ბესელია: რამდენიმე დღის წინ მითხრეს, რომ პასუხისგებაში მიცემული პირი არ იყო პირველწყარო

ახალი არაფერი მომისმენია. ვიცოდი ამ პატიმრის შესახებ და კიდევ ვსვამ კითხვას, ამდენი ხნის განმავლობაში მას ბრალი რატომ არ ჰქონდა წარდგენილი, - განაცხადა საპარლამენტო უმრავლესობის ყოფილმა წევრმა ეკა ბესელიამ შსს-ს ბრიფინგის შეფასებისას.

პოლიტიკოსის თქმით, ამ პიროვნებაზე რამდენიმე დღის წინ საგამოძიებო უწყებაში დასვა კითხვა, იყო თუ არა ის პირველწყარო, რაზეც განუცხადეს, რომ „არა“ და პირველწყაროს დადგენა ვერ ხდებოდა.

„კი ბატონო, მაჩვენონ მტკიცებულებები და დაადასტურონ, რომ პირველწყარო ის იყო. მე ახალი არაფერი მომისმენია. მე ვიცოდი ამ პატიმრის შესახებ და კიდევ ვსვამ კითხვას, ამდენი ხნის განმავლობაში მას ბრალი რატომ არ ჰქონდა წარდგენილი?“, - აღნიშნა ბესელიამ.

მისი შეფასებით, ცოტა მეტი სერიოზულობა მართებთ საგამოძიებო უწყებებს ამ საქმის მიმართ, ვიდრე მსგავსი სატყუარების გადმოგდება.

„მე მახსოვს ინტერვიუ სწორედ ამ პატიმართან, რომელიც ძალიან უცნაურ რაღაცებს ამბობდა. მე არ ვიმეორებ იმ ფრაზებს, რასაც ასახელებდა და ვისაც ასახელებდა. მაშინ ეს არავინ ჩათვალა სერიოზულად და აქამდე რატომ წარუდგინეს ამ ადამიანს ბრალი, და მეორე, მე როცა საგამოძიებო მასალებს გავეცანი, ვიკითხე, იყო თუ არა ის დაკითხული და მითხრეს, რომ ელოდებოდნენ სომხეთიდან მასალებს და ასევე მითხრეს, რომ ჩვენი გამომძიებელი არ შეუშვეს და არ მისცეს უფლება, დაეკითხა ეს პატიმარი და ეს ფაქტიც ასევე უცნაურია“, - განაცხადა ეკა ბესელიამ. 

შინაგან საქმეთა სამინისტრომ გამოავლინა და პასუხისგებაში მისცა კაცი, რომელმაც დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა. ამის შესახებ ცენტრალური კრიმინალური პოლიციის დეპარტამენტის დირექტორის მოვალეობის შემსრულებელმა მამუკა ჭელიძემ ბრიფინგზე განაცხადა.

ამ საქმეზე გრძელდება გამოძიება საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით, რომ დადგინდეს აღნიშნულ დანაშაულში შესაძლო მონაწილე სხვა პირების ვინაობა.

მოცემულ სისხლის სამართლის საქმეზე საქართველოს სისხლის სამართლის კოდექსის 157-ე პრიმა მუხლით დაკავებულია და სისხლის სამართლებრივ პასუხისგებაში მიცემულია 19 პირი.