აპატურაი: რუსეთმა გააკეთა ყველაფერი საქართველოს ევროატლანტიკური სურვილის გასართულებლად

არის თუ არა საქართველოსთვის ნატოში გასაწევრიანებლად მთავარი დაბრკოლება ოკუპირებული ტერიტორიები? ტელეკომპანია „იმედის“ საინფორმაციო გადაცემა „ქრონიკის“ კითხვას ცენტრალურ აზიასა და კავკასიაში ნატოს გენერალური მდივნის სპეციალური წარმომადგენელი ჯეიმს აპატურაი ჯეიმს აპატურაი ასე პასუხობს: 

„მე არ მინდა დამაბრკოლებელი ფაქტორების ერთმანეთთან შედარება. რა თქმა უნდა, ეს არის სირთულე. ეს არის ერთ-ერთი მიზეზი, რის გამოც რუსეთის ფედერაციამ გააკეთა ის, რაც ყველამ ვნახეთ , რომ გაერთულებინა საქართველოს ეროვნული სურვილი , მისწრაფება დასავლეთისკენ სვლის , ნატოში საქართველოს მომავალი წევრობის , საქართველოს ევროატლანტიკური სივრცის ნაწილად გახდომის. მე არ ვფიქრობ, რომ ისინი მალავდნენ , რომ ეს იყო მათი ერთ-ერთი მთავარი მოტივაცია. ჩვენ ეს ვიცით და ამის მიუხედავად, ნატოს ყველა წევრი სახელმწიფო მტკიცედ და ურყევად უჭერს მხარს საქართველოს ტერიტორიულ მთლიანობასა და სუვერენიტეტს. ნატოს ყველა წევრი სახელმწიფო მხარს უჭერს 2008 წელს ბუქარესტში მიღებულ გადაწყვეტილებას , რომ საქართველო გახდება ნატოს წევრი“, - ამბობს აპატურაი. 

მისი განცხადებით, ნატოს ყველა წევრი სახელმწიფო მხარს უჭერს საქართველოში მიმდინარე რეფორმებს, რაც ქვეყანას ეხმარება მომავალი წევრობისთვის მოსამზადებლად:

„ჩვენ უკან არასდროს დაგვიხევია, ერთგული ვართ ყველა ჩვენი პირობის. აქვს თუ არა რუსეთს ვეტოს უფლება - ეს არის სტანდარტული კითხვა. რაზეც ნატოს პასუხი ყოველთვის იქნება, რომ რუსეთს არ აქვს ვეტოს უფლება. ჩვენ ვაგრძელებთ საქართველოს მხარდაჭერას ყველა მიმართულებით პრაქტიკულ და პოლიტიკურ დონეზე, მაგრამ ასევე ყველამ უნდა გავითვალისწინოთ, რომ ეს არის სირთულე და ამიტომ ვართ აქტიურად ამ რთულ განხილვებში ჩართული. ჩვენ უნდა ერთად ვიმუშაოთ პრაქტიკულ და პოლიტიკურ დონეზე, რათა მივიდეთ იქამდე, სადაც ასე გვსურს ყველას მისვლა“, - აცხადებს აპატურაი. 

ნატოს ყოფილი გენერალური მდივანი ანდერს ფოგ რასმუსენი თბილისში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ, რიგით მეხუთე საერთაშორისო კონფერენციას დაესწრო.

ერთ-ერთი კითხვაზე პასუხის დროს მან განაცხადა, რომ საქართველომ თავად უნდა გადაწყვიტოს სურს თუ არა ალიანსში გაწევრიანება იმ პირობით, რომ ორგანიზაციის წესდების მე-5 მუხლი მხოლოდ მთავრობის მიერ კონტროლირებად ტერიტორიებზე იმოქმედებს. 

ნატოს წესდების მე-5 მუხლის თანახმად, ალიანსის რომელიმე წევრზე თავდასხმა მთელ ალიანსზე თავდასხმად ფასდება.

ვერც ნატოში ვხედავ ამ საკითხის განხილვის სურვილს და არ მიმაჩნია, რომ არსებული საერთაშორისო უსაფრთხოების გარემოს პირობებში ეს იდეა დროული იყოს, ასე გამოეხმაურა ცენტრალურ აზიასა და კავკასიაში ნატოს გენერალური მდივნის სპეციალური წარმომადგენელი ჯეიმს აპატურაი ალიანსის ყოფილი გენმდივნის განცხადების შედეგად გამოწვეულ დისკუსიას.