ხაზარაძე: კვირიკაშვილს ივანიშვილზე ცუდი არასდროს უთქვამს

საზოგადოებრივი მოძრაობა „ლელოს“ დამფუძნებლის მამუკა ხაზარაძის განცხადებით, ყოფილ პრემიერს გიორგი კვირიკაშვილის მასთან ბიძინა ივანიშვილზე ცუდი არასდროს უთქვამს. ამის შესახებ ხაზარაძემ ტელეკომპანია „პირველის“ გადაცემაში „რეაქცია“ განაცხადა.

„გიორგი კვირიკაშვილის გადაყენების შემდეგ ივანიშვილთან ჩვენი კონტაქტი გაწყდა. როგორი პრემიერი იყო კვირიკაშვილი, კარგი თუ ცუდი, ეს ყველამ ცალ-ცალკე შეაფასოს, მაგრამ ის არის წესიერი, სახელმწიფოებრივად მოაზროვნე კაცი, კარგი მეოჯახე, კარგი მამა და ივანიშვილზე ცუდი არასდროს უთქვამს. აქვე მინდა ვთქვა, რომ ბიძინას ივანიშვილის ღვაწლს ძალიან ვაფასებ, მას ბევრი რამე აქვს ქვეყნისთვის გაკეთებული, მაგრამ ის სისტემა, რომელიც მან ქველმოქმედების გარეთ შექმნა, არის მიუღებელი. ერთ-ერთ ინტერვიუში ივანიშვილმა თქვა, რომ მისი ძლიერი მხარე არის მენეჯმენტი. მე მინდა ვთქვა, რომ მენეჯმენტი მისი ყველაზე სუსტი მხარეა, მას მართვის სტილი საერთოდ არ აქვს“, - განაცხადა ხაზარაძემ.

მამუკა ხაზარაძემ საზოგადოებრივი მოძრაობა „ლელოს“ პრეზენტაცია 12 სექტემბერს, ანაკლიაში გამართა. რაც შეეხება პარტიის დაფუძნებას, როგორც ხაზარაძემ ჟურნალისტებს უთხრა, ის და ბადრი ჯაფარიძე პარტიას ოქტომბერში დააფუძნებენ. 

„თიბისი“ ბანკის დამფუძნებლებს, მამუკა ხაზარაძეს და ბადრი ჯაფარიძეს 2019 წლის 24 ივლისს ბრალი წარედგინათ  ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება. საქმე ეხება 2008 წლის ფინანსურ ოპერაციას. 

26 ივლისს სასამართლომ ბიზნესმენებს აღკვეთის ღონისძიების სახით თითოეულს 700 000 ლარიანი გირაო შეუფარდა  (პროკურატურა მილიონიან გირაოს მოითხოვდა). ამავე დღეს ცნობილი გახდა, რომ „თიბისი ბანკის საქმეზე“  დაწყებული გამოძიების გამო, ბადრი ჯაფარიძემ და მამუკა ხაზარაძემ ანაკლიის მმართველი საბჭოს თავმჯდომარისა და თავმჯდომარის მოადგილის თანამდებობის დატოვების გადაწყვეტილებაც მიიღეს. მანამდე ისინი „თიბისი ბანკის“ მართვასაც ჩამოშორდნენ.