გიგა ბოკერია: ორგანიზებულ დანაშაულთან ბრძოლისას წინა ხელისუფლებამ მძიმე შეცდომები დაუშვა

„ევროპული საქართველოს“ ერთ-ერთი ლიდერის გიგა ბოკერიას განცხადებით, წინა ხელისუფლებამ ორგანიზებულ დანაშაულთან ბრძოლისას მძიმე შეცდომები დაუშვა. ამის შესახებ მან სტრასბურგის სასამართლოს მიერ ზურაბ ვაზაგაშვილის საქმეზე გამოცხადებულ გადაწყვეტილებასთან დაკავშირებით განაცხადა. მის კომენტარს სააგენტო „ინტერპრესნიუსი“ ავრცელებს. 

„იმ პერიოდში, როცა იყო ძალიან მწვავე ბრძოლა ორგანიზებულ დანაშაულთან, კრიმინალთან ბევრი მძიმე შეცდომა დაუშვა მაშინდელმა ხელისუფლებამ, რომლის ნაწილიც მე ვიყავი. ამ გადაწყვეტილებამდეც ასეთი შეფასება მქონდა და ახლაც იგივე შეფასება მაქვს“, - განაცხადა გიგა ბოკერიამ. 

სტრასბურგში ადამიანის უფლებათა ევროპულმა სასამართლომ 2006 წლის მაისში კორტების მიმდებარედ, სპეცოპერაციის დროს მოკლული ზურაბ ვაზაგაშვილის საქმეზე საქართველოს სახელმწიფოს ვაზაგაშვილების სასარგებლოდ 50 000 ევროს კომპენსაცია დააკისრა.

2006 წლის მაისში კორტების მიმდებარედ სპეცოპერაციის დროს ზურაბ ვაზაგაშვილი და ალექსანდრე ხუბულოვი მოკლეს. 2015 წელს საქართველოს მთავარმა პროკურატურამ კორტების მიმდებარედ ჩატარებული სპეცოპერაციის საქმე გახსნილად გამოაცხადა და განზრახ მკვლელობის, მტკიცებულებათა ფალსიფიკაციისა და განზრახ უკანონო დაკავების ბრალდებებით რამდენიმე მოქმედი და ყოფილი სამართალდამცველი დააკავა. 

საქალაქო სასამართლომ გიორგი ცააძესა და ირაკლი ფირცხალავას განზრახ მკვლელობისთვის 12-12 წლით თავისუფლების აღკვეთა მიუსაჯა; თბილისის სპეცრაზმის ყოფილ უფროსს, კახა ნაკანს  6 წლით თავისუფლების აღკვეთა; ლევან ბეროძეს სამი წლით თავისუფლების აღკვეთა, გრიგოლ კვინიკაძეს ოთხი წლითა და ექვსი თვით თავისუფლების აღკვეთა მიუსაჯა.

2017 წელს სააპელაციო სასამართლომ წინა ინსტანციის განაჩენი უცვლელად, ძალაში დატოვა.

იური ვაზაგაშვილი სპეცოპერაციის დროს მოკლული მისი შვილის, ზურას საფლავზე კასპის რაიონის სოფელ ყარაფილაში მოკლული იპოვეს. გავრცელებული ინფორმაციით, ის 2015 წლის 20 იანვარს აფეთქებას ემსხვერპლა. მოწმეთა თქმით, მათ აფეთქების ხმა გაიგონეს და როდესაც საფლავს მიუახლოვდნენ, იური ვაზაგაშვილის ცხედარი აღმოაჩინეს.