ქუთაისის საერთაშორისო უნივერსიტეტის საგანმანათლებლო სივრცის პრეზენტაცია გაიმართა

ფონდი „ქართუს“ წარმომადგენლებმა ქუთაისის საერთაშორისო უნივერსიტეტის საგანმანათლებლო სივრცის პრეზენტაცია გამართეს. 

როგორც პრემიერის მრჩეველმა განათლების დარგში, პროფესორმა მიხეილ ჩხენკელმა განაცხადა, დღეს, 18 სექტემბერს, მსოფლიო მნიშვნელობის უნივერსიტეტის დაფუძნება აღინიშნება. 

„ეს ჭეშმარიტად ევროპული სტანდარტების მქონე უნივერსიტეტია და ქვეყნისთვის დიდი საჩუქარია. დაფუძნების დღიდან მიუნხენის ტექნიკურ უნივერსიტეტთან ვთანამშრომლობთ და აკადემიური პროგრამები მის ბაზაზე შეიქმნა. მომავალ წელს უნივერსიტეტი უკვე მიიღებს სტუდენტებს, სადაც ლექციებს ევროპის სხვადასხვა ქვეყნიდან, ასევე, აშშ-დან და იაპონიიდან მოწვეული პროფესორები წაიკითხავენ. ისინი როგორც აუდიტორიებში, ისე - ონლაინ მეთოდის გამოყენებით ჩაატარებენ ლექციებს. ეს საზღვარგარეთ მყოფი ქართველი პროფესორების ჩართვას გულისხმობს. 

ასევე, გაცნობებთ, რომ ქუთაისის უნივერსიტეტის საპატიო პრეზიდენტი იქნება მსოფლიოში ცნობილი მეცნიერი, მიუნხენის ტექნიკური უნივერსიტეტის პრეზიდენტი ვოლფანგ ჰერმანი“, - აღნიშნა ჩხენკელმა. 

ქუთაისის საერთაშორისო უნივერსიტეტის რექტორი ალექსანდრე თევზაძე იქნება. უნივერსიტეტი სტუდენტებს 2020 წლის 1 სექტემბერს მიიღებს.

ახალი საგანმანათლებლო სივრცის პრეზენტაციას დაესწრნენ: ფონდი ,,ქართუს“ გამგეობის თავმჯდომარე ნიკო ჩხეტიანი, ქუთაისის საერთაშორისო უნივერსიტეტის რექტორი, პროფესორი ალეკო თევზაძე, მიუნხენის ტექნიკური უნივერსიტეტის პრეზიდენტი ვოლფგანგ ჰერმანი , „იულიხის“ სამეცნიერო კვლევითი ცენტრის ნეირომეცნიერებისა და მედიცინის ინსტიტუტის დირექტორი, პროფესორი გერნდ ნოიმაიერი, IBA ჯგუფის აღმასრულებელი ვიცე-პრეზიდენტი სერჟ ლამისე, აღმასრულებელი და საკანონმდებლო ხელისუფლების,  საერთაშორისო ორგანიზაციებისა და დიპლომატიური კორპუსის წარმომადგენლები.

ქუთაისში ტექნოლოგიური უნივერსიტეტის მშენებლობა 2017 წლის ნოემბერში დაიწყო. უნივერსიტეტი 140 ჰექტარზე აშენებული საუნივერსიტეტო კომპლექსი იქნება. პროექტის ბიუჯეტი, თბილისის ტექნოლოგიურ ცენტრთან ერთად, 1 მილიარდ ევროს შეადგენს და მას ფონდი „ქართუ” სრულად აფინანსებს.