ხალვაში: დვალმა და აქიმიძემ ტელევიზიის წილების 40%-ზე უარი მითხრეს

„რუსთავი 2“-ის მფლობელმა ქიბარ ხალვაშმა ტელეკომპანიის დამფუძნებლებს დავით დვალს და ჯარჯი აქიმიძეს არხის 40%-იანი წილი შესთავაზა, თუმცა „რუსთავი 2“-ის დამფუძნებლებისგან უარი მიიღო.

ამის შესახებ ხალვაშმა ჟურნალისტებს არხის დამფუძნებლებთან შეხვედრის შემდეგ განუცხადა. მოლაპარაკებებს ტელეკომპანიის დირექტორი პაატა სალიაც ესწრებოდა.

ხალვაშმა აღნიშნა, რომ 50%-ის გადაცემის შემთხვევაშიც ტელევიზიის დირექტორად პაატა სალია დარჩება.

„40% შევთავაზე, რაზეც ბედნიერება ვერ შევატყვე, თუმცა ხვალაც შეიძლება გაგრძელდეს ამაზე საუბარი, თვითონაც შემომთავაზეს წინადადება, რაც ფიქრს მოითხოვს“, - განუცხადა ქიბარ ხალვაშმა ჟურნალისტებს.

მისივე თქმით, ამ შეთავაზებაზე უარი მიიღო. 

კომენტარი ასევე გააკეთეს დავით დვალმა და ჯარჯი აქიმიძემ. 

„ჩვენ მაინც ვიმსჯელებთ ადვოკატთან ერთად და პასუხი დასაბუთებული იქნება, თუმცა ერთი რამ შემიძლია გითხრათ, რაც ქიბარმაც დაადასტურა, კმაყოფილება არ გვეხატა. ასევე, რაც გავაჟღერეთ წინა დღეებში წითელ ხაზებთან დაკავშირებით, ფაქტორი იქნება. ძალიან საინტერესო საუბარი იყო, მაგრამ ყველაფერი დავა იქამდე მაინც კონტროლი ვისია. ამიტომ ჩვენი პასუხი ამ ანალიზიდან გამომდინარე იქნება“, - განუცხადა დვალმა ჟურნალისტებს.

მისივე თქმით, იდეები გაცვალეს სარედაქციო პოლიტიკასთან დაკავშირებით და შეხვედრაზეც აღნიშნეს, რომ სასიცოცხლოდ მნიშვნელოვანია, „რუსთავი2“ იყოს უკიდურესად კრიტიკული ტელევიზია და ფლაგმანი თავისუფალი ტელევიზიის საქართველოში. 

„ქიბარი არაფრით არის ჩვენთან ვალდებული. ის უდგება ამ საკითხს როგორც მეწარმე და ძალიან ღელავს „რუსთავი2“-ის ფინანსურ მდგომარეობაზე“, - აღნიშნა დავით დვალმა.  

ჯარჯი აქიმიძის თქმით, 40%-ს არ თანხმდებიან, თუმცა უარის არგუმენტებს უახლოეს მომავალში წარმოადგენენ, ერთ-ერთი მიზეზი კი ისაა, რომ ეს საკონტროლო პაკეტი არ არის. 

„რუსთავი 2“-ის დამფუძნებლები დავით დვალი და ჯარჯი აქიმიძე ტელეკომპანიის გენერალურ დირექტორს პაატა სალიას 25 ივლისს შეხვდნენ. 

18 ივლისს ბიზნესმენმა ქიბარ ხალვაშმა „რუსთავი 2“-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა. მანამდე სტრასბურგის სასამართლომ გააუქმა საქართველოს უზენაესი სასამართლოს გადაწყვეტილების აღსრულების შემაჩერებელი მექანიზმი.

კერძოდ, 2017 წლის 2 მარტს საქართველოს უზენაესი სასამართლოს დიდმა პალატამ ტელეკომპანია „რუსთავი 2“ ქიბარ ხალვაშს მიაკუთვნა. იმავე წლის 3 მარტს კი, „რუსთავი 2“-ის მიმართვის საფუძველზე, სტრასბურგის სასამართლომ უზენაესი სასამართლოს გადაწყვეტილების აღსრულება შეაჩერა. სწორედ ამ აღსრულების შეჩერება გააუქმა სტრასბურგის სასამართლომ.

ამ ამბიდან მალევე ირაკლი ოქრუაშვილმა განაცხადა, „რუსთავი 2“-ის მესაკუთრეა და ტელეკომპანიის 100%-იანი წილი ქიბარ ხალვაშის სახელით შეისყიდა, თუმცა კომპანიის დღევანდელი მფლობელი ამ დოკუმენტს არ აღიარებს და ამბობს, რომ ხელმოწერა გაყალბებულია.

ტელეკომპანიასთან დაკავშირებით დანებებას არ აპირებენ ძმები ყარამანიშვილები და ნიკოლოზ ნაყოფია, რომლებმაც 27 ივლისს განცხადება გაავრცელეს. 

ტელეკომპანია „რუსთავი 2-ის“ საკონტროლო პაკეტის ყოფილი მფლობელი კომპანიის „ტვ საქართველოს“ 50%-იანი წილი, ერთიანი ნაციონალური მოძრაობის დეპუტატის, კობა ნაყოფიას შვილმა, ნიკოლოზ ნაყოფიამ შეიძინა. საჯარო რეესტრის მონაცემებით, აღნიშნული ცვლილება 2018 წლის 16 აგვისტოს დარეგისტრირდა. წილების გასხვისებამდე „ტელეკომპანია საქართველოს“ 60% და 40%-ს ლევან და გიორგი ყარამანიშვილები ფლობდნენ. ცვლილების შედეგად, მათი წილი 25%, 25%-მდე შემცირდა.