ბოკერიას და ხოშტარიას ნაციონალებთან დაახლოება უხერხულობას არ უქმნის

ევროპული საქართველოს ლიდერები ირწმუნებიან, რომ ჰელსინკში გიგი უგულავასა და მიხეილ სააკაშვილის მიერ გაკეთებული განცხადებები არ ნიშნავს იმას, რომ "ნაციონალური მოძრაობა" და "ევროპული საქართველო" ერთიანდება. 

„როგორც უკვე არაერთგზის ვთქვით საჯაროდ, ჯერ ჩვენ გაქვს საერთო ამოცანა - დავამარცხოთ სალომე ზურაბიშვილი, მერე მთლიანად ივანიშვილის რეჟიმი მშვიდობიანად და არჩევნების გზით. ამის შემდეგ ევროპული საქართველო და ნაციონალური მოძრაობა ოპონირებას და კონკურეციას გააგრძელებენ“, - განაცხადა გიგა ბოკერიამ და აღნიშნა, რომ მას არანაირ უხერხულობას არ უქმნის ევროპული საქართველოსა და ნაციონალური მოძრაობის წევრების მიერ ბოლო ორი წლის განმავლობაში, ერთმანეთის მისამართით, გაკეთებული განცხადებები.

„არანიარ უხერხულობას არ მიქმნის სალომე ზურაბიშვილის და ბიძინა ივანიშვილის დასამარცხებლად არჩევნების გზით, ერთმანეთისგან ძალიან განსხვავებული პოლიტიკური ძალების გაერთიანება“, - აღნიშნავს ბოკერია.

ასევე ელენე ხოშტარია ამბობს, რომ სააკაშვილი-უგულავას შეხვედრა მათი პარტიების გაერთიანებას არ ნიშნავს. 

„არავითარ შემთხვევაში ეს არ ნიშნავს ჩვენი პარტიების გაერთიანებას, ან ახლა ან სამომავლოდ. ჩვენი განსხვავებები ნაციონალურ მოძრაობასთან როგორც იყო ასევე რჩება. ვერაფერი ვერ შექმნის უხერხულობას, მაშინ როცა პრაქტიკულად გაერთიანებული ჩვენი ქვეყანა იმ აზრის გარშემო, რომ სალომე ზურაბიშვილი არ უნდა გახდეს ქვეყნის პრეზიდენტი. ეს არის ბევრად უფრო დიდი, ვიდრე ის ძალიან სერიოზული განსხვავები რომელიც პარტიებს შორის არსებობს“, - განმარტავს ელენე ხოშტარია.

ფინეთის დედაქალაქში გიგი უგულავა და მიხეილ სააკაშვილი შერიგდნენ. როგორც სააკაშვილმა თქვა, "ნაციონალური მოძრაობა" და "ევროპული საქართველო" ერთი ოჯახია.

„ევროპული საქართველო“ „ერთიან ნაციონალურ მოძრაობას“ 2017 წლის იანვარში გამოეყო. მაშინ გამართულ ბრიფინგზე გიგი უგულავამ ყოფილი თანაგუნდელი მიხეილ სააკაშვილი გააკრიტიკა და "ჯართი" უწოდა. 

თუმცა 1 წლის თავზე, 2018 წლის საპრეზიდენტო არჩევნების მეორე ტურში, "ევროპულმა საქართველომ" მხარდაჭერა "ნაციონალური მოძრაობის" საპრეზიდენტო კანდიდატს გამოუცხადა. დღეს ნაციონალურ მოძრაობაში გიგი უგულავას მიერ ვაშაძისა და სააკაშვილის შესახებ ცოტა ხნის წინ გაკეთებული კრიტიკული განცხადებების კომენტირებისგან თავი შეიკავეს.