ბახტაძე: აშშ-სთან, ევროკავშირსა და ნატოსთან ურთიერთობები უმაღლეს ისტორიულ ნიშნულზეა

საქართველოს ყოფილი პრემიერმინისტრის მამუკა ბახტაძის განცხადებით, ის სიამაყით აღნიშნავს, რომ დღეს ამერიკის შეერთებულ შტატებთან, ევროკავშირსა და ნატოსთან ურთიერთობები უმაღლეს ისტორიულ ნიშნულზეაა. ამის შესახებ ის Facebook-ზე გამოქვეყნებულ განცხადებაში წერს.

ყოფილი პრემიერის განცხადებით, მთავრობის უმთავრესი ამოცანა იყო ხარისხობრივად ახალ დონეზე ასულიყო მერიკის შეერთებულ შტატებთან, ევროკავშირსა და ნატოსთან ურთიერთობები. 

მამუკა ბახტაძის განცხადებით, ქვეყნის საერთაშორისო პოზიციები ასეთი ძლიერი არასდროს ყოფილა და მას სჭირდება განსაკუთრებული მოფრთხილება და შემდგომი განმტკიცება.

„ევროინტეგრაცია - ეს არ არის მხოლოდ ჩვენი პოლიტიკური არჩევანი, როგორც ხშირად პოლიტიკოსები მოიაზრებენ, ევროინტეგრაცია არის ჩვენი ერის ცივილიზაციური არჩევანი.დღეს ჩვენ ვართ ევროკავშირის ასოციირებული წევრები, გვაქვს ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCFTA), ვიზა ლიბერალიზაცია რამაც პირდაპირი და ხელშესახები შედეგები მოუტანა ჩვენს ხალხს. საქართველო დღეს არის იმაზე ახლოს ევროპულ ოჯახთან, ვიდრე ოდესმე ყოფილა“, - აცხადებს მამუკა ბახტაძე.

მისი თქმით, ყველა პარტნიორი ერთხმად აღიარებს, რომ საქართველო არის ლიდერი სახელმწიფო აღმოსავლეთის პარტნიორ ქვეყნებს შორის.

„ჩვენ გვჭირდება კონკრეტული გეგმა შემდგომი ფაქტობრივი ინტეგრაციისთვის  ევროპულ სივრცეში, ვიდრე ევროკავშირს ექნება შესაძლებლობა,  მოგვცეს ევროკავშირის წევრობის ოფიციალური პერსპექტივა. სწორედ ამიტომ, ჩვენ: შევიმუშავეთ ევროკავშირში ინტეგრაციის საგზაო რუკა (Roadmap2EU); ბათუმის კონფერენციაზე ვიმსჯელეთ ფაქტობრივი ინტეგრაციისათვის საჭირო დამხმარე მექანიზმებზე, სადაც ნათლად გამოჩნდა, რომ ევროკავშირის მხრიდან არის მზადყოფნა და ჩვენგან ელიან ინიციატივებს; ევროკავშირთან ერთად შევიმუშავეთ უნიკალური ფორმატი, რომელიც შეიქმნა სპეციალურად საქართველოსთვის − ჩვენი ქვეყნის ისტორიაში პირველად გაიმართა უმაღლესი დონის შეხვედრა საქართველოს მთავრობისა და ევროკომისიის წევრების მონაწილეობით ბრიუსელში; სექტორული ინტეგრაცია არის  ევროკავშირში ფაქტობრივი ინტეგრაციის საუკეთესო გზა. ჩვენი ევროპული ცივილიზაციური არჩევანი განპირობებულია ჩვენი ისტორიითა და უნიკალური კულტურით. ჩვენი კულტურა არის ევროპული ცივილიზაციის ნაწილი, უფრო მეტიც −  ჩვენ  განსაკუთრებული წვლილი გვაქვს შეტანილი ევროპული ცივილიზაციის შექმნაში. შესაბამისად, განსაკუთრებით ემოციური და პრაგმატულადაც უმნიშვნელოვანესია, რომ სრულფასოვანი სექტორალური ინტეგრაციის პირველი ნაბიჯები ხორციელდება სწორედ კულტურისა და განათლების სფეროებში“, - აცხადებს მამუკა ბახტაძე. 

მისი თქმით, მნიშვნელოვანია ცირკულარული შრომითი მიგრაციის (ლეგალური დასაქმება ევროპაში) შესახებ მოლაპარაკებები ევროკავშირის წევრ სახელმწიფოებთან.

„სანამ საქართველო გახდება ევროკავშირის წევრი, საქართველოს ევროპასთან ფაქტობრივი ინტეგრაციის საუკეთესო მექანიზმად მიმაჩნია საქართველოს ევროპის ეკონომიკურ სივრცეში გაწევრიანება (European Economic Area)“, - აცხადებს მამუკა ბახტაძე.

საქართველოს პრემიერმინისტრმა მამუკა ბახტაძემ თანამდებობა დატოვა. 

მამუკა ბახტაძე საქართველოს პრემიერმინისტრის პოსტს 2018 წლის 20 ივნისიდან იკავებდა. ამ პოსტზე მან გიორგი კვირიკაშვილი შეცვალა. 2017 წლის 13 ნოემბრიდან 2018 წლის 20 ივნისამდე ბახტაძე ფინანსთა სამინისტროს ხელმძღვანელობდა, მინისტრად დანიშვნამდე კი, 2013-2017 წლებში იყო საქართველოს რკინიგზის გენერალური დირექტორი.