რა გეგმამ გააერთიანა ოპოზიციონერები სააკაშვილის გარშემო

კითხვა იყო მარტივი, რა ხდება რას აპირებთ. მე სააკაშვილისთვის არ ვაპირებდი ანგარიშის ჩაბარებას და ბუნებრივია დავემშვიდობე, - აცხადებს ირაკლი ოქრუაშვილი, რომელიც არც პირველი და არც უკანასკნელი ოპოზიციონერი პოლიტიკოსია, ვის ტელეფონზეც ერთი კვირის წინ უკრაინიდან ზარი შევიდა

თავდაცვის ყოფილ მინისტრს სააკაშვილმა 2007 წლის შემდეგ პირველად დაურეკა, სწორედ იმ დროს როცა პარლამენტის შენობის წინ საპროტესტო მუხტი გაჩნდა. რუსთაველზე დაწყებულმა აქციებმა, როგორც ჩანს, ექსპრეზიდენტს  მოლოდინი გაუჩინა, რომ საჭირო დრო დადგა, დიდი ოპოზიციური გაერთიანებისთვის და ხელისუფლების შესაცვლელად. 

„ნაციონალურ მოძრაობასთან“ თანამშრომლობის პრობლემა რომ არ აქვს ირაკლი ოქრუაშვილს, ეს ბოლო საპრეზიდენტო არჩევნებაც აჩვენა, როცა სახლის კარი გრიგოლ ვაშაძეს გაუღო, ამ ნაბიჯით კი ავტომატურად მისთვის სააკაშვილის გულის კარი გაიღო.  

„ცუდი მოგონება მაკავშირებს, მაგრამ გია ვაშაძე რომ დაჯდა მასთან, ეს პოზიტიურად მივიღე“, - ასე გამოეხმაურა მაშინ ამ ფაქტს სააკაშვილი. 

2020 წლამდე ყოფილი ოპონენტების დამეგობრების და მოკავშირედ ქცევის გეგმა უკვე წარმატებით მუშაობს. არასასიამოვნო მომენტები და წყენა წარსულს მიაბარა სააკაშვილმა გუბაზ სანიკიძის შემთხვევაშიც. მანამდე კი სააკაშვილმა ლევან ბერძენიშვილი შემოირიგა. 2007 წლის ნოემბრის მოვლენების შემდეგ, მოღალატედ შერაცხულ და რუსეთის სპეცსამსახურებთან თანამშრომლობაში დადანაშაულებელ ბერძენიშვილს მან ჯერ მოუბოდიშა, შემდეგ კი სამშობლოსთვის თავდადებული უწოდა.

„ქართულმა ოცნებამ“ ერთი გეგმის და საერთო თამაშის წესებით მოქმედებად ჩათვალა ის, როდესაც პარლამენტის წინ და შემდეგ პარლამენტის შენობაში ერთმანეთის გვერდით დაინახა „ნაციონალური მოძრაობა“ და „ევროპული საქართველო“. 

„თუკი როდესმე ეჭვი გამოთქმულა, რომ „ევროპული საქართველო“ თანამშრომლობდა „ნაცმოძრაობასთან“, მათი ნაწილი დღეს „ნაცმოძრაობასთან“ არის. ეს გარკვეული ლუსტრაციაა. ბოკერია, უგულავა - სხვადასხვა შტოები არიან. სტრატეგიულად გაიშალნენ და ახლა დაბრუნდნენ“, - თვლის ფრაქცია „ქართული ოცნების“ თავმჯდომარე მამუკა მდინარაძე.

ორ ნაწილად გაყოფილი პარტიის წევრები ყოველთვის ამტკიცებენ, რომ სხვადასხვა პოლიტიკური დღის წესრიგი და ღირებულებები აქვთ, თუმცა ერთმანეთს პოზიციები არჩევნებზეც გაუმაგრეს. თუ საპრეზიდენტო არჩევნებზე მხოლოდ მეორე ტურში ითანამშრომლეს, შუალედურ არჩევნებში ბოკერიას გუნდმა ზუგდიდში სანდრა რულოვსის ფაქტორის გამო კანდიდატი საერთოდ არ წარადგინა. ანალოგიურად მოიქცა „ნაციონალური მოძრაობა“ მთაწმინდის ოლქში, როცა შალვა შავგულიძის სასარგებლოდ კანდიდატი არ დაასახელა. 

„ქართულ ოცნებაში“ ფიქრობენ, რომ ყოფილი ხელისუფლების წარმომადგენლები პოლიტიკური რეინკარნაციისთვის და ძალადობრივი გზით ხელისუფლებაში დასაბრუნებად ისევ სააკაშვილთან ერთად ემზადებიან. ამსტერდამის ამ შეხვედრის შემდეგ, სადაც მაშინ 8 პოლიტიკური პარტიის 10 წარმომადგენელი შეიკრიბა, გამაერთიანებლის იმიჯის მორგებას სააკაშვილი მეორედ ცდილობს. ამჯერად ყოფილი ოპონენტების და ძველი თანამებრძოლების გაერთიანებით.