გახარია: ჩემმა გადადგომამ კრიზისი შეიძლება განმუხტოს ან გააღრმავოს

„ჩემი სახელი არ არის მიზანი, ჩემი მიზანია შედეგი, ეფექტურობა და ის განვითარება, რაც ჩემი მუშაობის დროს შემიძლია მოვიტანო“, განაცხადა შს მინისტრმა გიორგი გახარიამ ტელეწამყვანებთან შეხვედრაზე ირაკლი ჩიხლაძის კითხვის პასუხად. 

„აცნობიერებს თუ არა მმართველი გუნდი, რომ დღეს არის კრიზისში და ამ კრიზისიდან გამოსავალი იქნება თუ არა გიორგი გახარიას გადადგომა. ბევრი შეფასება მოვისმინეთ და თქვენი აზრია საინტერესო, რა სახელით დარჩებით თქვენ საქართველოს პოლიტიკურ ისტორიაში“, - მიმართა ჟურნალისტმა მინისტრს. 

„ჩემი სახელი არ არის მიზანი, ჩემი მიზანია შედეგი, ეფექტურობა და ის განვითარება, რაც ჩემი მუშაობის დროს შემიძლია მოვიტანო. მე არ მიზრუნია და არ ვიზრუნებ იმაზე, როგორ გამოვიყურები ან რა სახელით დავრჩები. უბრალოდ ვთვლი, რომ ეს სწორი არ არის“, - განაცხადა გიორგი გახარიამ. 

შეკითხვაზე, განმუხტავს თუ არა მინისტრის გადადგომა კრიზისს, გიორგი გახარიამ უპასუხა, რომ გადადგომამ კრიზისი შეიძლება განმუხტოს ან გააღრმავოს.

„ამ შეფასებებში მე არ შევდივარ. დღეს მაქვს კონკრეტული ამოცანები, რომლის ძირითადი გარემოება შემდეგია: პოლიცია, რომელიც ამ ღონისძიების შემდეგ არის მისახედი. ასევე, გამოძიება, რომელიც დაწყებული გვაქვს ორგანიზებული ძალადობის ფაქტზე სახელმწიფო ინსტიტუტზე შტურმის სახით, რომელიც ასევე არის ჩემი დასასრულებელი“, - თქვა შს მინისტრმა. 

პარლამენტის წინ დღეს აქცია შს მინისტრის გადადგომის მოთხოვნით განახლდა. აქციის მონაწილეები მმართველი პარტიის ლიდერის ივანიშვილის სახლისკენ გეგმავენ მსვლელობის მოწყობას. 

პროტესტის მონაწილეთა მოთხოვნებში შედიოდა პროპორციული არჩევნები, აქციის დაშლის შემდეგ დაკავებული ყველა ადამიანის გათავისუფლება. ასევე უკვე მთავარი მოთხოვნაა შს მინისტრის გიორგი გახარიას გადადგომა, რადგან პროტესტის მონაწილეთა შეფასებით, სწორედ ის არის პასუხისმგებელი აქციის დაშლისას დაზარალებულთა მდგომარეობის გამო.

„ქართული ოცნება“ კი პასუხისმგებლობას „დესტრუქციულ ოპოზიციას“ აკისრებს. მმართველი გუნდის შეფასებით, სწორედ „ნაციონალური მოძრაობის“ ლიდერებმა წააქეზეს აქციის მონაწილეები. 

24 ივნისს, პარტია „ქართული ოცნების“ თავმჯდომარე ბიძინა ივანიშვილი გამოვიდა ინიციატივით, რომ 2020 წლის საპარლამენტო არჩევნები პროპორციული სისტემით, ნულოვანი ბარიერის პირობებში ჩატარდეს. 

რაც შეეხება დაკავებულებს, პატიმრობაში რჩება 3 ადამიანი.  51 - პატიმრობიდან გუშინ გაათავისუფლეს.