აპატურაი: რუსეთის მიერ საქართველოსთვის დაწესებული შეზღუდვა სწრაფად უნდა მოიხსნას

ნატოს წევრი ქვეყნების პოზიციაა რომ, რაც არ უნდა მოხდეს, არ უნდა ჰქონდეს ადგილი ძალადობას, არ უნდა გავიდეს პროცესები კანონის ჩარჩოებს მიღმა, - განუცხადა „ქრონიკას“ ცენტრალურ აზიასა და კავკასიაში ნატოს გენერალური მდივნის სპეციალურმა წარმომადგენელმა ჯეიმს აპატურაიმ საქართველოში განვითარებული ბოლოდროინდელი მოვლენების შეფასებისას.  

„ნატოს წევრ სახელმწიფოებს სურთ, იხილონ საქართველოში დაძაბულობის შემცირება და ღია, მშვიდი პოლიტიკური მსჯელობა საკითხებზე, რომლებიც მნიშვნელოვანია საქართველოსთვის, ქვეყნის და მოსახლეობის მომავლისთვის.

ყოვლად მიუღებელია რუსეთიდან დაწესებული ნებისმიერი სახის შეზღუდვა მოგზაურობაზე ან ვაჭრობაზე. ეს არის უმნიშვნელოვანესი საქართველოს ეკონომიკისთვის და რაც შეიძლება სწრაფად უნდა მოიხსნას ეს შეზღუდვა“, - განაცხადა ჯეიმს აპატურაიმ. 

აპატურაიმ ასევე ისაუბრა ჩრდილოატლანტიკური საბჭოს ვიზიტზე საქართველოში, რომელიც 3-4 ოქტომბერს შედგება. 

„ჩვენ ვმსჯელობთ, თუ რა შეიძლება უფრო მეტი გავაკეთოთ და რას გავაკეთებთ. ოქტომბერში ჩრდილოატლანტიკური საბჭოს ვიზიტი საქართველოში ნატოს გენერალური მდივნის ხელმძღვანელობით იქნება კარგი შესაძლებლობა, მოხდეს ამ საკითხების არსებითი განხილვა. შავ ზღვის უსაფრთხოების გაძლიერებასთან დაკავშირებით ჩამოყალიბებული აზრი გვაქვს. ეს პრიორიტეტია ნატოსთვის და საქართველო აქტიურადაა ჩართული.

საქართველომ უკვე მოგვაწოდა წინადადებები, როგორ უყურებს შავი ზღვის უსაფრთხოების გაძლიერებას. ნატოს გეგმების შესახებ საგარეო საქმეთა მინისტრებმაც იმსჯელეს. იმპლემენტაციაზე მუშაობა მიმდინარეობს. ჩვენ განვიხილეთ საქართველოს თავდაცვის მინისტრის ბრიუსელში ყოფნისას მზადყოფნის შესახებ წარმოდგენილი იდეებიც. ვფიქრობ, არსებითი პაკეტი გაგრძელდება, განახლდება და გაძლიერდება.

არსებითი პაკეტით გათვალისწინებული ღონისძიებების ნაწილი დასრულდება და დაემატება ახალი კომპონენტები. შეგვიძლია, გავაკეთოთ უფრო მეტი მზადყოფნის კუთხითაც. უახლოეს მომავალში ერთად ვნახავთ, საბოლოოდ რა სახეს მიიღებს და როგორ შევფუთავთ. რაც შეეხება ნატოს სამიტს, ნატოს ლიდერების ლონდონში შეხვედრა იქნება საკმაოდ მცირეხნიანი, მაგრამ იქნება თანმდევი ღონისძიება, რომელზეც ნატოს პარტნიორი ქვეყნები იქნებიან მოწვეული და მათ შორის საქართველო აუცილებლად იქნება“, - განუცხადა „ქრონიკას“ ჯეიმს აპატურაიმ.

 „შეხვედრებზე რუსეთს ჩვენ ყოველთვის ვესაუბრებით მეზობელ ქვეყნებთან ურთიერთობაზე და მათ მიმართ დამოკიდებულებაზე. განსაკუთრებით უკრაინასა და ასევე საქართველოზე. ვსაუბრობთ რუსეთის და ნატოს სამხედრო წვრთნებზე. ჩვენ რუსეთთან ყველა შეხვედრაზე ვამბობთ, რომ ნატო მხარს უჭერს საქართველოს და უკრაინის დამოუკიდებლობას და პოლიტიკურ სუვერენიტეტს.

რუსეთმა პატივი უნდა სცეს საერთაშორისო სამართლის პრინციპებს, აღებულ ვალდებულებებს, მეზობელი სახელმწიფოების ტერიტორიულ მთლიანობას. უკრაინა არის მთავარი საკითხი. რატომ არის უკრაინა მთავარი საკითხი? ძალიან მოკლედ გეტყვით. უკრაინის 30 000-ზე მეტი მოქალაქეა დაღუპული და ეს არ არის გაყინული კონფლიქტი. ეს არის მიმდინარე კონფლიქტი. მეორე მიზეზი, რუსეთმა ყირიმში ისეთი რაოდენობით სამხედრო ტექნიკა განალაგა, რომ შავი ზღვის რეგიონში შეცვალა ვითარება, შექმნა დაძაბულობა, გაზარდა საფრთხეები. ჩვენც პროპორციულად ვმოქმედებთ ამ მიზეზებიდან გამომდინარე. უკრაინის თემა ყოველთვის მოწინავე რიგებშია და ქმნის მთავარ ახალ ამბავს, მაგრამ დღის წესრიგში ყოველთვის არის საქართველო“, - აღნიშნა აპატურაიმ.

21 ივნისს რუსეთის პრეზიდენტმა ხელი მოაწერა ბრძანებას, რომლის თანახმადაც 8 ივლისიდან რუსულ ავიაკომპანიებს საქართველოში რუსეთის მოქალაქეების გადაყვანა აეკრძალათ. მოგვიანებით ვლადიმერ პუტინის პრესმდივანმა, დიმიტრი პესკოვმა განაცხადა, რომ ავიამიმოსვლაზე აკრძალვა მაშინ მოიხსნება, როდესაც საქართველოში ვითარების ნორმალიზება მოხდება.

როგორ აისახება პუტინის ბრძანება ქართულ ეკონომიკაზე? - ვრცლად წაიკითხეთ ამ ბმულზე.