„რუსთავი 2“-ის ყოფილი ხელმძღვანელი პირების საქმეზე ქიბარ ხალვაშს და ნინო ნიჟარაძეს დაკითხავენ

„რუსთავი 2“-ის ყოფილი გენერალური დირექტორის, ნიკა გვარამიას და მასთან ერთად ბრალდებულების, ყოფილი ფინანსური დირექტორის, კახა დამენიასა და „ინტერ მედია პლიუსის“ დირექტორის, ზურაბ იაშვილის საქმის არსებითი განხილვა სასამართლოში 3 იანვარს დაიწყება. ამის შესახებ თბილისის საქალაქო სასამართლოში სხდომის დასრულების შემდეგ გახდა ცნობილი. 

ნიკა გვარამიას ადვოკატმა, დიმიტრი საძაგლიშვილმა სხდომის დაწყებამდე ჟურნალისტებს განუცხადა, რომ დღევანდელ პროცესზე სასამართლოს შუამდგომლობით მიმართავდა, რათა სისხლის სამართლებრივი დევნა შეწყვეტილიყო ნიკა გვარამიას მიმართ. თუმცა როგორც პროცესის დასრულების შემდეგ გახდა ცნობილი, ეს შუამდგომლობა არ დაკმაყოფილდა და არსებითი განხილვა 3 იანვარს დაიწყება. დაცვის მხარის შუამდგომლობის ნაწილი დაკმაყოფილდა. ადვოკატების მოთხოვნით, ამ საქმეზე ბიზნესმენი ქიბარ ხალვაში და ტელეკომპანიის ყოფილი მეწილე ნინო ნიჟარაძე მოწმის სახით დაიკითხებიან. 

„ამ ქვეყანაში ჩემთან და რუსთავი2-თან დაკავშირებული საქმეები განიხილება სწრაფად, შეყოვნების გარეშე. საქმეები მიმდინარეობს 5 წელი და გვავიწყდება ხოლმე საერთოდ საქმე რომ არსებობს. ამ საქმესთან დაკავშირებით სისწრაფეს ვხედავთ - ვნახოთ, თუ შემდეგმა მოსამართლემაც იგივე ტემპით განაგრძო, ეს ნიშნავს, რომ დაკვეთაა, სწრაფად დასრულდეს საქმე“, - განუცხადა გვარამიამ ჟურნალისტებს.  

საქართველოს გენერალურმა პროკურატურამ „რუსთავი 2“-ის ყოფილი გენერალური დირექტორის, ნიკა გვარამიას საქმეზე თბილისის საქალაქო სასამართლოს აღკვეთის ღონისძიების შეფარდების შუამდგომლობით 10 აგვისტოს  მიმართა. 11 აგვისტოს სასამართლომ ნიკა გვარამიას 40 000 ლარის გირაო შეუფარდა, რომელიც გვარამიამ 9 სექტემბერს გადაიხადა.

6 სექტემბერს ნიკა გვარამიას კიდევ ერთი ბრალი წარედგინა. ახალი ბრალის ერთ-ერთი ეპიზოდის თანახმად, გენერალური პროკურატურა „რუსთავი 2“-ის ყოფილ დირექტორს, ნიკა გვარამიას დიდი ოდენობით უძრავი ქონების უკანონოდ დაუფლებას ედავება. 1-ელ ნოემბერს პროკურატურამ გვარამიას ახალი ბრალდება 76 700 ევროდ ღირებული ავტომობილის ეპიზოდზე წარუდგინა.