ბათუმში გიორგი გახარიას პრემიერმინისტრობის კანდიდატად დასახელებას აპროტესტებენ

„სირცხვილია, წადი“, - ამ ლოზუნგით ბათუმში გიორგი გახარიას პრემიერმინისტრის კანდიდატად დასახელებას აპროტესტებენ. 

ევროპის მოედანზე შეკრებილები აცხადებენ, რომ გახარიას დაწინაურება სირცხვილია. მათივე თქმით, 20 ივნისს აქციის დარბევისთვის გახარიამ პასუხი უნდა აგოს.

„ეს სახელისუფლებო ცვლილებები არის ხალხის სულში ჩაფურთხება. 78-ე დღეა ვითხოვთ გახარიას გადადგომას, ის პასუხისმგებელია 20 ივნისის ღამეზე და უნდა წავიდეს სახლში. ამ ფონზე კი გახარია ბიძინა ივანიშვილმა დააწინაურა. ადამიანები, რომლებიც ძალაუფლებას ამეტებენ უნდა ისჯებოდნენ. ეს სამთავრობო ცვლილებები არის სამარცხვინო და მას საზოგადოებრივი მხარდაჭერა არ აქვს“, - განაცხადა აქციის ერთ-ერთმა ორგანიზატორმა გიორგი ნონიაშვილმა.

„ადამიანს, რომელმაც ანტისაოკუპაციო აქცია დახვრიტა, ივანიშვილი პრემიერად გვთავაზობს - ეს არის ქართველი ხალხის წარმოუდგენელი შეურაცხყოფა. არ შეიძლება გახარია იყოს საქართველოს მთავრობის წევრი“, - განაცხადა ნაციონალური მოძრაობის წევრმა გიორგი კირთაძემ. 

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ, ბიძინა ივანიშვილმა, წარადგინა. 

გიორგი გახარიას გადადგომას აქციის მონაწილეები თბილისში, რუსთაველის გამზირზე რამდენიმე თვეა ითხოვენ.

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა სცადა. სპეცრაზმმა აქციის დაშლისას რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი თვალი დაკარგა.

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.