„აღმოსავლეთ პარტნიორობის“ 10 წლის იუბილეზე მიწვეულ უცხოელ სტუმართა სია ცნობილია

11-12 ივლისს საქართველოს მთავრობა ბათუმში „აღმოსავლეთ პარტნიორობის“ 10 წლისთავისადმი მიძღვნილ საერთაშორისო კონფერენციას უმასპინძლებს. 

ამის შესახებ საგარეო საქმეთა მინისტრმა დავით ზალკალიანმა უწყებაში გამართულ ბრიფინგზე განაცხადა. 

მინისტრის თქმით, კონფერენციის მოსამზადებელი სამუშაოები უკვე დასკვნით ეტაპზეა. 

საქართველოში, როგორც „აღმოსავლეთ პარტნიორობის“ ლიდერ ქვეყანაში, საიუბილეო თარიღის აღსანიშნავად, „აღმოსავლეთ პარტნიორობის“ შედეგებსა და მომავალზე სამსჯელოდ იკრიბებიან უმაღლესი და მაღალი დონის მონაწილეები, მათ შორის ევროპული საბჭოს პრეზიდენტი დონალდ ტუსკი, ევროკომისარი ჰუმანიტარული დახმარებისა და კრიზისების მართვის საკითხებში ქრისტოს სტილიანიდესი, ესტონეთის პრემიერ-მინისტრი იური რატასი, ასევე ევროკავშირის და პარტნიორი ქვეყნების 8 საგარეო საქმეთა მინისტრი, მათ შორის არიან აღმოსავლეთ პარტნიორობის ინიციატორი ქვეყნების-პოლონეთისა და შვედეთის საგარეო საქმეთა მინისტრები: იაცეკ ჩაპუტოვიჩი და მარგოტ ვალსტრომი, ბულგარეთის ვიცე-პრემიერი და საგარეო საქმეთა მინისტრი ეკატერინა ზაჰარიევა, უკრაინის პირველი ვიცე-პრემიერი და ეკონომიკის განვითარებისა და ვაჭრობის მინისტრი სტეფან კუბივი, სომხეთის საგარეო საქმეთა მინისტრი ზოჰრაბ მნაცაკანიანი, სერბეთის ევროინტეგრაციის მინისტრი იადრანკა იოქსიმოვიში, უნგრეთის საგარეო საქმეთა მინისტრი პიტერ სიიარტო, ჩეხეთის საგარეო საქმეთა მინისტრი ტომაშ პეტრშიჩეკი, გერმანიის ევროპულ საქმეთა სახელმწიფო მინისტრი მიხაელ როტი, მოლდოვის საგარეო საქმეთა და ევროპული ინტეგრაციის სახელმწიფო მდივანი დანიელა მორარი, ალბანეთის, ბელარუსის საგარეო საქმეთა მინისტრის მოადგილეები, ნორვეგიის საგარეო საქმეთა სამინისტროს სახელმწიფო მდივანი, გერმანიის, რუმინეთის, შვედეთის სამეფოს პარლამენტის ვიცესპიკერები. 

„საქართველო კონფერენციაზე წარმოდგენილი იქნება როგორც აღმასრულებელი ხელისუფლების, ასევე საკანონმდებლო ორგანოს უმაღლეს დონეზე. ღონისძიება, რომელსაც ორგანიზებას უწევს საქართველოს მთავრობა, გამორჩეული იქნება როგორც უპრეცედენტო მასშტაბით, მონაწილეთა დონითა და რაოდენობით, ასევე შინაარსით. 

მაღალი დონის სტუმრებს ექნებათ შესაძლებლობა, შეაფასონ „აღმოსავლეთ პარტნიორობა“, ასევე იმსჯელონ არსებულ გამოწვევებზე და სამომავლო ნაბიჯებზე, მათ შორის 2020 წლის შემდგომი თანამშრომლობის პერსპექტივებზე. 

კონფერენციის ფარგლებში ხელი მოეწერება მთელ რიგ საფინანსო შეთანხმებებს, კერძოდ, საქართველოსა და ევროკავშირს შორის ხელი მოეწერება ორ საფინანსო შეთანხმებას, რომლებიც ევროკავშირის მიერ საქართველოსთვის ჯამში 47 მილიონ ევრომდე დახმარების გამოყოფას ითვალისწინებს.

ასევე ცალკეულ შეთანხმებებს საქართველოს მთავრობასა და უნგრეთის, ჩეხეთის, სერბეთის მთავრობებს შორის სხვადასხვა სფეროში თანამშრომლობის შესახებ. 

უნდა აღინიშნოს, რომ ათწლეულის განმავლობაში, „აღმოსავლეთ პარტნიორობა“ ეფექტიან პოლიტიკურ პროექტად იქცა. ჩვენმა ქვეყანამ სრულად გამოიყენა „აღმოსავლეთ პარტნიორობის“ მიერ შემოთავაზებული შესაძლებლობები, რამაც მნიშვნელოვანი შედეგები მოუტანა საქართველოს თითოეულ მოქალაქეს და დღეს საქართველო აღიარებულია ამ ფორმატის ლიდერ სახელმწიფოდ.

სწორედ „აღმოსავლეთ პარტნიორობის“ ფორმატის ფარგლებში ხელი მოეწერა ასოცირების შეთანხმებას, ღრმა და ყოვლისმომცველი თავისუფალი ვაჭრობის სივრცის კომპონენტის ჩათვლით; ამოქმედდა ევროკავშირის/შენგენის ქვეყნებთან უვიზო რეჟიმი; საქართველო გაწევრიანდა ევროპის ენერგეტიკულ გაერთიანებაში; 2018 წლის 21 ნოემბერს ევროკომისიასა და საქართველოს მთავრობას შორის ახალი-უმაღლესი დონის ფორმატი ჩამოყალიბდა და გაფართოვდა ევროკავშირთან არსებული თანამშრომლობის სფეროები; 2018 წლის სექტემბერში საქართველოში გაიხსნა პირველი ევროპული სკოლა და სხვა“, - განაცხადა დავით ზალკალიანმა. 

აღმოსავლეთ პარტნიორობის პროგრამის შექმნა 10 წლის წინ შვედეთის და პოლონეთის ინიციატივა იყო, რომელმაც საქართველო, უკრაინა, მოლდოვა, აზერბაიჯანი, სომხეთი და ბელარუსი გააერთიანა.