პარლამენტში მინისტრობის კანდიდატებს „ქართული ოცნება“ უსმენს

მთავრობის ახალი შემადგენლობის განხილვა მმართველი გუნდის წარმომადგენლებმა დაიწყეს.

ფრაქცია „ქართული ოცნების“ თავმჯდომარე მამუკა მდინარაძე დაინტერესდა, რა ტიპის ტყვიები გამოიყენა შინაგან საქმეთა სამინისტრომ, ვისი ბრძანებით, რა საფუძვლით მოხდა მათი გამოყენება და ზოგადად, ვინ მიიღო გადაწყვეტილება სპეციალური საშუალებების გამოყენებაზე. 

დეპუტატი აკაკი ზოიძე კი დაინტერესდა, რა კონკრეტული ნაბიჯები იგეგმება და გადაიდგმება, ერთი წლის განმავლობაში,  სიღარიბის შემცირებისთვის და ადამიანთა ცხოვრების დონის გაუმჯობესებისთვის.

გიორგი გახარიას თქმით, ყველა უნდა შეთანხმდეს საქართველოში, რომ პოლიტიკური რეალობა ფიზიკური ძალადობით ვეღარ შეიცვლება. ამისთვის არსებობს არჩევნები, პარლამენტი და მიკროფონი. პრემიერმინისტრობის კანდიდატმა იმედი გამოთქვა, რომ პარლამენტში მიკროფონს აღარ გამორთავენ.

გიორგი გახარიას განცხადებით, პოლიციას და შსს-ს ვერავინ ვერ გაუჩენს კომპლექსს, რომ სახელმწიფომ თავისი ინსტიტუტები დაიცვას ფიზიკური ძალადობისგან.

მისივე თქმით, არც ერთი ნაკლებად ლეტალური, თუნდაც ასეთი განმარტებით, რეზინის ტყვია, შსს-ს აღჭურვილობაში არ არსებობს.

დღეს თითქმის სამი საათის განმავლობაში განიხილავდნენ ფრაქცია „პატრიოტთა ალიანსის“ წევრები მთავრობის ახალ შემადგენლობას. დაისვა სხვადასხვა შეკითხვა. მათ შორის, სამართლიანობის აღდგენა, ოკუპირებული ტერიტორიები, განათლება და ეკონომიკა. 

8 სექტემბერს კი პლენარული სხდომა გაიმართება, სადაც მთავრობის დამტკიცებისთვის მმართველ გუნდს 76 დეპუტატის მობილიზება დასჭირდება.

გუშინ„ევროპულმა საქართველომ“ გახარიას პასუხებს არ მოუსმინა და სხდომა დაასრულა. ანალოგიური ფაქტი დაფიქსირდა „ნაციონალური მოძრაობის“ შემთხვევაშიც. 

გახარიას „ნაციონალური მოძრაობის“ ფრაქციის სხდომაზე უსმენდნენ, სადაც მაკო გომურისა და მოძრაობა „სირცხვილიას“ წევრების დაშვებას ითხოვდნენ. ამის შემდეგ მაკო გომურმა Facebook-ზე დაწერა, რომ კახეთში იმყოფებოდა და მისთვის საშვის დაშვების შესახებ მხოლოდ სხდომის დაწყებამდე 5 წუთით ადრე გაიგო. მოგვიანებით მან საკუთარი პოსტი წაშალა.

მალევე აქციის ორგანიზატორებმა განაცხადეს, რომ მაკო გომურს ჰქონდა ინფორმაცია, რომ მასზე საშვი იყო დაშვებული. აქციის სხვა მონაწილეების თქმითაც, იმ ადამიანებს შორის იყო მაგო გომურიც, ვისზეც საშვი იყო დაშვებული.

მოგვიანებით ხოშტარიამ პრემიერობის კანდიდატს მაკო გომურის შეკითხვა წაუკითხა. მაკო გომურმა 20 ივნისის აქციის დაშლის დროს თვალი დაკარგა. 

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი.