კარასინი: რუსეთს საქართველოს ნატოში გაწევრიანება არ სურს

რუსეთს არ სურს, რომ მისი მეზობელი საქართველო ნატოს წევრი იყოს.

ამის შესახებ რუსეთის საგარეო საქმეთა მინისტრის მოადგილე გრიგორი კარასინმა რუსეთთან ურთიერთობების საკითხებში საქართველოს პრემიერმინისტრის სპეციალურ წარმომადგენელთან ზურაბ აბაშიძესთან შეხვედრის შემდეგ, პრაღაში განაცხადა.  

კარასინი აბაშიძესთან შეხვედრის შეხვედრის შემდეგ აცხადებს, რომ პრაღაში ამ თემაზე პოზიცია დააფიქსირა.

„ეს არის საფრთხე არა იმდენად რუსეთისთვის, არამედ რუსეთ-საქართველოს ურთიერთობებისთვის. ერთია როდესაც გყავს მეზობელი, კეთილი მეზობელი, რომელსაც აქვს პრობლემები და ჩვენს ურთიერთობებში არის პრობლემები, მაგრამ სხვა საქმეა, როდესაც შენი მეზობელი ჩრდილოატლანტიკური ალიანსის წევრია.

ეს სრულიად განსხვავებული ხარისხია. ჩვენ ყოველთვის ვამბობთ, რომ ეს ძალიან სახიფათოა ჩვენი ურთიერთობებისათვის. რას გავაკეთებთ? დიპლომატია არის დარწმუნების და შეთანხმების ხელოვნება. ჩვენ მაინც გვაქვს იმედი, რომ ურთიერთობების განვითარება დაგვეხმარება თანაცხოვრება შევძლოთ და ვიმეგობროთ სხვა ფორმებით და არა ბრიუსელიდან და ნატოდან. ჩვენი სუვერენული უფლებაა, განვავითაროთ ურთიერთობები მეზობელთან და წინასწარ გავაფრთხილოთ, თუ რას არ ვისურვებდით“, - თქვა რუსმა დიპლომატმა.

ნატო-საქართველოს ურთიერთობები 1992 წლიდან იწყება, როდესაც საქართველო შეუერთდა ნატოს ჩრდილოატლანტიკური თანამშრომლობის საბჭოს (NACC), რომელიც 1997 წელს შეიცვალა ევროატლანტიკური პარტნიორობის საბჭოთი (EAPC - Euro-Atlantic Partnership Council).

აღნიშნულ ფორმატში, რომელშიც პარტნიორი და წევრი ქვეყნები სხვადასხვა მნიშვნელოვან და აქტუალურ საკითხებს განიხილავენ, საქართველო დღემდე აქტიურად არის ჩართული.

2014 წლის უელსის სამიტზე მოკავშირეებმა მიიღეს გადაწყვეტილება საქართველოსთან არსებითი პაკეტის შემუშავების შესახებ, რომლის მთავარი მიზანია ნატო-სთან თავსებადობის ამაღლება, თავდაცვითი შესაძლებლობების განვითარება და გაწევრიანებისათვის საქართველოს მომზადება.