რა განცხადებები გაკეთდა სესიაზე მინისტრობის კანდიდატების დასახელების შემდეგ. მთავარი

მმართველი გუნდი ოპოზიციას დესტრუქციულ ქმედებებში ადანაშაულებს, იმ ახალგაზრდებს კი, რომლებიც პარლამენტთან შეიკრიბნენ, უახლესი ისტორიის გადახედვისკენ მოუწოდებენ.  გარდა ამისა, მმართველი გუნდის კანდიდატები აცხადებენ, რომ „ნაციონალური მოძრაობის“ და „ევროპული საქართველოს“ პროტესტი მიზანმიმართულია და ოპოზიცია 2020 წლის საპარლამენტო არჩევნებისთვის ემზადება.

პარლამენტის თავმჯდომარის არჩილ თალაკვაძის თქმით, ის არავის მისცემს რეგლამენტის დარღვევის საშუალებას.

„როგორც პარლამენტის თავმჯდომარე, მივესალმები ჩვენს ქვეყანაში დემოკრატიის ნებისმიერ გამოვლინებას, ნებისმიერ პროტესტსა და გამოხატვის თავისუფლებას, რაც კანონმდებლობის ფარგლებში ჯდება. ასევე, არავის მივცემთ საშუალებას დაარღვიოს რეგლამენტი და ხელი შეუშალოს საქართველოს პარლამენტის საქმიანობას. შესაბამისად, ჩვენი კოლეგების პროტესტი, როგორც ნახეთ, იყო გამოხატული. კარგია, რომ მედიამ საზოგადოებას აჩვენა თუ რა ფორმები აირჩიეს მათ. ეს არის მათი არჩევანი. ჩვენ კი ვაგრძელებთ საქართველოს პარლამენტის სხდომას“, - განაცხადა თალაკვაძემ.

„ქართული ოცნების“ თავმჯდომარემ მამუკა მდინარაძემ კი თქვა, რომ „გავრილოვის რევოლუცია“ არ შედგა. „სირცხვილია პარლამენტარის მიერ პარლამენტზე შტურმის მოწოდება. სირცხვილია ახალგაზრდებით მანიპულირება. სირცხვილია „გავრილოვის რევოლუციის“ დაგეგმვა, რომელიც შემდეგ აღიკვეთა. სირცხვილია პოლიციელზე ძალადობა. სირცხვილია ლაპარაკი იმის, რომ აგვისტოს ომით ამოისუნთქეს. სირცხვილია აგვისტოს ომიდან 2 თვეში მათი მხარდაჭერილი რეზოლუციის „გაპრავება“ და თითქოს ეს იყო დიპლომატიური გამარჯვება. ასეთი თავხედობაც ეყოთ. სირცხვილია ტყუილების ლაპარაკი აბსოლუტურად ყველა თემაზე. სირცხვილია წამების, მკვლელობების, სიტყვის თავისუფლების მკვლელების მხრიდან მორალზე ლაპარაკი. და სირცხვილია ოკუპაციის შედეგებს უპროტესტებდე „ქართულ ოცნებას“ და თავად იყო „ნაციონალური მოძრაობა“, - აცხადებს მამუკა მდინარაძე.

თავის მხრივ, გია ვოლსკიმ ოპოზიცია დესტაბილიზაციის სურვილში დაადანაშაულა.

„საზოგადოებას კარგად ესმის, რომ მკვლელობა, წამება, შეურაცხყოფა იყო სახელმწიფოს სტრატეგია. ეს სტრატეგია სახელმწიფოს არ გააჩნია და არც მაშინ იყო, როცა იგერიებდა შეტევას პარლამენტზე. და დღეს ვისაც სენტიმენტი გააჩნია, დაფიქრდეს კიდევ ვის ექნებოდა და რა იქნებოდა ჩვენს ქვეყანაში მთავარი პრობლემა. დესტაბილიზაცია. დესტაბილიზაცია, რომელიც ესოდენ უნდათ“, - განაცხადა ვოლსკიმ.  

ბექა ნაცვლიშვილმა კი „ნაციონალური მოძრაობის“ გაძლიერებაში მმართველი გუნდი დაადანაშაულა.

„როდესაც თქვენ საშუალებას აძლევთ „ნაციონალურ მოძრაობას“ და “ევროპულ საქართველოს“ ისევ აი ამ კატეგორიაში ილაპარაკოს: პრორუსული, პროდასავლური, და ამ უაზრო დისკუსიებში შედიხართ თქვენც. იცით, რატომ შედიხართ? იმიტომ რომ თქვენთვისაც კომფორტულია. იმიტომ რომ თუ ამაზე არ ილაპარაკეთ, უნდა ილაპარაკოთ სიღარიბეზე, ეკონომიკაზე, განათლებაზე, გაჭირვებაზე, რომელიც ქვეყანაშია. მაგრამ ამაზე თქვენ ლაპარაკი არ გინდათ, რადგან ამ პრობლემებზე პასუხი არ გაქვთ“, -  განაცხადა  ნაცვლიშვილმა.

პარლამენტის საშემოდგომო სესია საქართველოს ჰიმნით გაიხსნა, თუმცა ჰიმნის დასრულებისთანავე „ევროპული საქართველოს“ წევრებმა პროტესტის ერთგვარ ფორმას მიმართეს და მინისტრთა კაბინეტში ცვლილებების შესახებ დღეს გაჟღერებული გადაწყვეტილება სასტვენებით გააპროტესტეს.