ბახტაძე: სამართლებრივად შეფასდება პარლამენტში შეჭრის მცდელობაც და ძალის გადამეტების შემთხვევებიც

პრემიერმინისტრის განცხადებით, სამართლებრივი შეფასება მიეცემა როგორც პარლამენტში შეჭრის მცდელობას, ასევე იმ შემთხვევებს, სადაც შეიძლება, ჰქონოდა ადგილი ძალის გადამეტებას, - ამის შესახებ საქართველოს პრემიერმინისტრმა მამუკა ბახტაძემ „ქართული ოცნების“ ოფისში, ჟურნალისტებთან საუბრისას განაცხადა.

პრემიერმინისტრის შეფასებით, ამ მომენტში მთავარია მოქალაქეებისა და პოლიციელების ჯანმრთელობა, რომლებიც 20 ივნისის ღამეს დაზარალდნენ.

„ჩვენი მიდგომა ყოველთვის იყო კანონზე დაფუძნებული. ძალიან მძიმე დღეები ჰქონდა საქართველოს და ჩვენთვის დღეს, ამ მომენტში მთავარია ჩვენი მოქალაქეების ჯანმრთელობა, ვინაიდან დაზარალდნენ ჩვენი მოქალაქეები და პოლიციელები. ამას აუცილებლად მიეცემა თავისი სამართლებრივი შეფასებაც. მე ვისაუბრე პოლიტიკურ შეფასებაზე, რაც შეეხება სამართლებრივ შეფასებას - ჩვენ ბოლო დღეების განმავლობაში ვიხილეთ ჩვენი მოქალაქეების გულწრფელი პროტესტის გამოხატულება. მე განვაცხადე, რომ მე და ჩემი პოლიტიკური გუნდი ამ პროტესტში სოლიდარულები ვართ. რაც ჩვენ იმ დილით საქართველოს პარლამენტში ვიხილეთ, იყო სრულიად მიუღებელი. სამწუხაროდ, კიდევ ერთხელ დავინახეთ, რომ ამ გულწრფელი პროტესტის გამოყენება მოხდა პროვოკაციისთვის.  ჩვენ დავინახეთ, როგორ მიმდინარეობდა ძალადობა ჩვენს პოლიციელებზე და როგორ ცდილობდნენ, მომხდარიყო შეჭრა საქართველოს პარლამენტში, რაც რა თქმა უნდა მიუღებელია და ამას არავინ დაუშვებდა. ბუნებრივია, ამ ნაბიჯს მიეცემა სამართლებრივი შეფასება, ისევე, როგორც სამართლებრივი შეფასება აუცილებლად მიეცემა იმ შემთხვევებს, სადაც შეიძლება ჰქონოდა ადგილი ძალის გადამეტებას. ამ საკითხზე გამოძიება მიმდინარეობს და ეს საქმეები წარიმართება გამჭვირვალედ, ისე, რომ ნებისმიერი კითხვის ნიშანი მოიხსნას“, - განაცხადა მამუკა ბახტაძემ.

აქციის მონაწილეები 20 ივნისს დაკავებულების გათავისუფლებას, შინაგან საქმეთა მინისტრის გადაყენებას, არჩევნების პროპორციული წესით ჩატარებას და იმ ძალოვნების დასჯას ითხოვენ, რომელთაც მათი შეფასებით, დარბევისას ძალას გადაამეტეს.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები.

20 ივნისს, დილით პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა, რასაც საკანონმდებლო ორგანოსთან მოგვიანებით საპროტესტო აქცია მოჰყვა.