აპატურაი: ორ რეგიონზე მეხუთე მუხლის გავრცელების გარეშე ნატოში გაწევრიანების იდეა დროული არ არის

ვერც ნატოში ვხედავ ამ საკითხის განხილვის სურვილს და არ მიმაჩნია, რომ არსებული საერთაშორისო უსაფრთხოების გარემოს პირობებში ეს იდეა დროული იყოს, ასე გამოეხმაურა ცენტრალურ აზიასა და კავკასიაში ნატოს გენერალური მდივნის სპეციალური წარმომადგენელი ჯეიმს აპატურაი ალიანსის ყოფილი გენმდივნის განცხადების შედეგად გამოწვეულ დისკუსიას.  

„ვნახე აზრთა გაცვლა საქართველოში, მეხუთე მუხლის ორ რეგიონზე გავრცელების გარეშე ნატოში გაწევრიანებასთან დაკავშირებით. ჩემი აზრით, ამ დროისათვის არ არის შესაფერისი დრო ამ საკითხის განხილვისთვის. მე ვერც ნატოში ვხედავ ამ საკითხის განხილვის სურვილს და არ მიმაჩნია, რომ არსებული საერთაშორისო უსაფრთხოების გარემოს პირობებში ეს იდეა დროული იყოს. 

საქართველოს საელჩო ნატოში აქტიურად უწყობს ხელს მიზანს-მეტი ნატო საქართველოში და მეტი საქართველო ნატოში. პოლიტიკურად და პრაქტიკულად, ეს არის სწორი მიდგომა. მალე საქართველოში ჩრდილოატლანტიკური საბჭო ჩამოვა და განიხილავს, როგორ უნდა გაღრმავდეს ჩვენი ურთიერთობები, რომ დავეხმაროთ საქართველოს რეფორმების განხორციელებაში, რომელიც მას წევრობისთვის მოამზადებს“, - წერია აპატურაის Facebook-ის ოფიციალურ გვერდზე გამოქვეყნებულ განცხადებაში. 

ნატოს ყოფილი გენერალური მდივანი ანდერს ფოგ რასმუსენი თბილისში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ, რიგით მეხუთე საერთაშორისო კონფერენციას დაესწრო.

ერთ-ერთი კითხვაზე პასუხის დროს მან განაცხადა, რომ საქართველომ თავად უნდა გადაწყვიტოს სურს თუ არა ალიანსში გაწევრიანება იმ პირობით, რომ ორგანიზაციის წესდების მე-5 მუხლი მხოლოდ მთავრობის მიერ კონტროლირებად ტერიტორიებზე იმოქმედებს. 

ნატოს წესდების მე-5 მუხლის თანახმად, ალიანსის რომელიმე წევრზე თავდასხმა მთელ ალიანსზე თავდასხმად ფასდება.