ადვოკატი: ავთანდილ წერეთელი პროკურატურის ბრალდებას აბსურდულს უწოდებს

ბიზნესმენი ავთანდილ წერეთელი გენერალური პროკურატურის მიერ წაყენებულ ბრალდებას აბსურდულს უწოდებს. მისი ადვოკატი კახა წერეთელი ამბობს, რომ ავთანდილ წერეთელი უდანაშაულოა.

პასუხისგებაში მიცემული წერეთელი 29 აგვისტომდე საქართველოში არ იქნება, ამიტომ დღეს 18:00 საათზე გენერალურ პროკურატურაში მისი ადვოკატი მივა და საქმის მასალებს ჩაიბარებს.

„აბსურდულია ბრალდება და აბსურდად მიაჩნია თავად ავთანდილ წერეთელსაც. ამჟამად ის საქართველოში არ არის და პროკურატურაში მხოლოდ მე გამოვცხადდები“,- განაცხადა ადვოკატმა.

უკავშირებს თუ არა ავთანდილ წერეთელი მის მიმართ დაწყებულ სამართლებრივ დევნას ტელეკომპანის „პირველის“ საქმიანობას, ადვოკატი აცხადებს, რომ არასამართლებრივ დეტალებზე ვერ ილაპარაკებს და ამის თაობაზე თავად ავთანდილ წერეთელი გააკეთებს განცხადებას. 

„მესამე წელია, ყველაფერს აკეთებთ. ყველა გზა და მეთოდი სცადეთ, მაგრამ არაფერი გამოგივიდათ. ახლა ყველაზე ძვირფასი ადამიანით მაშანტაჟებთ და აბსურდული საქმე აღძარით?!“ - ამ სიტყვებით მიმართა პროკურატურას ტელეკომპანია „პირველის“ დამფუძნებელი ვატო წერეთელი მამის, ავთანდილ წერეთლის წინააღმდეგ საქმის აღძვრის გამო.

გენერალურმა პროკურატურამ ბიზნესმენ ავთანდილ წერეთლის წინააღმდეგ სისხლის სამართლის საქმე აღძრა. ამასთან დაკავშირებით პროკურატურაში ბრიფინგი გაიმართა. საგამოძიებო უწყების განმარტებით საქმე ეხება „თიბისი ბანკის“ ხელმძღვანელების მიერ უკანონო შემოსავლების ლეგალიზაციაში დახმარებას.

დღესვე პროკურატურაში დაიბარეს მამუკა ხაზარაძე და ბადრი ჯაფარიძე. 

ვატო წერეთელმა 8 აგვისტოს სასამართლოში დაკითხვიდან გამოსვლის შემდეგ ივარაუდა, რომ პროკურატურას ავთანდილ წერეთლის წინააღმდეგ საქმის აღძვრა სურდა.

ვატო წერეთელმა დაკითხვაზე გამოძახება ტელეკომპანია „პირველს“ დაუკავშირა, ამის საფუძვლად კი ის გარემოება დაასახელა, რომ „ტელეკომპანიის“ „წინააღმდეგ შეტევა ადრეც ყოფილა“.