სალია: გვარამიამ მითხრა რომ მის კაბინეტში ვერ შევიდოდი

ნიკა გვარამია არ არის არხის გენერალური დირექტორი, შესაბამისად, მას როგორც გენერალური დირექტორს არ აქვს არანაირი უფლებების განხორციელების საფუძველი. ის აქ დირექტორის რანგში უკანონოდ იმყოფება, - ამის შესახებ „რუსთავი 2“-ის შენობის დატოვების შემდეგ ტელეკომპანიის ახალმა გენერალურმა დირექტორმა პაატა სალიამ არხის ყოფილ ხელმძღვანელთან შეხვედრის შემდეგ განაცხადა.

მისივე თქმით, მას სურდა მენეჯმენტს შეხვედრა, რომელიც შემდეგ მას თანამშრომლებს გააცნობდა.

„მივედი გვარამიას კაბინეტთან, შევხვდი მას და ვუთხარი, რომ მენეჯმენტთან შეხვედრა მსურს, თუმცა მან განაცხადა, რომ ჩემთან თანამშრომლობას არ აპირებს, რომ ეს კაბინეტი მისია და იქ ვერ შევიდოდი. 

რაც შეეხება ჟურნალისტებს, მათ აქვთ თავიანთი დღის წესრიგი და ისინი მუშაობენ. მათაც ვუთხარი, რომ გააგრძელონ მუშაობა და მათთვის ხელის შეშლას არავინ აპირებს. ისინი ითხოვნდენ 2-წლიან კონტრაქტებს, რაც მათ მისცემდა გარანტიას, რომ არავინ არ გაათავისუფლებთ. მე ვუპასუხე, რომ კონტრაქტის შინაარსზე სასაუბროდ დროა საჭირო, თუმცა მათ მიპასუხეს, რომ ასეთი კონტრაქტის შესადგენად 5 წუთი საკმარისი დროა. მე ვთვლი, რომ ასეთი საუბარი არასწორია. გარანტიებზე და კონტრაქტებზე სასაუბროდ საჭიროა სამუშაო ვითარება და არა ის, რაც დღეს ვიხილეთ.

ნიკა გვარამია არ არის არხის გენერალური დირექტორი, შესაბამისად, მას როგორც გენერალური დირექტორს არ აქვს არანაირი უფლებების განხორციელების საფუძველი. ის აქ დირექტორის რანგში უკანონოდ იმყოფება. მე მოვედი ცივილიზებული შეხვედრისთვის, თუმცა ამის ნაცვლად პოლიტიკური განცხადებები მოვისმინე. ყველამ დაივიწყა სტრასბურგის გადაწყვეტილება და ვსაუბრობთ იმაზე, თითქოს „რუსთავი 2“-ში შემომიძღვა ლავროვი, რომელმაც ჩემი სამშობლოდან, აფხაზეთიდან გამომაძევა. ეს არის პოლიტიკური სპეკულაციები“, - განაცხადა სალიამ.

ქიბარ ხალვაშმა შპს „სამაუწყებლო კომპანია რუსთავი 2“-ს დირექტორად პაატა სალია დანიშნა და საჯარო რეესტრისგან შპს „სამაუწყებლო კომპანია რუსთავი 2“-ის მონაცემებში ცვლილების რეგისტრაციას ითხოვა.

როგორც საჯარო რეესტრის ვებგვერდზე გამოქვეყნებული დოკუმენტაცში წერია, დღეს შპს „სამაუწყებლო კომპანია რუსთავი 2“-ს პარტნიორთა კრება გაიმართა.

კრების გადაწყვეტილებით, ნიკა გვარამია გათავისუფლდა ტელეკომპანიის დირექტორის თანამდებობიდან და დირექტორად პაატა სალია დაინიშნა. მანამდე საჯარო რეესტრმა „რუსთავი 2“ ქიბარ ხალვაშს გადაუფორმა.

სტრასბურგში ადამიანის უფლებათა ევროპულმა სასამართლომ „რუსთავის 2“-ის საქმეზე გადაწყვეტილება გამოაცხადა. სტრასბურგის სასამართლოს განცხადებით, „რუსთავი 2“-თან მიმართებით ადამიანის უფლებათა ევროპული კონვენციის არც ერთი მუხლი არ დარღვეულა, მათ შორის არც სამართლიანი სასამართლოს უფლება. 

წულუკიანის თქმით, სახელმწიფოს გადასაწყვეტი არ არის, როდის უნდა აღსრულდეს გადაწყვეტილება და ახალ მესაკუთრეს აქვს გადაწყვეტილების მიღების თავისუფლება. 

განცხადება გაავრცელეს „რუსთავის 2“-ს თანამშრომლებმა, სადაც ამბობენ, რომ მენეჯმენტის შეცვლა გამოიწვევს სარედაქციო პოლიტიკის შეცვლას, სწორედ ამიტომ, იუსტიციის სამინისტროს მოუწოდებენ, არ დაარეგისტრიროს ადვოკატ პაატა სალიას მოთხოვნა არხის მესაკუთრედ ხალვაშის დარეგისტრირების შესახებ. 

ამასთან, სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი. კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ს მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა დღეს სტრასბურგის სასამართლომ.

„რუსთავი 2“ ადამიანის უფლებათა ევროპულ სასამართლოში 4 მუხლით დავობდა, მათ შორის სამართლიანი სასამართლოს უფლების დარღვევის გამო.

მხარეებს სტრასბურგის სასამართლოს გადაწყვეტილების დიდ პალატაში გასაჩივრებისთვის სამთვიანი ვადა აქვთ. თუ გადაწყვეტილება აღნიშნულ ვადაში არ გასაჩივრდა, სამი თვის შემდეგ ის ძალაში შევა.

18 ივლისს ქიბარ ხალვაშმა „რუსთავი 2“-ს გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა.

ტელეკომპანია „რუსთავი 2“-ს წილებზე სამართლებრივი დავა რამდენიმე წელი მიმდინარეობდა. წილის სამართლებრივი გზით დაბრუნებას ბიზნესმენი ქიბარ ხალვაში ცდილობდა. ამავდროულად, „რუსთავი 2“-თან დაკავშირებით პრეტენზიას თავდაპირველი დამფუძნებლები - ჯარჯი აქიმიძე და დავით დვალიც აცხადებენ. მათი თქმით, ვარდების რევოლუციის შემდეგ „ნაციონალური მოძრაობის“ ლიდერებმა წილები ძალით დაათმობინეს.

სამართლებრივი დავა აქტიურ ფაზაში „ქართული ოცნების“ ხელისუფლებაში მოსვლის შემდეგ შევიდა. „რუსთავი 2“-ს გენერალური დირექტორი და არხის წარმომადგენლები, რომლებიც არ მალავდნენ, რომ არხის სარედაქციო პოლიტიკა თანხვედრაშია „ნაციონალური მოძრაობის“ ღირებულებებთან და ეფუძნება მმართველი გუნდის მკაცრ კრიტიკას, აცხადებდნენ, რომ ხელისუფლება ცდილობდა „რუსთავი 2“-ს გაჩუმებას და აპირებდა ტელეკომპანიის ხელში ჩაგდებას, ხალვაშის გამოყენებით. მთავრობა ბრალდებებს უარყოფდა და აცხადებს, რომ „რუსთავი 2“-ს მენეჯმენტი სამართლებრივი დავის პოლიტიკურ ჭრილში წარმოჩენას ცდილობდა.