გენპროკურორის პირველი მოადგილე: კარიერის განმავლობაში ჩემზე ზეწოლის არანაირი ფაქტი არ ყოფილა

იუსტიციის უმაღლეს საბჭოში უზენაესი სასამართლოს მოსამართლეობის კანდიდატებთან გასაუბრება მიმდინარეობს. საბჭოს წევრები საქართველოს გენერალური პროკურორის პირველ მოადგილეს მამუკა ვასაძეს ესაუბრებიან. 

როგორც მამუკა ვასაძემ განაცხადა, მისი კარიერის განმავლობაში მასზე არც ფსიქოლოგიური და არც ფიზიკური თუ სხვაგვარი ზეწოლის ფაქტი ყოფილა და ამის არანაირი მტკიცებულება არ არსებობს. მან გასაუბრების დროს განმარტება გააკეთა იური ვაზაგაშვილის მკვლელობის საქმეზე მსჯავრდებულ გია სოსანაშვილის ბრალდებასთან დაკავშირებით. სოსანაშვილი აცხადებდა, რომ მას მამუკა ვასაძე აიძულებდა იური ვაზაგაშვილის მკვლელობის დამკვეთად ირაკლი ფირცხალავა დაესახელებინა.

"ერთმნიშვნელოვნად ვიტყვი, რომ არასდროს ჩემი კარიერის განმავლობაში არც ფსიქოლოგიური და არც ფიზიკური და სხვაგვარი ზეწოლის ფაქტი ყოფილა და ამის არანაირი მტკიცებულება არ არსებობს. კონკრეტული ფაქტებით ვისაუბრებ, რადგან მეც გავეცანი და თავის დროზე საჭიროდ არ ჩავთვალე მეპასუხა გია სოსანაშვილისთვის. სოსანაშვილს კნინობითად არ ვიხსენიებ, ის დამნაშავეა სსკ-ით გათვალისწინებული დანაშაულის ჩადენისათვის. ეს ეხება იმ გახმაურებულ სისხლის სამართლის საქმეს, რაზეც რამდენიმე დღის წინ გამოცხადდა სტრასბურგის სასამართლოს გადაწყვეტილება საქართველოსთან მიმართებით.

ეს ეხება იური ვაზაგაშვილის განზრახ მკვლელობას შვილის საფლავზე. მის მიერ ამ განცხადებების გაკეთება არის ერთმნიშვნელოვანი ტყუილი და ემსახურება მხოლოდ ჩემს დისკრედიტებას, იქიდან გამომდინარე, რომ ვაზაგაშვილის ძირითადი საქმე, რომელზეც არაერთი პირი მივეცით სისხლის სამართლის პასუხისგებაში, უშუალოდ ჩემი ხელმძღვანელობით საგამოძიებო ნაწილის გუნდთან ერთად არის გამოძიებული და დამდგარია პასუხისმგებლობა  - რაც კონკრეტული პირების მიმართ დადგა და რაზეც მსჯელობა სტრასბურგის სასამართლოს გადაწყვეტილებაშია...", - განაცხადა მამუკა ვასაძემ.

იური ვაზაგაშვილი სპეცოპერაციის დროს მოკლული მისი შვილის, ზურას საფლავზე კასპის რაიონის სოფელ ყარაფილაში გარდაცვლილი იპოვეს. გავრცელებული ინფორმაციით, იური ვაზაგაშვილი 2015 წლის 20 იანვარს აფეთქების შედეგად გარდაიცვალა. მოწმეთა თქმით, მათ აფეთქების ხმა გაიგონეს და როდესაც საფლავს მიუახლოვდნენ, იური ვაზაგაშვილის ცხედარი აღმოაჩინეს.

იური ვაზაგაშვილის მკვლელობაში ბრალდებულ გია სოსანაშვილს 2015 წლის 20 ნოემბერს თბილისის საქალაქო სასამართლომ 20 წლით თავისუფლების აღკვეთა მიუსაჯა. 

უზენაესი სასამართლოს მოსამართლეობის კანდიდატების პირველი მოსმენა 17 ივლისს გაიმართა. იუსტიციის უმაღლესმა საბჭომ 50-კაციანი სიიდან ფარული კენჭისყრით, პარლამენტისთვის წარსადგენი მოსამართლეობის 20 კანდიდატი უნდა შეარჩიოს.

როგორ აირჩევენ საქართველოს უზენაესი სასამართლოს მოსამართლეებს შეგიძლით იხილოთ ბმულზე.