გიორგი გახარია: სიმართლე იქნება ჩვენი ძირითადი იარაღი

პრემიერმინისტრობის კანდიდატმა გიორგი გახარიამ საპარლამენტო ტრიბუნიდან დეპუტატებს მიმართა. მისი განცხადებით, პროპაგანდა და სიცრუე მოქალაქეზე პირდაპირი ზემოქმედების ინსტრუმენტი გახდა.  

„პროპაგანდა და სიცრუე გახდა პირდაპირი ზემოქმედების ინსტრუმენტი მოქალაქეზე, რომელსაც უქმნიან რაღაც აპოკალიფსის შეგრძნებას და ქმნიან ამით რაღაც სახელმწიფო გადატრიალების მოლოდინებს. ეს არის მხოლოდ და მხოლოდ რევანშისტული ინსტრუმენტი. ერთადერთი ინსტრუმენტი, რომელიც დღეს დარჩათ ხელში და რომელსაც იყენებენ.

როდესაც ჩვენ ვამბობთ, რომ სიმართლე (არ ვამბობთ სიმართლე განზოგადებულად ვიღაცისთვის, ჩვენთვისაც), ეს სიმართლის ინსტრუმენტები და სიმართლე, როგორც არგუმენტი მივცეთ ჩვენს მოქალაქეებს საშუალება სწორად შეაფასონ ობიექტური რეალობა. მე ვფიქრობ, რომ ეს სიმართლე უნდა გვესმოდეს და გავითვალისწინოთ, რომ ეს პირველ რიგში შეიძლება იყოს ჩვენს წინააღმდეგ მიმართული მაშინ, თუ ჩვენ არ ვიქნებით ეფექტურები, შედეგიანები და კეთილსინდისიერები და ამის მოთმენა მოგვიწევს“, - განაცხადა გიორგი გახარიამ.

პარლამენტის პლენარულ სხდომაზე მინისტრობის კანდიდატებმა დეპუტატების კითხვებს უპასუხეს. რეგლამენტის თანახმად, კითხვა-პასუხის რეჟიმის დასრულების შემდეგ გათვალისწინებულია კომიტეტების, ფრაქციების და დეპუტატების გამოსვლები, რის შემდეგაც პარლამენტი მთავრობისთვის ნდობის გამოცხადების საკითხს უყრის კენჭს.

მთავრობისთვის დასამტკიცებლად 76 დეპუტატის მხარდაჭერა არის საჭირო, პლენარული სხდომის დაწყებამდე რეგისტრაცია 104-მა დეპუტატმა გაიარა.

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი.