

რუსეთის საგარეო საქმეთა მინისტრის მოადგილე გრიგორი კარასინი ნატო-საქართველოს ურთიერთობების გაღრმავებით შეშფოთებულია. ამის შესახებ „ქრონიკას“ რუსმა დიპლომატმა ქართველ კოლეგასთან ზურაბ აბაშიძესთან შეხვედრის დაწყებამდე, პრაღაში განუცხადა. 

მისი თქმით, ერთია, რას ამბობენ ნატოში, ბრიუსელსა თუ ვაშინგტონში, მაგრამ მნიშვნელოვანია, რომ საქართველო გეოპოლიტიკური წინააღმდეგობის პლაცდარმად არ გადაიქცეს.

რუსი დიპლომატის განცხადებით, „ძალიან მნიშვნელოვანია, ამის თავიდან აცილება მოხდეს; ეს სიტყვათა შეთანხმება ხშირად ისმის, მაგრამ გასაგები უნდა იყოს ამის მძიმე ემოციური და ნეგატიური ფონი; ეს თავისებური წითელი ხაზია“.

„რაც უფრო ვაღრმავებთ საქართველო და რუსეთი სავაჭრო-ეკონომიკურ, სატრანსპორტო და კულტურის სფეროში კავშირებს, მით უფრო მეტად ვხედავთ ჩვენი ამერიკელი კოლეგების, ნატოს ხელმძღვანელობის აქტიურობას.

ისინი გეგმავენ და ატარებენ საქართველოს ტერიტორიაზე მასშტაბურ წვრთნებს. ეს წვრთნები ტარდება იმისათვის, რომ დაჩქარდეს თქვენი ქვეყნის ნატოში გაწევრიანება. მიმდინარეობს აქტიური მზადება საქართველოს ნატოში გასაწევრიანებლად. კეთდება უამრავი განცხადება ნატოდან, საქართველოს შესახებ სხვადასხვა ქვეყნები კანონებსაც იღებენ.

ერთია, თუ რას ამბობენ ნატოში, რას მიიჩნევენ ნატოში, რას აცხადებენ ბრიუსელსა თუ ვაშინგტონში, მაგრამ მნიშვნელოვანია, რომ საქართველო გეოპოლიტიკური წინააღმდეგობის პლაცდარმად არ გადაიქცეს.

ძალიან მნიშვნელოვანია, ამის თავიდან აცილება მოხდეს. ეს სიტყვათა შეთანხმება ხშირად ისმის, მაგრამ გასაგები უნდა იყოს ამის მძიმე ემოციური და ნეგატიური ფონი. ეს თავისებური წითელი ხაზია. პრაღაში ამაზე არ ვისაუბრებთ. მე ამ პრობლემაზე ვმუშაობ და ემოციებს გადმოგცემთ. დღეს ვისაუბრებთ პრაქტიკულ საკითხებზე. ვიმსჯელებთ სატრანსპორტო კომუნიკაციებზე, სავაჭრო-ეკონომიკურ კავშირებზე.

შევაჯამებთ 2019 წლის პირველ ნაწილს. გვაქვს კონკრეტული მონაცემები. ეს მონაცემები ცხადყოფს, რომ იზრდება ქართული პროდუქციის წილი რუსულ ბაზარზე.

იზრდება ორ ქვეყანას შორის სავაჭრო ბრუნვა. ძალიან ბევრი რუსი ტურისტი მოგზაურობს საქართველოში. გასულ წელს იყო მილიონ ნახევარი რუსი ტურისტი საქართველოში და ამ წლის მონაცემები შარშანდელთან შედარებით კიდევ უფრო გაზრდილია. გვაქვს კულტურული კონტაქტები.

ურთიერთობების ნორმალიზაციის მიზნით გასული წლების ერთობლივი მუშაობის შედეგია ის, რომ ჩვენ შევძელით რუსეთ-საქართველოს ურთიერთობები ჩიხიდან გამოგვეყვანა. შევძელით დაგვეძლია ერთმანეთის ემოციური აუტანლობა. ეს უკვე უკან დავტოვეთ და ძალიან მნიშვნელოვანია იმისათვის, რომ წავიდეთ წინ და გადავჭრათ სხვა ამოცანები“, - განაცხადა გრიგორი კარასინმა. 

ანაკლიის პორტთან დაკავშირებით რადიო თავისუფლების შეკითვის საპასუხოდ რუსეთის საგარეო საქმეთა მინისტრის მოადგილე გრიგორი კარასინი აცხადებს, რომ რუსეთს არ მოსწონს აშშ-ის სახელმწიფო მდივნის, მაიკ პომპეოს განცხადების ტონი ანაკლიის ღრმაწყლოვანი პორტის შესახებ. 

„ჩვენ დაინტერესებული ვართ საქართველოს, მისი ეკონომიკის, სოციალური, კულტურული და სხვა სფეროების განვითარებით.

საქართველომ უნდა გადაწყვიტოს, რა მოუხერხოს ანაკლიის პორტს. მაგრამ რაც რუსეთისა და ჩინეთის მიმართ ითქვა, სულაც არ არის ის ტონი, რაც ჩვენ გვაწყობს“, - განაცხადა გრიგორი კარასინმა.

27 თებერვალს პრაღაში აბაშიძე-კარასინის ფორმატში წლის პირველი შეხვედრა გაიმართა. შეხვედრის დაწყებამდე რუსეთის საგარეო საქმეთა მინისტრის მოადგილე გრიგორი კარასინმა განაცხადა, რომ ქართველი კოლეგები უსიამოვნო მოულოდნელობებს უნდა ელოდონ, რაც აღქმული იყო, როგორც მუქარა. ამ განცხადებაზე, პრაღის ფორმატსა და იმის შესახებ თუ რა უნდა ჩვენს მეზობელ რუსეთს, გადაცემა „იმედი LIVE“-ს წამყვანებს პრემიერმინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე ესაუბრა.

პრაღის ფორმატი 2012 წლის ბოლოს შეიქმნა.