მოსამართლემ გვარამია 500 ლარით დააჯარიმა, საქმეზე კი თვითაცილება გამოაცხადა

ნიკა გვარამიას, კახა დამენიასა და ზურაბ იაშვილის საქმის მოსამართლე გიორგი არევაძემ თვითაცილება გამოაცხადა, „მთავარი არხის“ გენერალური დირექტორი კი მოსამართლისა და სასამართლოს შეურაცხყოფის მოტივით 500 ლარით დააჯარიმა. ამის შესახებ გიორგი არევაძემ დღევანდელ სასამართლო სხდომაზე განაცხადა. მოსამართლესა და ნიკა გვარამიას შორის სხდომაზე მწვავე კამათი იყო.  

„მას შემდეგ რაც პროცესი დატოვეთ, გააკეთეთ განცხადებები, თუნდაც სოციალურ ქსელში. მე ვარ საქმის განმხილველი მოსამართლე და მნიშვნელოვანია, ვის გულისხმობდით, ვის მიმართ იყო შეურაცხმყოფელი სიტყვები. ამ ყველაფრის გათვალისწინებით, საქმეზე ჩემი გადაწყვეტილება შესაძლოა, ჩაითვალოს მიკერძოებულად. საქალაქო სასამართლოს თავმჯდომარე გადაწყვეტს, ვინ იქნება შემდგომში თქვენი საქმის განმხილველი მოსამათლე“, - მიმართა მოსამართლემ გვარამიას. 

ნიკა გვარამიამ სხდომის შემდეგ განაცხადა, რომ ეს იყო კლოუნადა, თვითაცილება იყო გარდაუვალი, რომელიც ერთ კაბინეტში დაიგეგმა და ამაზე მოგვიანებით ისაუბრებს. 

„მოუსმინეთ თქვენი ყურით, რომ სიტყვა - არაადეკვატური, თურმე აკრძალული შეფასებაა. არაადეკვატური კი არა, დამნაშავე სასამართლო სისტემასთან გვაქვს საქმე. რომელ ადეკვატურობაზე ვლაპარაკობთ?! თვითაცილება წინასწარ ვიცოდი, რომ დღეს მოხდებოდა. ზუსტად ვიცი, რომელ კაბინეტში ვის მიერ დაიგეგმა. ისიც ვიცი, რატომ, გამოიტანეს ჩემი სხდომაზე უკან დაბრუნების გადაწყვეტილება. იმიტომ, რომ ასე იყო საჭირო და რომ ყველაფერი არ გამოვა ამ ქვეყანაში.

ყოველდღე ჩანიშნული პროცესები, მთავარი მედია დირექტორების და ოპოზიციონერების დაჭერა არ გამოვა ქვეყანაში. მარტო არ ვართ ჩვენ „მარტო სახლში“ დატოვებული გიჟებივით. წინასწარ ვიცოდი, რომ ეს თვითაცილება იქნებოდა“, - განაცხადა ნიკა გვარამიამ. 

საქართველოს გენერალურმა პროკურატურამ „რუსთავი 2“-ის ყოფილი გენერალური დირექტორის, ნიკა გვარამიას საქმეზე თბილისის საქალაქო სასამართლოს აღკვეთის ღონისძიების შეფარდების შუამდგომლობით 10 აგვისტოს  მიმართა. 11 აგვისტოს სასამართლომ ნიკა გვარამიას 40 000 ლარის გირაო შეუფარდა, რომელიც გვარამიამ 9 სექტემბერს გადაიხადა.

6 სექტემბერს ნიკა გვარამიას კიდევ ერთი ბრალი წარედგინა. ახალი ბრალის ერთ-ერთი ეპიზოდის თანახმად, გენერალური პროკურატურა „რუსთავი 2“-ის ყოფილ დირექტორს, ნიკა გვარამიას დიდი ოდენობით უძრავი ქონების უკანონოდ დაუფლებას ედავება. 1-ელ ნოემბერს პროკურატურამ გვარამიას ახალი ბრალდება 76 700 ევროდ ღირებული ავტომობილის ეპიზოდზე წარუდგინა.