აპატურაი: ქართველი სამხედროები ისეთი პროფესიონალები არიან როგორც კანადელები ან ამერიკელები

3-4 ოქტომბერს საქართველოში ჩრდილოატლანტიკური საბჭოს ვიზიტი შედგება, რომელსაც ნატოს გენერალური მდივნის მოადგილე როუზ გოტემიულერი უხელმძღვანელებს. ამის შესახებ ცენტრალურ აზიასა და კავკასიაში ნატოს გენერალური მდივნის სპეციალურმა წარმომადგენელმა ჯეიმს აპატურაიმ "ქრონიკასთან" ინტერვიუში განაცხადა.

აპატურაის განცხადებით, ნატოს სურს საქართველოს მიმართ ძლიერი პოლიტიკური მხარდაჭერის დემონსტრირება მოახდინოს. 

"ნატოს ისტორიაში ჩრდილოატლანტიკური საბჭო საქართველოში ყველაზე მეტჯერ იმყოფებოდა, ვიდრე სხვა რომელიმე ქვეყანაში. ქართველმა ხალხმა იცის, თუ რამდენად მნიშვნელოვანია ნატოსთვის ეს მჭიდრო ურთიერთობა. ჩრდილოატლანტიკური საბჭო შეაფასებს და შეაჯამებს ჩვენს თანამშრომლობას და ეს განსაკუთრებით ეხება არსებით პაკეტს", - განაცხადა აპატურაიმ.

მისი თქმით, ჩრდილოატლანტიკური საბჭო ადგილზე გაეცნობა თავდაცვის სფეროში მიმდინარე რეფორმებს, რომელსაც საქართველო ნატოს მხარდაჭერით ახორციელებს, ასევე საუბარი შეეხება სამომავლო გეგმებს, " ნატოში საქართველოს მომავალ წევრობისთვის მზადებაზე", - თქვა აპატურაიმ.

"შემდგომ გეგმებთან დაკავშირებით ბევრი იდეაა. გვაქვს ნატო-საქართველოს არსებითი პაკეტი, რომელიც ბევრ ელემენტს შეიცავს. პაკეტის შემადგენელი ელემენტების ნაწილი მალე წარმატებით დასრულდება, ნაწილის იმპლემენტაცია გაგრძელდება და დაემატება თანამშრომლობის ახალი სფეროები. თანამშრომლობის ახალი მიმართულება მოიცავს შავ ზღვას. საქართველომ წარმოგვიდგინა ახალი იდეები. ჩვენც გვაქვს წინადადებები. ახლა ინტენსიურად ვმსჯელობთ, თუ როგორ გავაღრმავოთ შავი ზღვის უსაფრთხოების უზრუნველსაყოფად თანამშრომლობა.

საქართველო აქტიურადაა ჩართული პროცესში. საუბარია ახალ იდეებზე, რომლებიც ეფუძნება იმას, რაც უკვე ერთად გავაკეთეთ. ვფიქრობ ვიზიტისთვის უკვე მზად ვიქნებით. ნატოს მხარდაჭერით განხორციელებული რეფორმები საქართველოს ეხმარება სტანდარტების დაკმაყოფილებაში, რაც აუცილებელია ნატოში გასაწევრიანებლად. ამ ბოლო წლებში უამრავი რამ გაკეთდა და ეს მიმდინარეობდა ნატო-საქართველოს ერთობლივი პაკეტის ფარგლებში. წვრთნა, დაგეგმვა, ოპერაციებისთვის მზადება, საქართველოს შეიარაღებული ძალების უნარი სხვა ქვეყნებთან ერთად მუშაობის, ტექნიკური საკითხები, ლოჯისტიკა.

როდესაც ვუყურებ საქართველოს შეიარაღებულ ძალებს და ვადარებ იმას, თუ რა იყო 5 -10 წლის წინ ვრწმუნდები, რომ უდიდესი ცვლილებაა. ისინი პროფესიონალები არიან. ისეთი პროფესიონალები, როგორც მაგალითად, კანადელები ან ამერიკელები და დარწმუნებული ვარ, რომ ქართველებსაც ასეთი შეფასება აქვთ. მათ ძალიან კარგად იციან რასაც აკეთებენ და ეს არის მათ შორის ნატო - საქართველოს არსებითი პაკეტის დამსახურებაც. ეს არის ავღანეთში ნატოს მიერ წარმოებულ მისიებსა და ოპერაციებში მონაწილეობა. ჩვენ მართლაც ამაყი უნდა ვიყოთ იმით, რაც გაკეთდა", - განაცხადა ჯეიმს აპატურაიმ "ქრონიკასთან" ინტერვიუში. 

მან საქართველოს მთავრობის განახლებულ შემადგენლობასა და თავდაცვის ახალ მინისტრზეც გააკეთა კომენტარი. "დარწმუნებული ვარ თავდაცვის ახალ მინისტრთან მჭიდრო თანამშრომლობას გავარძელებთ", - განაცხადა აპატურაიმ.