რას სთავაზობს ქუთაისის საერთაშორისო უნივერსიტეტი სტუდენტებს - რექტორის განმარტება

ქუთაისის საერთაშორისო უნივერსიტეტის რექტორმა, ალექსანდრე თევზაძემ ტელეკომპანია „იმედის“ ეთერში, გადაცემა „არენასთან“ ისაუბრა იმის შესახებ, თუ მზადების რა ეტაპზეა ამჟამად უნივერსიტეტი, რა პროგრამებს სთავაზობს სასწავლო დაწესებულება აბიტურიენტებს და რა პირობებში მოუწევთ მათ ადგილზე ცხოვრება.

„ჩვენი ამოცანაა, სტუდენტებს შევთავაზოთ საერთაშორისო საგანმანათლებლო სივრცე. ჩვენ სტუდენტებს მივიღებთ ერთიანი ეროვნული გამოცდების გავლის შემდეგ, თუკი სტუდენტი შემოხაზავს უნივერსიტეტის ნომერს 197-ს და მოხვდება ჩვენს უნივერსიტეტში. ჩვენ მათ შევთავაზებთ უნიკალურ გარემოს. ეს იქნება როგორც ინფრასტრუქტურის, ასევე - აკადემიურ მიმართულებასაც.

პირველ წელს ვიწყებთ სამი საგანმანათლებლო პროგრამით. ესაა საგანმანათლებლო პროგრამები მათემატიკაში, კომპიუტერულ მეცნიერებასა და მენეჯმენტში. ყველა დაინტერესებულ ახალგაზრდას შეუძლა, აირჩიოს შესაბამისი მიმარულება, გახდეს ჩვენი სტუდენტი და მიიღოს მსოფლიო დონის განათლება.

მოგეხსენებათ, რომ ესაა სახელმწიფო უნივერსიტეტი. ამის მიუხედავად, ჩვენ მთლიანად უარი ვთქვით საბიუჯეტო დაფინანსებაზე და ჩვენი დაფინანსების ერთადერთი წყაროა დონორი ორგანიზაცია, საერთაშორისო საქველმოქმედო ფონდი „ქართუ“. ეს უნიკალური მეგაპროექტი მთლიანად ფინანსდება ფონდი „ქართუს“ მიერ. ესაა უნიკალური საშუალება იმისთვის, რომ უნივერსიტეტი ეტაპობრივად განვითარდეს.

რა თქმა უნდა, მშენებელობის პირველი ეტაპი დასრულებულია. ესაა აკადემიური სივრცეები და სტუდენტური საცხოვრებლები. ეს სივრცეები უკვე მზადაა სტუდენტების პირველი ნაკადის მისაღებად 2020 წლის შემოდგომაზე. თუმცა, პარალელურად, საუნივერსიტეტო ქალაქის, კამპუსის ტერიტორიაზე მასშტაბური მშენებლობები გრძელდება. ორი მიმართულებით მიმდინარეობს ეს სამუშაოები, ერთი ესაა აკადემიური მიმართულება. იმისთვის, რომ მომავალ წლებში გაჩნდეს ინფრასტრუქტურა, რომლის საშუალებითაც ახალგაზრდებს ახალ საგანმანათლებლო პროგრამებს შევთავაზებთ. როგორც იცით, 2021 წლიდან ვაპირებთ დავამატოთ საბუნებისმეტყველო მეცნიერებები, 2022 წლიდან - საინჟინრო მეცნიერებები და 2023 წლიდან უკვე მედიცინასაც. ამის პარალელურად, ჩვენი უნივერსიტეტი იქნება კვლევებსა და სამეცნიერო მიმართულებებზე ორიენტირებული. ცალკე უნდა აღინიშნოს ადრონული თერაპიის ცენტრი და ის უნიკალური სამეცნიერო ინფრასტრუქტურა, რომელიც შენდება.

აღსანიშნავია, რომ სტუდენტური საცხოვრებლის სივრცე უნიკალურია. ყველა პირობაა შექმნილი იმისთვის, რომ სტუდენტმა მთელი დრო სწავლის პროცესს მოანდომოს, მაგრამ ამ ყველაფრის მთავარი იდეა ისაა, რომ ესაა საუნივერსიტეტო ქალაქი. ესაა ერთი სივრცე, სადაც მოქცეულია როგორც აკადემიური შენობები, ასევე სტუდენტური, პროფესორების საცხოვრებლები. მთელი ეს სისტემა იმუშავებს იმისთვის, რომ ახალგაზრდებმა მიიღონ წარმატებული განათლება, გახდნენ კარგი პროფესიონალები და ერთდროულად, იქვე შეძლონ სწავლაც და დასვენებაც“ - განაცხადა ალექსანდრე თევზაძემ.