ბახტაძე ამბობს, რომ გადადგომის სურვილი გაზაფხულზე გაუჩნდა

საქართველოს ყოფილი პრემიერმინისტრის მამუკა ბახტაძის განცხადებით, მომავალი პრემიერმინისტრის კანდიდატურაზე კონსულტაციები ჯერ არ დასრულებულა. ამის შესახებ მან ტოქშოუების წამყვანებთან შეხვედრაზე, ტელეკომპანია „იმედის“ წამყვანის ხატია ქვათაძის შეკითხვაზე პასუხად განაცხადა.

„ბუნებრივია, დღეს აქტუალურია თემა, თუ ვინ იქნება პრემიერმინისტრობის ახალი კანდიდატი. გიდასტურებთ, რომ ამ დღეებში გვქონდა კონსულტაციები, დღეს საღამოს და ხვალ დილითაც გვექნება. ჩემი მხრიდან არაკორექტული იქნება ამ კონსულტაციების შინაარსზე საუბარი, ამიტომ ნუ გავუსწრებთ მოვლენებს და სამშაბათის დილას დაველოდოთ“, - განაცხადა ბახტაძემ კითხვაზე, მზად არის თუ არა საზოგადოება იმისთვის, რომ პრემიერმინისტრის პოსტზე გიორგი გახარია იხილოს.

აჭარის ტელევიზიის ჟურნალისტის ნინო ხოზრევანიძის კითხვაზე, რატომ მიიღო ბახტაძემ თანამდებობიდან წასვლის გადაწყვეტილება და ჰქონდა თუ არა ამაზე საუბარი პარტიის თავმჯდომარე ბიძინა ივანიშვილთან, ბახტაძემ განაცხადა, რომ ის მოვიდა კონკრეტული მიზნით და მანდატით და ეს მიზანი შესრულებულია.

„გადადგომაზე საუბარი ბიძინა ივანიშვილთან გაზაფხულის ბოლოს დავიწყე და ეს რამდენიმე თვე გაგრძელდა. როდესაც მთავრობაში დავინიშნე, ეს არ გაკეთებულა იმისთვის, რომ მინისრტთა კაბინეტს რაღაც ჩამოუყალიბებელი მიზნები ჰქონოდა. ჩვენ გვქონდა კონკრეტული მიზნები. ჩვენი ამოცანა იყო, შეგვექმნა სტრატეგიული განვითარების საბჭო, დაგვეწყო მისი დანერგვა და უზრუნველგვეყო მისი მდგრადობა. ეს ყველაფერი გაკეთდა და უკვე გაზაფხულის ბოლოს მე მქონდა იმის შესაძლებლობა, რომ ეს საკითხი წამომეწია. შემიძლია ისიც გითხრათ, რომ თავიდან ამაზე თანხმობა არ ყოფილა და გვქონდა აზრთა სხვადასხვაობა“, - აღნიშნა ყოფილმა პრემიერმა.

პრემიერთან შეხვედრას ესწრებიან ჟურნალისტები: ხატია ქვათაძე, თამთა სანიკიძე, თამარ ჩიხლაძე, ნანუკა იორდანიშვილი, ირაკლი მეტრეველი, ემა ტუხიაშვილი, ბონდო მძინარაშვილი, ნინო ხოზრევანიძე.

საქართველოს პრემიერმინისტრმა მამუკა ბახტაძემ თანამდებობა დღეს, 2 სექტემბერს დატოვა.

ის საქართველოს პრემიერმინისტრის პოსტს 2018 წლის 20 ივნისიდან იკავებდა. ამ პოსტზე მან გიორგი კვირიკაშვილი შეცვალა. 2017 წლის 13 ნოემბრიდან 2018 წლის 20 ივნისამდე ბახტაძე ფინანსთა სამინისტროს ხელმძღვანელობდა, მინისტრად დანიშვნამდე კი, 2013-2017 წლებში იყო საქართველოს რკინიგზის გენერალური დირექტორი.